قبل ما يجي المحصل.. شوف هتدفع كان فاتورة أغسطس بعد الزيادة الجديدة في أسعار شرائح الكهرباء

من كام يوم، وزارة الكهرباء والطاقة المتجددة أعلنت عن رفع اسعار شرائح الكهرباء سواء للبيوت أو المصانع.. يا تري فاتورة الكهرباء الجديدة لشهر اغسطس الحالي هتوصل لكام.. وهل في طريقة اقدر احسب بيها الفاتورة قبل ما محصل الكهربا يجي .

من فترة طويلة والدولة بتتكلم علي زيادة اسعار شرائح الكهرباء، خصوصا ان خطة تسعير الكهرباء كان المفروض تنتهي في شهر يونيو اللي فات، والحكومة قررت مدها شهر اضافي بسبب ازمة تخفيف الاحمال اللي كانت كل فرد في الدولة بيعاني منها علي مدار سنة كاملة الدولة اخذت فيها قرار تخفيف الأحمال وقطع الكهرباء علي كل الاحياء والمناطق السكنية، واللي بدأت في البداية لمدة ساعة كاملة وبعدين الدولة رفعتها لساعتين وفي ايام معينة وصلت ل3 ساعات.
وزي ما احنا عارفين ان مجلس الوزراء اصدر قرار في شهر يوليو اللي فات وتحديد يوم 20 من شهر يوليو، بوقف العمل بخطة تخفيف الاحمال وهيستمر وقف تخفيف الأحمال علي الشبكة الموحدة للكهرباء لحد نصف شهر سبتمبر اللي جاي، وهنا الدولة اخذت قرار بزيادة اسعار شرائح الكهرباء للقطاعين المنزلي والتجاري.
طيب الزيادة الجديدة في اسعار شرائح الكهرباء بتوصل لكام؟.
الزيادات الجديدة اللي حصلت في اسعار شرائح الكهرباء بتوصل في الشريحة الأولى واللي هيا من صفر كيلو وات إلى 50 كيلو وات هيوصل سعرها لـ 68 قرش، والشريحة الثانية واللي هيا من 51 كيلو وات ساعة إلى 100 كيلو وات بيوصل سعرها 78 قرش، والشريحة الثالثة واللي هيا من صفر كيلو وات ساعة إلى 200 كيلو وات ساعة بيوصل سعرها 95 قرش والشريحة الرابعة من 201 إلى 350 كيلو وات ساعة بيوصل سعرها 155 قرش، والشريحة الخامسة من 350 إلى 650 كيلو وات بيوصل سعرها 195 قرش، الشريحة السادسة من 650 إلى 1000 كيلو وات بيوصل سعرها 2.1 جنيها، واخيرا الشريحة السابعة اكثر من 1000 كيلو وات بيوصل سعرها 2.3 جنيها.
وزارة الكهرباء اعلنت عن تطبيق الزيادة الجديدة في اسعار شرائح الكهرباء للقطاعين المنزلي والتجاري بداية من شهر اغسطس الحالي وبأثر رجعي لمدة 15 يوم فاتوا في العدادات مسبقة الدفع وهتنزل الزيادات الجديدة في العدادات الميكانيكية اللي هيا القديمة اعتبارا من فاتورة شهر اغسطس اللي هتصدرها وزارة الكهرباء في شهر سبتمبر اللي جاي .
طيب ازاي احسب فاتورة الكهرباء عندي قبل ما محصل الكهرباء يبجي ؟.
من غير ما تلف ولا تحتار علشان تحسب فاتورة الاستهلاك المنزلي للكهرباء هتضرب سعر الكيلووات في الاستهلاك بالكيلو وات هيطلع لك المبلغ اللي هتدفعه، ولو انت علي الشريحة الاولي واللي هيا من 0- 50 كيلو وات واللي بيوصل سعر الكيلو وات فيها لـ 68 قرش، فكده هيوصل سعرها لـ34 جنيه بمعني انك هتضرب 50 كيلووات في 68 قرش هيطلع لك التكلفة 34 جنية، وهتطبق نفس الطريقة دي علي كل الشرائح هتضرب اجمالي عدد الكيلووات في التكلفة الفعلية لكل شريحة فهيطلع لك سعر التكلفة هتوصل لكام .