لو أخدت قرض وعاوز ترجعه على طول أو تسدده مرة واحدة هيحصل إيه

أغلب الناس اللي بتاخد قروض بتكون مزنوقة وبتصادف إن الأمور بتتحسن وبتبقي مش محتاجة القرض وعاوزه ترجعه حتى بعد ماصرفته بيوم واحد أو عاوزة تسدد اللي باقي منه لو عدت فترة مرة واحدة.. البنك ساعتها هيكون موقفه إيه وليه هتكون انت الخسران .. تعالي نقولك ليه

وضعك قبل القرض غير وضعك لما تصرفه وتقبضه لانك بمجرد ما تمضي على الأوراق وتصرف الفلوس البنك كده بيعد عليك واعتبره استثمار بالنسبة ليه لأنه في النهاية هو بيشغل الفلوس دي وياخد مكسب اللي هو الفايدة مقابل يفك زنقتك أو يديك الفرصة تعمل مشروعك لكن في أوقات كتير اللي اخد القرض بيفكر يرجعه أو يسدده .
لكن في الحالة دي ولو هترجع القرض اللي أخدته بعد ساعة أو يوم أو ربع أو نص المدة فأنت كده حطيت نفسك في موقف صعب لأنك هتدفع غرامة كبيرة لأن البنك عاوز يكسب من الفلوس اللي صرفهالك وهنا بتوقع في فخ غرامة السداد المبكر للقرض والبنك بياخد غرامة السداد المبكر دي نظير الخسارة اللي هيخسرها من الفايدة اللي كنت هتدفعله ودي قوانين البنوك.

وعامة غرامة السداد المبكر للقرض بتختلف حسب شروط كل بنك وحسب نوع القرض وحسب قيمة المبلغ اللي باقي عليك  وعادة فيه 3 طرق مختلفة البنك بيحسب من خلالها قيمة رسوم غرامة الدفع المسبق أولها تكاليف الفايدة وإذا كان القرض الخاص بيك يفرض غرامة على السداد المبكر بناءً على الفايدة ، هنا البنك بيحسب الرسوم على أساس الفايدة اللي كنت هتدفعها على مدار كامل مدة القرض.
تاني طريقة البنك بيحسب بيها غرامة السداد المبكر هي نسبة الرصيد وهنا بعض البنوك بستخدموا نسبة مئوية من المبلغ المتبقي على القرض لتحديد رسوم العقوبة ودي طريقة شايعة لحساب رسوم غرامة السداد المسبق للرهن العقاري مثلا.
أما الطريقة التالتة اللي بعض البنوك بيستخدموها لحساب الغرامة فهي طريقةال رسوم الثابتة بغض النظر عن وقت سداد القرض وأي وقت تروح للبنك وتقوله عاوز اسدد بدري هيقولك ادفع كذا سواء مر يوم أو شهر أو حتي 90% من مدة القرض.

طيب إزاي تتجنب عقوبة الدفع المسبق.. شوف حضرتك أسهل طريقة لتجنبها هي الحصول على قرض أو رهن عقاري دون دفع غرامات مسبقة وعشان كده لازم تبص في الورق اللي قدامك كويس لأن غالبا موظف البنك مش هيقولك عشان مايخوفكش ويخليك تمضي على الورق. وفيه طريقة تانية عشان ماتدفعش وهي إنك تتفاوض مع البنك واللي ممكن يخدمك ويعرض عليك فرصة لسداد قرضك في أقرب وقت من تاريخ الاستحقاق النهائي وتجنب الغرامة ولو لقيت الغرامة كبيرة يبقي توفر فلوسك وتسدد القرض في معاده.