رغم وقف استيرادها.. اعرف إزاي تقدم على سيارة المعاقين والطريقة القانونية عشان تاخدها

 
عربيات المعاقين أو ذوي الاحتياجات بقت تريند كل يوم، وده حصل بعد ما الحكومة قررت وقف استيرادها مؤقتا وفرض إجراءات تفتيشية على كل واحد معاه عربية منها، عشان تتأكد من أحقيته من الدعم ده، وانه من ذوي الاحتياجات الخاصة. . طب لو حضرتك من ذوي الإعاقة وعايز تقدم على عربية، إيه هي شروط التقديم.. هنقولك كل التفاصيل في الفيديو ده فتابعنا للآخر.

بص يا سيدي، لو حضرتك محتاج تعرف القرارات الجديدة لاستيراد سيارات ذوي الهمم، فهي بتبدأ بالتقديم للكشف الطبي لسيارات المعاقين المعفاة من الجمارك، واللي حددتها الحكومة، وهي عبارة عن مجموعة من الخطوات لذوي الإعاقة، من بينها إنهاء إجراءات الكشف الطبي لتسهيل الحصول على سيارة معاقين معفاة من الجمارك، ومن هنا حضرتك بتدخل على الموقع الإلكتروني للمجالس الطبية المتخصصة، وتقدم طلب وتقول إنك من ذوي الإعاقة الراغبين في الحصول على سيارة معاقين، أو سيارة معفاة من الجمارك، وبعد كده، لازم المتقدم يتوجه إلى وزارة التضامن لاستخراج بطاقة الخدمات المتكاملة.

أما الخطوات اللازمة للحصول على سيارات المعاقين 2024، فمنها بردو إن المتقدم لازم يقدم طلب للحصول على سيارة معاقين معفاة من الجمارك، ويملى كل البيانات الموجودة على الموقع، ومنها: (البيانات الشخصية: الرقم القومي – رقم بطاقة الخدمات المتكاملة- الحالة الاجتماعية -العنوان- الوظيفة – التليفون).

كمان، لازم تحدد نوع الإعاقة طبقا للقانون (حركية – سمعية – بصرية – ذهنية – نفسية – أمراض دم – أمراض قلب)، وتكتب مكان الكشف الطبي (الإدارة العامة للمجالس الطبية – المجلس الطبي العام بالإسكندرية – المجلس الطبي العام بسوهاج).

أما إذا كان المتقدم غير كامل الأهلية بسبب مرض معين، فيقوم بتحديد البيانات التالية: (اسم ولي الأمر – الرقم القومي – صفته بالنسبة لحامل الطلب من ذوى الإعاقة)، بعد كده يختار تاريخ الكشف الطبي، وكمان اختيار الجمرك اللي بيرغب المعاق في الحصول على السيارة منه.

بعد  كل ده، بيظهرلك على الموقع بيان بيوضح كافة بياناتك الشخصية اللي قمت بتسجيلها في الخطوات السابقة، وبعدين بيحدد مكان وموعد الكشف الطبي والمستندات المطلوبة وفقا لكل إعاقة من الإعاقات.

وماتنساش إن شروط الحصول على سيارة معاقين 2024، هي إن سن الفرد المتقدم يبدأ من 18 سنة فأكثر، ويكون مصري الجنسية، وتكون العربية مسجلة باسم الشخص صاحب الإعاقة، وسعة السيارة اللترية لا تزيد على 1600 cc.

كمان يلزم أن تكون التجهيزات الخاصة بالسيارات مطابقة وفقا للقانون الصادر من القومسيون الطبي، ولازم تاخد بالك من الشرط ده، إنه ماينفعش بيع العربية قبل أن تمضي فترة 5 سنوات من تاريخ حصولها على إعفاء الجمارك الذي يسمح ببيعها.

كمان لازم حضرتك تجتاز الكشف الطبي لمعرفة قدرة الفرد المعاق على قيادة السيارة، ومطلوب تقرير اجتماعي من وزارة الشؤون الاجتماعية، لتحديد الوضع المالي للشخص المعاق ومدى قدرته على الإنفاق على مستلزمات السيارة المجهزة.

ومن ضمن الورق المطلوب بردو، تقرير من المجلس الأعلى، محدد فيه نسبة الإعاقة ونوع الإصابة، وكمان نسبة احتياج المعاق للسيارة الخاصة ونوع التجهيزات اللي المفروض تكون  في العربية وفقًا لحالة المعاق الصحية.

وأخيرا، لازم تعرف إن الدولة دلوقتي بتدرس مقترح لضبط منظومة استيراد سيارات المعاقين، وبالفعل وقفت استيرادها بأنواعها (الأفراد- المعاقين- التجاري) حاليًا، باستثناء الشركات اللي كان ليها تعاقدات قبل صدور القرار، وحاليا في لجنة بتدرس مقترح بمنع «المعاق» من الاستيراد السيارة إلا كل 5 سنوات أو 10 سنوات، عشان يخفف من عبء الاستيراد.