بعد التراجع الأخير.. أسعار الأجهزة الكهربائية رايحة على فين؟

يا ترى أسعار الأجهزة الكهربائية رايحة علي فين، هل في زيادة ولا انخفاض في الفترة الجاية، وإيه الآلية اللي بتحكم السوق دلوقتي وإزاي تقضي الحكومة على جشع التجار.. هنقولك كل التفاصيل في التقرير  ده.
 

في الأيام الأخيرة، أسعار الأجهزة الكهربائية انخفضت أو نزلت وده كان لأسباب كتيرة منها الإفراجات الجمركية، بمعنى إن كان في بضاعة كتيرة مركونة في المواني والجمارك لكن تم التصريح لها بدخول السوق بعد حبسها لمدة شهور.

ومن هنا زاد المعروض في السوق ومابقاش في ندرة في وجودها والتجار مبقوش يحبسوا الحاجة وبقوا عايزين يتخلصوا منها بأي طريقة عشان ماتخسرش، فده طبعًا أدى إلى انخفاض الأسعار.

كمان من ضمن الأسباب، هي ثبات سعر الدولار بعد ما البنك المركزي المصري رفع سعره في البنوك ونجح في جذب العملة من السوق السودا، وبكده بقى عنده وفرة في العملة الخضراء اللي من خلالها بيقوم باستيراد أجهزة جديدة من الخارج، وبالتالي يتملي السوق بالبضاعة والكل يبيع بأسعار تنافسية، والزبون هو الكسبان، لأن الحاجة موجودة بوفرة والتجار بقوا يتنافسوا في خطف الزبون.

نقدر نقول كمان، إن خطة الحكومة لتوطين الصناعات في مصر واستقدام التكنولجيا الحديثة فيها، كانت عامل جديد لتخفيض أسعار الأجهزة الكهربائية، وده معناه إننا هنصنع الماركات العالمية في مصر وهنوفر فلوس استيرادها من بره بالدولار، وبالتالي هتقل فلوس شحن الأجهزة والمواطن ممكن يشتريها من أي مصنع جنبه أو أي توكيل في منطقته بسعر أقل.

طب الأسعار دلوقتي شكلها إيه؟

بص يا سيدي، دلوقتي  أسعار التكييفات الـ 1.5 حصان بتبدأ من 17 إلى 23 ألف جنيه، وبالنسبة لـ "الانفرتر" فبيتراوح سعره بين 23 إلى 27 ألف جنيه، وسجل الـ2.25 حصان (البارد فقط) بين 27 إلى 33 ألف جنيه، و"الانفرتر" من 33 لـ 37 ألف جنيه.

أما التكييفات الثلاثة حصان فتتراوح من 37 إلى 43 ألف جنيه، "والانفرتر" ما بين 43 إلى 49 ألف جنيه.

وبالنسبة لأسعار المراوح، فهي بتختلف بحسب الحجم والماركة، لكنها بتتراوح بين 750 إلى 2000 جنيه بالنسبة لمراوح السقف والعمودية، أما الحائطية فيبدأ سعرها من 600 الى 1800 جنيه.

وأسعار الغسالات النصف أوتوماتيك بتتراوح ما بين 4 إلى 9 آلاف جنيه، والغسالات فوق أوتوماتيك ما بين 9.5 إلى 20 ألف جنيه بحسب الحجم والماركة.

كمان التلاجات، أسعارها انخفضت في الفترة الأخيرة، وأسعار "التلاجة" الشعبي بيتراوح ما بين 10 إلى 15 ألف جنيه، وما بين 10 إلى 30 ألف جنيه حسب الحجم والماركة لبعض أنواع الثلاجات، أما "تلاجة الطبقة المتوسطة" فبتبدأ سعرها من 15 إلى 25 ألف جنيه.

وقبل ما نخلص الفيديو، هنقدم لحضرتك مجموعة نصايح وأنت بتشتري أجهزة كهربائية، ماتنساش تعمل بيها عشان مايضحكش عليك، واللي أولها إن حضرتك تحدد إماكنياتك المادية اللي هتقدر بيها تشتري تلاجة أو غسالة أو بوتاجاز أو تكييف وغيره، كمان حدد مواصفات السلعة المطلوبة والغرض من شرائه، بعد كده قارن بين سعرها ومواصفاتها عند التاجر أو المكان اللي هتشتري منها ونفس السلعة في مكان تاني.

وخليك حريص إنك تختار اسم أو ماركة أو علامة تجارية كويسة عشان تعيش معاك، واوعى تنسى تشوف الضمان وشروطه وبياناته ومن كام لكام، كمان اتأكد من توافر مراكز خدمة ما بعد البيع الخاصة بالسلعة...

وماتنساش تحدد ميعاد الاستلام في إيصال الحجز ، أو فاتورة الشراء.

كمان، لازم تراعي شوية حاجات عند شراء الأجهزة الكهربائية، أولها إنك تفحص أو تشوف الجاهز عند الاستلام والتأكد من كفاءة عملها ووجود كل المواصفات المتفق عليها وتتأكد إن مافيهوش عيب فني أو خدش أو جهاز قديم أو مخبوط، وتشوف كويس الفاتورة اللي طالعة من محل الشرا.

ضيف على ده، شهادة الضمان اللي طالعة من الشركة الضامنة أو المصنع، وبعد ما تركب الجهاز اقرأ كويس دليل استخدامه والإرشادات الخاصة بها لتجنب حدوث أي تلف في السلعة بسبب سوء الاستخدام.

وماتنساش تجربه كويس عشان تتأكد إنه خالي من العيوب الفنية، وأنه سليم 100%.