انفراجة في سوق السيارات.. شوف إللي حصل
ايه اللي حصل في سوق السيارات في الساعات الأخيرة وليه الحكومة اتحركت دلوقتي وايه تأثير اللي حصل على أسعار السيارات في الأيام الجاية.. لو بتفكر تشتري عربية جديدة شوف الفيديو ده للآخر .
فاكرين على مدار اليومين اللي فاتوا بانكير كان أول منصة اتكلم عن أزمة احتجاز السيارات في المواني بسبب عطل في سيستم تسجيل الدخول وقلنا إن فيه 13 الف سيارة محجوزة في عدد من المواني لنفس السبب وبعدها طبع عضو في شعبة السيارات وقال إن فيه كمان 10 آلاف سيارة تم التعاقد عليها ومش عارفة تدخل لتعطل السيستم أو منظومة التسجيل المسبق للشحنات "ACI" والحقيقة وزارة المالية ومعاها وزارة التجارة والصناعة كان موقفهم غريب جداً من الأزمة وده لأنهم أنكروا وجود عطل على غير الحقيقة وبعد تاكيد شعبة السيارات إن السيارات محجوزة فعلا والا مدخلتش ليه..
طيب ايه الجديد في الأزمة ؟
شوف ياسيدي في الساعات الأخيرة وبعد ما اتكلمنا هنا في بانكير وبعدها طلع مسؤولي الشعبة اتكلموا حصلت انفراجة كبيرة في الازمة وأكد عدد من وكلاء السيارات في مصر بدء الإفراج عن السيارات المتراكمة في المواني وفتح نظام التسجيل المسبق للشحنات للسيارات سواء المستوردة للاستخدام الشخصي أو التجاري ودي النظام اللي أكدنا أنها عطلان وكان سبب تراكم العدد الكبير ده من السيارات واللي اتسبب في ارتفاع الأسعار وعودة الأوفربرايس من تاني نتيجة نقص المعروض من طرازات معينة وقال التجار خلال اجتماع جمع وكلاء السيارات مع وزير التجارة والصناعة أحمد سمير ومسؤولي الجمارك، إن فتح نظام التسجيل المسبق للشحنات بالنسبة للسيارات هيكون للمركبات الموجودة في المواني فقط، ولكن لم يتم الإعلان عن فتح النظام لتسجيل شحنات جديدة والحقيقة ده لغز كبير لأن الوزارة مفسرتش سبب وقف الاستيراد لشحنات جديدة واللي مش هتدخل غير عن طريق نظام التسجيل الالكتروني لكن وزير التجارة والصناعة طلب من الوكلاء تحديد عدد السيارات اللي هيتم استيرادها اعتبارا من أول يوليو ولغاية اخر السنة.
هو ايه اللي بيحصل في المواني طيب؟
زي ما قلنا شعبة السيارات أكدت وجود عطل في منظومة التسجيل المسبق للشحنات ورغم كده الوزارتين نفو ومعاهم مصلحة الجمارك واللي اعتبرت تعطل السيستم إشاعات مغرض وقال المرصد الإعلامي الجمركي، إن منظومة التسجيل المسبق للشحنات مستقرة تمامًا وشغالة بشكل منتظم وقال بيان للمصلحة إنه تم إصدار أكتر من 98 ألف رقم تعريفي مبدئي للشحنات "ACID" من بداية مايو اللي ولغاية دلوقتي، ودا بيعكس استقرار حركة الاستيراد عبر هذا النظام حسب البيان وإن المواني استقبلت بـ 13.7 مليار دولار بضايع خلال هذه الفترة، وبلغ إجمالي قيمة المفرج عنه منها 12 مليار دولار بما فيها سلع استراتيجية بـ 3.4 مليار دولار، ومستلزمات إنتاج وخامات بـ 5.4 مليار دولار، وأكثر من 39 ألف سيارة مستوردة بنحو 364 مليون دولار.
لكن في نفس الوقت بيان المرصد الإعلامي الجمركي مفسرش سبب تعطل الافراج عن السيارات المحتجزة من شهر ونص في المواني لكن لمح إن فيه عمليات تحايل من غير مايشرح لكن قال إن رجال الجمارك نجحوا بالتعاون مع الجهات المختصة في ضبط بعض وقائع التحايل بالعملية الاستيرادية، بعد ما لوحظ أن البعض بيسجل في بيانات الرقم التعريفي المبدئي للشحنات "ACID" أنه يريد استيراد قطع غيار وعربات سكة حديد بينما في الواقع تكون شحناته المستوردة سيارات ملاكي، وأنه يطلب تعديل البيانات الجمركية بالواردات بعد وصولها لاتمام عملية الإفراج عن هذه السيارات وطالما البيان قال بعض الوقائع ليه مدخلتش باقي الشحنات الاستيرادية من السيارات.
المهم حصلت الانفراجة وبدأ دخول السيارات السوق من تاني واكيد ده هيكون ليه تأثير مباشر على استقرار الأسعار ونزولها الفترة الجاية.
