البنوك بدأت تتحرك.. مصير شهادات الادخار بعد قرار الفايدة واشتعال الدهب
![صورة ارشيفية]( /UploadCache/libfiles/5/7/600x338o/17.jpg)
البنك المركزي زي المتوقع ثبت سعر الفايدة في اجتماعه الخميس اللي فات.. ورجع الكلام عن مصير شهادات الادخار ذات العائد المرتفع أو الفايدة الكبيرة .. ياترى البنوك هتعمل إيه في شهادات الادخار بعد قرار المركزي وارتفاع اسعار الدهب وعلاقته بقرار البنوك المنتظر.. هنقول كل حاجة في الفيديو ده.. خليكم معانا.
من فترة وقبل حتى اجتماع لجنة السياسة النقدية بالبنك المركزي كان فيه كلام عن دراسة المسئولين في بنك مصر والاهلي المصري لخفض قيمة الفايدة في شهادات العائد المرتفغ وهي شهادات 27 و30 في المية ودا بسبب تكلفتها الكبيرة على البنوك وارهاق الميزانية ولأن الظروف اللي طرحت فيها البنوك الشهادات دي اتغيرت مع تراجع معدلات التضخم في مصر.. وعشان كده فيه كلام إن البنوك دلوقتي بتدرس تخفيض الفايدة على الشهادات دي بالذات عشان بقت تمثل حمل كبير على البنوك لكن مفيش اي قرار رسمي صدر بده لغاية دلوقتي.
طيب ايه اللي بيحدد قيمة الشهادة دي في البنوك... شوف حضرتك سعر الفايدة على شهادة الادخار بيحدده السياسة العامة للبنوك ولكل بنك دراسات وميزانيات خاصة بتكلفة الفلوس وهيكل الودايع ومعدلات التوظيف، وبناء على كل ده يحدد البنك السعر المناسب لفايدة الشهادة والفترة اللي يمكن فيها تحمل التكلفة لكن في الغالب الفايدة المرتفعة بالبنوك بتضغط على تكاليفها وهوامش أرباحها، وعشان كده في ترجيح إن البنوك هتخفص الفايدة عليها لمستويات أقل وفيه أراء شايفة إن خفض الفايدة على الشهادات مرتبط بالسعر الاسترشادي اللي بيحدده البنك المركزي للفاسدة على الجنيه.
وفيه رأي توقع خفض اسعار الفايدة لشهادات الادخار مع بداية خفض البنك المركزي لسعر الفايدة واللي غالبا هيكون في الربع الاخير من السنة دي 2024.
طيب ليها البنوك طرحت الشهادات العالية دي لما بتفكر تخفض الفايدة تاني.. شوف ياسيدي البنوك طرحت الشهادات دي في وقتها لأنه كان ليها دور محدد ومستهدفات لجذب حصص من السيولة خارج القطاع المصرفي.
طيب إيه علاقة سعر الفايدة باللي بيحصل في الصاغة.. شوف حضرتك الدهب بينافس شهادات الادخار في الاستثمار يعني الناس لما تيجي تشغل فلوسها أو تستثمرها بتفكر في الدهب أو اشهادات الادخار وأي خفض في فايدة شهادات الادخار هيكون طبعا لصالح الدهب والعكس صحيح لأن صاحب السيولة كل اللي يهمه إن فلوسه تشتغل وتجيب عائد كويس وفي نفس الوقت وسيلة الاستثمار تكون مضمونة وآمنة والاتنين بيتوفروا في الدهب لكن مع الارتفاع المستمر في اسعار المعدن الاصفر والتوقعات باستمرار الزيادات لأخر سنة 2025 ده بيغري أصحاب الاموال والمدخرات انهم يحطوا فلوسهم في الدهب.