بتكلف البلد خساير كبيرة جدا.. شوف الدولة بتعمل إيه علشان تحل أزمة سرقة الكهرباء

من فترات بعيدة وأحنا بنسمع عن سرقة الكهرباء، وانها ارتفعت بشكل كبير قوي في الفترة الأخيرة وأنها السبب الأساسي في موضوع تخفيف الأحمال وقطع الكهرباء علي الناس طوال الفترة اللي فاتت.. يا تري ايه حقيقة الكلام ده.. واية اللي هتعمله الدولة مع اللي بيسرق الكهرباء 
 
المصريين عاشوا سنة من أصعب سنين حياتهم خصوصا أن الكهرباء كانت غالبا بتقطع عليهم في اليوم أكثر من مرة، ومكنش في بيت في مصر الكهرباء مش بتقطع عليه وكمان موضوع قطع الكهرباء كان مستمر معانا في فصل الشتاء والصيف وكل ما تسال اية السبب يقولك أن المحطات بتاعنا زي الفل وان الأزمة مش أزمة محطات وهيا زمة توفير وقود لتشغيل محطات توليد الكهرباء.
طيب اشمعني أزمة الكهرباء ظهرت دلوقتي ولسه مظهرتش في السنين اللي فاتت؟.
الموضوع باختصار ظهر دلوقتي بسبب ارتفاع الإستهلاك وده تزامن مع التوسعات الجديدة اللي إضافتها الدولة من مشروعات عمرانية وتنموية جديدة وبالتالي الاستهلاك زاد جدا وغير أن في ناس كتير جدا من الشعب المصري أستغلت الظروف وعملت وصلات الكهرباء من وراء العداد علشان يسرق الكهرباء وعلشان يشغل التكييفات واللمبات ويهلك كهرباء كتير بدون ما يدفع حاجة، وللاسف الموضوع ده بقي منتشر جدا وعلي الرغم من الجهود اللي عملتها الدولة في تركيب العدادات مسبقة الدفع واللي هيا مخصصة لكشف وقائع سرقة الكهرباء لكن برضوا فيه ناس ابتكروا طرق جديدة لسرقة التيار بدون ما تظهر علي الأجهزة بتاعة شركات توزيع الكهرباء .
طيب اية اللي بتعمله وزارة الكهرباء والطاقة المتجددة علشان تنتهي من موضوع سرقة الكهرباء ؟.
الدكتور محمود عصمت وزير الكهرباء والطاقة المتجددة، أصدر  قرارا باتخاذ كب الإجراءات الفنية اللازمة لتركيب العدادات الكودية المؤقتة مسبقة الدفع كوسيلة فنية لقياس استهلاك الكهرباء لكل العقارات والمنشآت دون استثناء، والتركيب ده مش هيترتب عليه أي حقوق قانونية للمخالفين ولا هيعتبر العداد الكودى سند للملكية أو الحيازة ولا تقنين الأوضاع
قرار وزير الكهرباء تضمن كمان أن شركات توزيع الكهرباء هتقوم بتحديد العقارات والمنشآت اللى بتحصل على الكهرباء بشكل غير قانوني وكل شركة في نطاق عملها، وهتقوم بتركيب العدادات الكودية بكل العقارات والمنشآت المخالفة، وكمان كلف كل شركة باعداد تقرير أسبوعي عن العدادات الكودية المؤقتة مسبقة الدفع اللي تم تركيبها، وقال كمان أن الاسبوع اللي فات بس الوزارة ركبت 33 ألف عداد كودي على مستوى جميع الشركات.
الدكتور عصمت وجه كمان باتخاذ كل الإجراءات اللازمة للارتقاء بمستوى الخدمات اللي يتقدمها الوزارة المواطن والتصدي لسرقات التيار الكهربائي ومنع الوصلات غير القانونية واللى بنتج عنها أضرار بالغة للشبكة الكهربائية، وقال إن شركات التوزيع هتقوم بتركيب العداد لكل حالة سرقة للكهرباء بدون قيود أو شروط وأن فيه لجان هتقوم بالمرور والتفتيش من الشركة القابضة ومن الوزارة علشان تتابع تركيب العدادات الكودية المؤقتة وده هيكون وسيلة لقياس استهلاك التيار الكهربائى 
وزير الكهرباء قال أن نسب الفقد الناتج عن سرقات التيار الكهربائي بتكبد الدولة خسائر مالية كبيرة ده غير الإضرار اللي يتتسبها في استقرار التيار علي الشبكة نتيجة دخول أحمال مفاجئة غير مخطط وبتتسبب في انقطاع التيار الكهربائي، وقال كمان أن خطة العمل مستمرة في التوسع فى استخدام التكنولوجيا الحديثة وحوكمة منظومة العدادات وتحسين الخدمة المقدمة للمواطنين، وأن مشروع تركيب العدادات الذكية ومشروعات تحسين كفاءة الطاقة بشبكات التوزيع ومشروع استبدال العدادات التقليدية بأخرى مسبقة الدفع وغيرها من الإجراءات اللي بتقوم بيها الدولة هدفها تحسين جودة الخدمة الكهربائية المقدمة للمواطن المصري.