ضربة السيسي الكبرى.. تأمين احتياجات مصر ورسالة للخارج

يا ترى ازاى مصر نجحت فى زيادة حجم الاحتياطي النقدي فى البنك المركزي لأعلى مستوى على الاطلاق؟ وازاى تدخل السيسي فى الملف ده أمن احتياجات مصر ؟ وايه تاثير اللى حصل على تدفق الاستثمارات الأجنبية ؟ وازاى ممكن يأثر على سوق صرف العملات الأجنبية؟

في إشارة واضحة على نجاح إجراءات الإصلاح النقدي والاقتصادي اللي تم تبنيها مؤخرا وبداية تحقق الثمار المرجوة ارتفع صافى الاحتياطات الأجنبية لمصر بقيمة 5.125 مليار دولار، وفقًا للبنك المركزي المصري.

وكشف المركزي  أن صافي الاحتياطات الأجنبية وصل إلى 46.125 مليار دولار بنهاية شهر مايو مقارنة بـ41 مليار دولار بنهاية شهر أبريل2024.. وده أعلى مستوى وصل ليه حجم الاحتياطي النقدي فى تاريخ مصر.

وعشان نعرف أهمية الرقم اللى تم الاعلان عنه لازم نقارنه بمستوى صافي الاحتياطيات الدولية واللي بلغ حوالي33.2 مليار دولار في يوليو2022 أي بارتفاع حوالى 12.9 مليار دولار، بنسبة ارتفاع تبلغ حوالى 40% .

وعشان نعرف اكتر قيمة الارتفاع اللى حصل فى الاحتياطي النقدي فالرقم الجديد يكفي لتغطية حوالي 8 شهور من الواردات السلعية وده بيؤمن احتياجات مصرلفترة تتجاوز بشكل كبير المستويات المتعارف عليها دوليا كمستويات آمنة.

وزيما احنا عارفين  احتياطي النقد الأجنبي بيمثل أهم عوامل التأمين ضد الصدمات الخارجية وده بيعزز من الثقة في الاقتصاد المصري كمان هو واحد من أهم المؤشرات اللي بتاخدها وكالات التصنيف الائتماني في اعتبارها عند تقييم مخاطر الدول.

وبتستورد مصر بحوالى 5 مليار دولار شهريا من السلع والمنتجات من الخارج بإجمالي سنوي يُقدر بأكتر من 55 مليار دولار، ما يعني أن متوسط الاحتياطي الحالي من النقد الأجنبي يغطي حوالى 8 شهور من واردات مصر السلعية وهو أعلى من المتوسط العالمي البالغ نحو 3 شهور وده بيضمن احتياجات مصر من السلع الأساسية والاستراتيجية.

وايه اللى حصل خلا الاحتياطي يزيدبالشكل الكبير ده ؟

الرئيس السيسي اتحرك بقوة فى ملف ازمة نقص العملة ونجح فى ابرام واحدة من اكبر الصفقات الاستثمارية مع دولة الامارات والخاصة بمنطقة راس الحكمة واللى وصلت قيمتها الى 35 مليار دولار وده زود ثقة المؤسسات الدولية فى الاقتصاد المصري وخلا صندوق النقد يوافق على رفع قيمة القرض المقدم لمصر من 3 الى 8مليار دولار بالاضافة الى تدفقات نقدية دولارية من البنك الدولي ومن الاتحاد الاوربي ومؤسسات تمويل تانية كتير.

طب الاحتياطي النقدي ده بيتكون من ايه ؟

بيتكوّن الاحتياطي النقدي لمصر من احتياطي الدولة من الذهب، وعوائد قناة السويس، وحصيلة الصادرات، وتحويلات المصريين العاملين بالخارج.

ممكن حد يسأل ويقول هو الاحتياطي النقدي بيجي منين وازاى بتستفاد منه الدولة؟
الاحتياطي النقدي بيتكون لما كل اللي بيخرج من مصر وكل اللي بيخش مصر من عملة الفرق بينهم يطلع.. ولو كان الفرق بينهم زيادة في العملة مش نقص فدا بيكون عندي «حصالة» فلوس واللي بتتسمى «احتياطي نقدي».
حلو اوى.. طبعا هاتسأل تاني وتقول.. طيب واية اللي بنستفيده من كده؟ وهل الدولة بتحط الاحتياطي كدا على جنب  وماتستفادش منه  بحاجة؟
لأ طبعا في إفادة.. وهي أن الدول بتستثمر في الفلوس الاحتياطية دي في مشاريع سريعة الربحية.. يعني ماينفعش تستثمره في العقارات مثلا علشان الأرباح بتتأخر.. امال اية... الفلوس دي الدول بتشغلها برة في بنوك أوربا مثلا لو كان العائد عليها كبير وممكن تشتري بيه كمان أسهم وسندات وتستفيد من نسبة الفايدة اللي بتقدمها المصارف العالمية.
بس كدا.. هي دي كل مميزات الاحتياطي النقدي؟
لأ طبعا لسه في مميزات تانية مهمة، وهو أن الاحتياطي دا بيحافظ على أموال المودعين.. يعني لو لا قدر الله بنك من البنوك تعرض لأزمة أو سرقة مثلا.. فالبنك المركزي للدولة بيروح بسرعة مقدم فلوس من الاحتياطي النقدي علشان فلوس المودعين ماتروحش.
ولازم نكون عارفين أن الاحتياطي النقدي دا بيكون له دور  مهم جدا في الاقتصاد القومي،  وأي دولة بتحدد عليه قرارات وسياسات اقتصادية مهمة، لأنه بمثابة معيار لقوة أو ضعف الدولة اقتصاديا سواء على الصعيد الدولي أو الإقليمي 
يعني لو كان حجم الاحتياطي النقدي لأي دولة عالي فبتكون الدولة قادرة علي انها تدبر اتفاقيات للاقتراض من المؤسسات الدولية والإقليمية طالما هي عندها احتياطي نقدي قوي، وكمان بيمثل ضمانة للدولة أمام الجهات والمؤسسات دي.. مصدر ثقة يعني