لو بتفكر تتجوز ولا تجهز شقتك من الأجهزة الكهربائية شوف الوقت المناسب للشراء
![الأجهزة الكهربائية]( /UploadCache/libfiles/5/5/600x338o/963.jpg)
المبادرات اللي عملتها الدولة لتخفيض الأسعار بدأت تجيب نتائج ونتائجها وضعت في أغلب السلع اللي المواطن بيشتريها بشكل يومي وكمان وصلت للأجهزة الكهربائية وخصوصا اننا داخلين على فصل الصيف يا تري معدل الانخفاض في أسعار الأجهزة الكهربائية وصل لكام.. وانا لو عايز اشتري أجهزة كهربائية اشتري دلوقتي ولا أصبر شوية.. اقرأ هذا التقرير للآخر
علي مدار شهور طويلة، مصر كانت بتعاني من وجود سعرين للدولار في السوق وبالتالى كان كل تاجر بيبع علي مزاجه وعلي حسب تسعيرته، ومكنش في ضوابط ولا رابط ولا رقابة ولا اي حاجة علي الأسعار.
لكن بعد الإصلاحات الاقتصادية الالي الحكومة عملتها وخصوصا في ملف وجود سعرين للدولار في مصر واللي انتهت معاها وجود السوق السوداء في التجارة وبيع العملات الأجنبية، وبعد ما الدولار بقي متوفر وموجوز وبشكل رسمي قدام التجار والموردين والمستثمرين حاليا مصر مش عندها اي أزمة خالص في الدولار.
الإصلاحات الاقتصادية اللي الحكومة عملتها كان لازم يكون معاها خطوات لتصحيح مسار الأسواق وتعديل الأسعار خصوصاً أن الدولار هو هو أهم وأكبر مشكلة مع التجار للاستيراد واللي حاليا بقي متوفر وموجود وبسعر أقل من سعر السوق السوداء اللي كانوا شغالين عليه قبل الإصلاحات الاقتصادية، ومن هنا الحكومة طالبت جميع التجار بالاعلان والالتزام بمبادرة تخفيض للأسعار لأن الحكومة هيا كمان اللي هتراقب علي تنفيذها والالتزام بيها، وفعلا الدولة بدأت تنفيذ قراراتها والأسعار نزلت بشكل كبير وبقي في رقابة والمواطن بدأ يحس بكده .
الانخفاض في الأسعار حاليا طال كل حاجة وواحدة من أهم الحاجات دي هيا الأجهزة الكهربائية واللي كانت واحدة من أهم مشاكل الناس خصوصاً أنها محتاجة ارقام كبيرة علشان تفرش أو تجهز بيتك أو عندك عروسة عايز تجهزها علشان فرحها قرب، ده غير انتا داخلين على فصل الصيف واللي أغلبنا بيحتاج يشتري أجهزة كهربائية جديدة زي المراوح والتكييفات والثلاجات علشان تكون وسيلة لتخفيض حرارة الجو .
طيب السؤال الأهم دلوقتي ننزل نشتري أجهزة كهربائية ولا نستني شوية يمكن الأسعار تنزل عن كده الأيام اللي جاية؟.
علشان نكون عارفين أن أسعار الأجهزة الكهربائية في الأسواق انخفضت بمعدل أكثر من 30% ولسه النزول مستمر خصوصا أن المعروض من الأجهزة بالأسواق بقي كتير ومتاح ومتوفر خصوصاً أن أي مستورد عايز يقدر يشتري أجهزة أو اي حاجة هو شايف أن السوق محتاجها أو هتمشي معاه في السوق بمنتهى السهولة ومش هيكون عنده اي مشكلة في توفير الدولا اللي هيحتاجه للاستيراد.
خبراء شعبة الأجهزة الكهربائية نصحوا المواطنين اللي عايزين ينزلوا يشتروا الأجهزة الكهربائية زي المراوح والتكييفات والثلاجات والغسالات بالتاني في الشراء في الوقت الحالي خصوصاً أن الأسعار مرشحة للانخفاض أكثر في الأيام اللي جاية بسبب إستمرار معدلات استقرار صرف الدولار في مصر، ده غير أن في إقبال كبير من الناس علي شراء الأجهزة الكهربائية حاليا قبل دخول فصل الصيف وبالتالي في ارتفاع في الأسعار عن الاسعار الحقيقة للأجهزة، وفي الفترة اللي جاية هيكون في انخفاض أكثر في الأسعار مع إستمرار التدفقات النقدية الأجنبية اللي بتدخل للبلد من الاستثمارات والتعاقدات اللي الدولة بتقوم بيها كل يوم وبالتالي مش هيكون عندنا اي مشكلة في توفير النقد ده غير جهود الدولة في تشجيع المنتج المحلي والمصانع اللي الدولة كل يوم بتفتحها في كل محافظات الجمهورية واللي هتكون لها فائدة كبيرة في تشجيع التصدير وتقليل فاتورة الاستيراد وبالتالى إنخفاض الطلب على الدولار وتقليل الأسعار.