ضربة النهاية للوحش الأخضر.. نظام مالي جديد للدفع بالعملات الوطنية
![بريكس]( /UploadCache/libfiles/5/6/600x338o/846.jpg)
ليه نهاية سيطرة الدولار على الجنيه قربت وايه اللي بتحضرله بريكس للوحش الأخضر الأمريكي وايه حكاية نظام الدفع الجديد في تحالف بريكس وإزاي مصر هتستفيد من ده وهتوفر قد ايه دولارات في السنة.
مصر انضمت رسمياً لتحالف دول بريكس واللي بيضم اكتر من نص سكان الكوكب ومع قوى اقتصادية مخيفة زي الصين وروسيا والهند والبرازيل والسعودية والإمارات وغيرها وهي دول بتملك تقريبا اغلب الموارد البشرية والطبيعية في العالم وبتتحكم في خطوط التجارة العالمية وده سبب أهمية البريكس في العالم باختصار هي سوق ضخمة وإمكانيات اقتصادية مهولة وموارد ملهاش اخر ولأن البريكس مدخلش مرحلة الجد غير قريب وتحديدا بعد استخدام أمريكا للدولار في فرض عقوبات على الدول المعارضة وخاصة الصين وروسيا فكرت دول التحالف في وسائل كتير للحد من هيمنة العملة الأمريكية وده بقي مسألة حياة أو موت بالنسبة الصين وروسيا وحتى الهند ودا أكبر دول اقتصاديا وسكانيا في العالم.
طيب ايه اللي بيحصل ؟.. شوف حضرتك من شهور و البريكس بيدور على وسيلة لتخفيف الاعتماد على الدولار في التجارة الدولية والحد من تأثيره كأداة للعقوبات الاقتصادية والمالية على الدول الأعضاء وكان من بين المقترحات إجراء التعاملات النقدية والمالية والتجارية بين دول البريكس بالعملات الوطنية لكن ده هياخد وقت شوية عشان كده تحالف بريكس فكر في طريقة اسهل لضرب الدولار..
طيب ايه هي الطريقة دي،؟
دلوقتي حضرتك روسيا وهي اكتر دولة بتعاني دلوقتي من العقوبات والغطرسة الاقتصادية الأمريكية بتحضر مشروع قرار جديد للدفع الالكتروني بالعملات الوطنية بين دول التحالف من خلال إنشاء منصة دفع وتسوية مالية رقمية متعددة الأطراف ضمن إطار مجموعة بريكس وحاليا وزارة المالية الروسية والبنك المركزي الروسي، بالتعاون مع الشركاء في المجموعة، بيعدوا تقرير لقادة دول بريكس حول مشروع لتحسين النظام النقدي والمالي الدولي، واللي هيحتوي على قائمة المبادرات والتوصيات بشأن المشروع ورجحت روسيا موافقة القادة على إنشاء منصة دابفع والتسوية المالية الرقمية متعددة الأطراف الجديدة واللي هتساعد في الجمع بين الأسواق المالية للدول الأعضاء في بريكس وزيادة حجم التجارة المتبادلة .
الأهم بقي إنه في حالة الموافقة على النظام المالي الجديد يمكن استخدام العملات الرقمية للبنوك المركزية لدول المجموعة واللي هيتم ربط سعرها بقيمة العملات الوطنية في البنوك المركزية بعد الانتهاء من الاجراءات الفنية والتشريعية اللازمة.
طيب مصر هتستفاد إيه من تطبيق النظام المالي الجديد في بريكس.. اكيد طبعا هتستفاد وكفاية نقولك إن مصر ممكن توفر من 30 الى40 مليار دولار في السنة الواحدة وده حجم التبادل التجاري وحركة التجارة بين مصر ومجموع دول بريكس لما تدفع بالعملات الرقمية بدل الدولار الكاش ومصر أصلا بتستعد لإطلاق الجنيه الرقمي واللي قيمته هتكون نفس قيمة الجنيه العادي لكن يمكن استخدامه في الدفع الالكتروني اللي ناوية عليه البريكس.