بعد قرار الفيدرالي.. مصير الدهب والدولار فى مصر ؟
يا ترى ايه اللى هيحصل فى مصر بعد قرار الفيدرالى الامريكي بتثبيت أسعار الفايدة؟ وايه مصير الدولار والدهب الفترة الجاية ؟ وهل الاسعار ممكن تتأثر بقرار الفيدرالي ولا الدنيا هتمشي ازاى؟
في الساعات الأخيرة أبقى بنك الاحتياطي الفيدراليعلى أسعار الفائدة دون تغيير في اجتماعه السابع على التوالي، وقرر مرة تانية عدم خفضها مع استمراره في معركته مع التضخم.
ووتوقع المركزي الأمريكي خفض اسعار الفايدة لمرة وحيدة في 2024 مشيرا الى أن الاقتصاد الأمريكي بيواصل النمو بوتيرة قوية وسوق الوظائف لا تزال قوية أيضا ومعدل البطالة ما زال بطيئ.
طب يا ترى ايه تأثير قرار الفيدرالى على مصر؟
زي ما قولنا لحضراتكم كتير قبل كده العالم بقى قرية صغيرة بالفعل واى حدث فى العالم بيكون ليه تاثير على باقي الدول ما بالك بحدث فى اكبر دولة زي الولايات المتحدة ومتوقع بعد تثبيت الفايدة استقرار سوق الدهب بعد ما كان فيه توقعات بارتفاعه مع بدء خفض الفائدة الامريكية لكن الكلام اللى اتقال عن تخفيض الفايدة مرة واحدة بس خلا الدنيا تهدا والسعر العالمي للدهب يتراجع حاجات بسيطة وفيه توقعات بانه هيستقر لفترة الى حين الاعلان عن خفض الفائدة بشكل رسمي.
طب والدولار رايح على فين؟
وفقا لتقرير صادر عن بنك جولدمان ساكس فتحسن التدفقات إلى سوق الصرف من عوائد صفقة رأس الحكمة وتحويلات العاملين في الخارج وتحويل الدولار إلى العملة المحلية، خفف قيود العرض في السوق إلى حد كبير، وما بقاش فيه حاجة للتدخل على جانب العرض لدعم الجنيه في ظل الظروف دي
وأكد البنك الأمريكي ان استمرار الوضع ده فى مصر هيؤدي الى انخفاض قيمة الدولار وارتفاع الجنيه فى سوق صرف العملات فى ظل توقعات بمزيد من التدفقات الدولارية لمصر خلال الشهور الجاية .. وقال انه مش بيتوقع اصدار مصر أدوات ديون خارجية في الربع التالت من 2024 على الرغم من أن ده يظل خيار مطروح وفقا لوزارة المالية وهيخضع لسياسات الاقتراض اللي سيعتمدها وزير المالية القادم عقب الانتهاء من التعديل الوزاري الجاري.
طب هل كل ده ممكن يكون ليه تاثير على اسعار السلع فى مصر ؟
الاسعار فى مصر مرتبطة أكتر بالدولار وبالاجراءات الحكومية اللى بتتاخد لضبط الأسواق وعشان كده تأثير قرار الفيدرالى على السوق فى مصر بيكون محدود أوي والاهم هو التحركات اللى بتعملها الدولة لمنع الاحتكار والمضاربة فى اسعار السلع وكمان مزيد من الخفض فى سعر الدولار خصوصا ان معظم السلع بيتم استيرادها من الخارج
