مفاجأة تقلب الموازين.. حقل ظهر يعود لعصره الذهبي وبإنتاج مضاعف
معقولة حقل ظهر للغاز الطبيعي ممكن يرجع اكتر من الاول وهل فعلا هيرجع بحجم انتاج الضعف وترجع مصر تصدر تاني بعد الاكتفاء الذاتي.. تعالوا نشوف إيه الحكاية وازاي ده فعلا هيتحقق قي الفترة الجاية.. خليكم معانا للآخر معانا مفاجآت كتير..
تعالوا الأول نعرف قصة حقل ظهر من البداية.. شوف ياسيدي الحكاية بدأت في سنة 2015 لما مصر أعلنت عن حدث غير مصير الطاقة في المنطقة وهو اكتشاف حقل ظهر، على يد شركة ايني الإيطالية العملاقة واللي بيعتبر أهم الاكتشافات الغازية فى تاريخ مصر وبيمثل 35% من انتاج مصر من الغاز الطبيعي بحجم انتاج وصل للذروة ب5 مليار قدم مكعب يوميا وبدأ التصدير في 2018 قبل تراجع إنتاج بعد 6 سنين من الوفرة مقابل ارتفاع الطلب المحلي بشكل كبير .
الأرقام بتقول إن إنتاج حقل ظهر تراجع من 2.8 مليار قدم مكعب يوميا في سنة 2021، إلى 2.7 مليار قدم مكعب في 2022، ثم إلى 2.2 مليار قدم مكعب في عام 2023 قبل أن يتراجع خلال الشهور الستة الماضية لأقل من ملياري قدم مكعب يوميا يعني الإنتاج أقل اكتر من النص. بكتير وده اللي خلق الأزمة الأخيرة بتاعة تخفيف أحمال الكهرباء بسبب النقص الكبير في إنتاج الغاز واللي بتعتمد عليه اغلب محطات إنتاج الكهرباء وخاصة مع القفزة الكبيرة في الاستهلاك نتيجة ارتفاع موجة الحر لمستويات قياسية في تاريخ مصر وعشان كده اتحولت مصر من التصدير لاستيراد الغاز وبقت تدفع مليارات الدولارات بدل ما تقبض المليارات وبنفكركم إن مصر صدرت غاز باكتر من 8 مليار دولار في سنة 2022 وبحوالي 3.5 مليار دولار في 2021 وبنقولك ده عشان تعرف حجم الخسارة اللي خسرتها مصر يعني تصدير سنة واحدة من الغاز بيساوي قرض صندوق النقد الدولي.
طيب إيه مناسبة الكلام عن حقل ظهر دلوقتي ؟
الحقيقة أن فيه اخبار سارة جدا في ملف الغاز وتحديدا في ملف حقل ظهر واللي يظهر كده أنه هيرجع لسابق عصره الدهبي وده بعد إعلان شركة إيني الإيطالية، أكبر مستثمر أجنبي في قطاع الطاقة بمصر، حفر بئرين جديدتين فى حقل ظهر بمياه البحر المتوسط العميقة باستثمارات 160 مليون دولار في النصف التاني من2025 وزي ماقلنا الوحش الايطالي ابني هو اللي اكتشف البير الرئيسي لحقل ظهر.. لكن ازاي الشركة هتحفر اكتر من بئر جديد والإنتاج بتاع الحقل الاولاني بيقل.. النقطة دي مهمة جدا عشان فيه حاجة احنا مش واخدين بالنا منها وهي إن فيه فرق كبير بين حقل ظهر وبين منطقة امتياز اللي فيها حقل ظهر وهي منطقة امتياز شروق بمعني أن حقل ظهر ده بير تم حفره في منطقة الامتياز واللي هي واسعة جدا ولسه فيها اماكن محدش حفر فيها يعني لسه التنقيب متاح في منطقة الامتياز في العموم ولو تخيلنا أن شركة ايني واللي مش بتحفر وخلاص غير لما تاخد عينات من التربة تحت البحر وتتاكد من وجود طبقة غاز لو اكتشفت اتنين حقل ظهر تاني ايه اللي ممكن يحصل حضرتك ممكن تخيل حجم الإنتاج المضاعف هيكون قد ايه وضيف عليهم حجم الإنتاج الفعلي لحقل ظهر القديم.
المعلومات المتاحة لغاية دلوقتي إن فيه وفد رفيع المستوى من المسؤولين بشركة إيني الإيطالية زار مصر يوم الاثنين اللي فات وإن ايني شغالة في عمليات بحث وتنمية لمنطقة امتياز شروق زي ماقلنا ودلوقتي بتعمل دراسات جيولوجية تمهيدا لاستنئاف عمليات الحفر في الحقل والمنطقة .. واكيد بردوا لو الاكتشافات وعمليات التنقيب الجديدة جت حسب التوقعات هيحصل تغير كبير في سوق الطاقة بالمنطقة كلها.
