السيسي أمر.. شوف الحكومة بتعمل إيه علشان تأمن وتوفر العملات الأجنبية
الحكومة الجديدة للدكتور مصطفي مدبولي رئيس مجلس الوزراء جاية بتوجيهات مباشرة من القيادة السياسية بالعمل علي تعزيز الصادرات وتقليل فاتورة الاستيراد، وتوفير الدولار الأمريكي والنهوض بالمنتج المحلي.. وده اللي بدا يحصل في وزارة الزراعة واللي اصدرت أول قرارا لتنفيذ قرارا الرئيس يا تري اية هو القرار وفايديته للاقتصاد المصري اية
من فترة طويلة وقبل استقالة الحكومة السابقة والقيادة السياسية وجهت الحكومة للعمل علي تعزيز الصادرات وخفض الاستهلاك والاستيراد وتعزيز تنافسية المنتج المحلي وفتح باب الاستثمار قدام الشركات الاجنبية اللي عايزة تدخل مصر علشان تبني مصانع وشركات هتكون مصدر دولاري جديد لمصر من العملات الاجنبية .
توجيهات القيادة السياسية للحكومة بدأت الحكومة تفندها علي الورق من ايام بعيدة وده أول خطوات الاصلاح الاقتصادي في مصر، واللي كانت بدايته تعزيز الصادارت المصرية لكل الدول اللي عايزة تشتري منتجات مصرية خصوصا المنتجات الزراعية واللي بتحظي بقبول وفاعلية كبيرة عن كتير من المستوردين حول العالم، خصوصا ان المنتج الزراعي المصري معروف حول العالم بكفاءته وقبول عن المستهلك، وعلشان كده المنتج الزراعي المصري عليه طلب كبير جدا من اغلب دول العالم، ده غير ان الدولة بتدفع ارقام كبيرة جدا في استيراد غذاء المصريين خصوصا من القمح اللي مصر بتدفع فيه ارقام كبيرة جدا من الدولار علشان تأمن رغيف خبر المواطنين، ده غير تأمين غذاء المواطنين من اللحوم واللي مصر استوردت نسبة كبيرة منها في الشهور اللي فاتت بسبب نقص المعروض في الأسواق.
وعلشان الحكومة ماشية علي خطوات وكل خطوة بتكمل اللي قبلها، فكانت توجيهات الحكومة لوزير الزراعة الجديد باستكمال اللي بدأته الحكومة السابقة لتعزيز الصادرات المصرية، وقال علاء فاروق وزير الزراعة واستصلاح الاراضي الجديد في حكومة الدكتور مصطفي مدبولي، أن في توجيهات مباشرة من الرئيس عبدالفتاح السيسي رئيس الجمهورية بالاهتمام بالفلاح وتوفير مستلزمات الإنتاج وكل اللي يمس قوت المصريين والمزارع البسيط والريف المصري .
وزير الزراعة كمل كلامه وقال أن الازمات اللي بيشهدها العالم سواء السياسية أو الاقتصادية فرضت علينا الاعتماد على نفسنا وتحقيق الأمن الغذائي من جميع المحاصيل الاستراتيجية، وأهمية التركيز علي التصدير خصوصا أن بيجلب العملة الصعبة اللى هتساعد الدولة في خطط التنمية الصناعية وتوفير مستلزمات الإنتاج وزيادة الرقعة الزراعية واللي هتسمح بتحقيق فائض للتصدير .
وعلي طول ولتنفيذ قرارات القيادة السياسية وزارة الزراعة اعلنت عن إضافة محاصيل جديدة ضمن منظومة التكويد ضمن المنتجات المراد تصديرها وهيا "العنب والفراولة والفلفل والجوافة والرمان والموالح والبصل والمانجو والفول السودانى والتمور للصين والخوخ للاتحاد الأوروبي، وإحكام الرقابة عليها من المزرعة ولحد ميناء الوصول فى الدولة المستوردة وده هيكون تحت الاشراف الكامل للجهات الرقابية ممثلة فى الحجر الزراعي المصرى والجهات الفنية بوزارة الزراعة وده ضمن خطوات الدولة لتعظيم ايراداتها من الدولار من قطاع الزراعة .
