بعد تغفيلة الدولار.. هستثتمر فلوسك فين

معاك فلوس أو مدخرات زيادة ومش عارف تستثمرها فين وخايف من قيمتها تنزل مع ارتفاع سعر الدولار ومش عارف أنسب حاجة للاستثمار هنقولك تحط فلوسك فين وهتاخد الضعف

الحقيقة فيه مجالات كتير للاستثمار لكن أغلب الناس بتحتار تحط فلوسها فين خاصة وإن الاسواق كل شوية بحال.. شوف حضرتك البلد فيها فرص كتير للاستثمار لكن الغلط انك تحتفظ بالسيولة الزايدة معاك في البيت أو تحت البلاطة لأن قيمتها مع الايام بتقل وعشان كده لازم تشغلها أهو منها تحفظ قيمتها ومنها تزود فلوسك..
لو عاوز تتستثمر صح فيه أكتر من مجال زي ماقلنا منها الدهب والعقار وشهادات الادخار والبورصة والمشروع الخاص ولكل واحد فيهم ميزة تختلف عن التانية وفيها عيوب بردو يعني شهادات الادخار مثلا ميزتها إنها استثمار آمن تماما بضمان البنك المركزي وبتاخد فايدة معروفة كل شهر أو حسب نظام الشهادة وفي اخر المدة بتاخد اصل فلوسك لكن مشكلتها إن الفايدة بتاعتها ثابتة وفلوسك بتكون مرهونة طول مدة الشهادة يعني لو جالك استثمار تاني أكتر ربحية مش هتقدر تسحب فلوسك أو هتضطر تكسر الشهادة وتضيع عليك الفايدة.. 
أما الاستثمار في العقار فالحقيقة بيعتبر خطر دلوقتي لان كل يوم الاسعار في حال مرة فوق ومرة تحت والسوق بيطلع وينزل لأسباب مؤقتة زي زيادة الطلب على العقار بسبب زيادة أعداد اللاجئين وممكن في اي وقت تحصل حاجة والاسعار تنزل وده غير الاجراءات الكتيرة في عملية الشراء ولسه هتروح تعاين وتجيب محامي يشوف الورق وبعدها هتدخل في قصة التسجيل والشهر العقاري واجراءات طويلة .
وبخصوص الاستثمار في البورصة فدا بيعتبر من اهم أنواع الاستثمار دلوقتي في مصر لان البورصة بتحقق الفترة  الاخيرة مكاسب ضخمة جدا بس النوع دا من الاستثمار عاوز خبرة وماينفعش تروح تشتري اسهم بنفسك لازم تروح شركة اوراق مالية كويسة وهما اللي هيشترولك الاسهم اللي طالعة وبتحقق أرباح لكن في نفس الوقت الاستثمار في البورصة عاوز أعصاب حديد لأن الاسهم شوية فوق وشوية تحت.
لكن الاستثمار في الدهب دلوقتي بيعتبر فرصة كبيرة جدا لو عاوز مكسب يعدي ضعف فلوسك لأن كل التوقعات بتقول إن الدهب طاير وهيوصل السحاب والعيار اللي النهاردة أبو 3300 جنيه مثلا بعد كام شهر هيوصل 6 الاف جنيه وشفنا فعلا الدهب طالع ومش بينزل ودا اللي بيتقوله كل المؤسسات الدولية في الخارج واللي بتأكد إن الدهب هيستمر في الصعود بشكل كبير لغاية سنة 2026 وعشان كده افضل استثمار دلوقتي تحط فيه فلوسك هو الدهب لأن الاسعار هتضاعف في خلال كام شهر ودا افضل وسيلة عشان تحافظ على فلوسك وتضمن إنها بتزيد كمان في المستقبل.