تثبيت ولا فيه مفاجآت.. أعرف البنك المركزي ناوي على ايه النهارده

تثبيت ولا خفض ولا رفع محدش يقدر يجزم لغاية دلوقتى قرار لجنة السياسة النقدية في البنك المركزي المصري هتكون ايه بخصوص سعر الفايدة.. ياترى هيكون فيه مفاجآت ولا الأمور هتمشي حسب التوقعات.. خليكم معانا للآخر وهتعرفوا التفاصيل في التقرير التالي.
 

مصر كلها عارفة إن البنك المركزي المصري، هيعقد مساء اليوم الخميس، اجتماعه السادس خلال  2024 لتحديد أسعار الفايدة، وزي ما احنا عارفين اللجنة قررت تثبيت سعر الفايدة في اجتماعها الخامس في يوليو اللي فات على سعري عائد الإيداع والإقراض لليلة واحدة وسعر العملية الرئيسية للبنك المركزي عند %27.25 %28.25، %27.75 على الترتيب.

والحقيقة زي ما قلنا قبل كده كل اللي بيتقال عن قرار لجنة السياسة النقدية النهاردة مجرد توقعات بتمشي ورا المؤشرات والبيانات لكن في النهاية المركزي هو سيد قراره  وان كانت التوقعات القوية بتقول إن المركزي هيثبت سعر الفايدة بردوا في اجتماع النهاردة لأسباب كتير قال عليها خبراء الاقتصاد واللي شايفين ان  اجتماع البنك المركزى النهاردة لتحديد سعر الفايدة متوقع له تثبيت لسعر الفايدة بسبب معدلات التضخم لسه مرتفعة، ؜بجانب ان البنك الفيدرالى الأمريكى لسه مخدش خطوات لتخفيض الفايدة إلى جانب تشجيع جذب الاستثمار الأجنبي غير المباشر بسبب التوترات الجيوسياسية فى المنطقة وانعكاسها على تحسن واستقرار سعر الصرف واللي ساعد في زيادة تحويلات المصريين في الخارج بنسبة 200%، بالإضافة إلى ثبوت سعر الصرف مؤخرا.

وفيه خبراء اقتصاد شايفين ان البنك المركزي بيواجه مشكلة كبيرة متعلقة بسعر الفايدة، لانه عاوز يحكم السيطرة على التضخم من ناحية ومن ناحية تانية بيواجه ضغوط تخفيض الفايدة لدعم الاقتصاد وخلق فرص عمل جديدة وأنه في حال قرر الفيدرالي الأمريكي تخفيض سعر الفايدة فدل هيضغط على البنك المركزي المصري وممكن يدفعه  لتخفيضهت و هنا التضخم  هيرجع يزيد وهترتفع الأسعار،  أما في حالة خفض البنك المركزي سعر الفايدة فهنا هيواجه مشكلة كبيرة في الوصول لخفض التضخم لـ7% بنهاية 2024 و5% بنهاية 2026 زي ما أعلن قبل كده.

طيب ايه علاقة  الأموال الساخنة بقرارات المركزي النهاردة ؟

لأن كل أسواق المال مرتبطة ببعضها وفي نفس الوقت مرتبكة بالاستثمار وسعر الفائدة وسوق الصرف والبورصات وحركة التجارة والتقارير الدولية فأكيد سعر الفايدة هيكون ليه تأثير مباشر على جذب مليارات الدولارات من الاموال الساخنة .. ازاي ... شوف حضرتك لو البنك المركزي ثبت اسعار الفايدة الحالية دا هيكون ليه تأثير كبير على جذب استثمارات الأموال الساخنة، خاصة في حال قرر الفيدرالي الأمريكي خفض الفايدة
لأن النوع دا من الاموال بيلف العالم ويشوف افضل سعر الفايدة للاستثمار فيه وهي استثمارات بتكون غالبا في أذون الخزانة والسندات واستثمارات سريعة، لكن تفضل المشكلة في حالة خروج الأموال الساخنة مع أي أزمات سياسية وأمنية إقليمية وعالمية زي ما حصل قبل كده واتسببت في أزمة نقص الدولار وظهور السوق السودا لسد الفجوة الدولارية اللي بتحصل.
عامة النهاردة هيكون يوم فاصل في تحديد سعر الفايدة وكمان في اعلان مؤشرات اقتصادية مهمة جدا هترسم خريطة سوق الصرف في الفترة اللي جاية وكمان هتعكس الحالة العامة للاقتصاد وعلى فكرة فيه مؤسسات مالية دولية بتابع اجتماع المركزي المصري عشان تقيم توقعاتها وتحليلاتها للاقتصاد وبالتالي هتطلع تقارير بحالته بشكل عام.