اعرف مرتبك هيوصل لكام مع تطبيق الزيادات الجديدة في الأجور يوليو المقبل (فيديو)
كل الناس حاليا بتحسب المرتبات هتزيد كام، وهل هتكون زيادة ثابتة ولا وفقا للدرجات.. ومرتبي بعد الزيادة الجديدة هيوصل لكام.
من فترة مش بعيدة وزي ما اتعودنا من القيادة السياسية واللي أثبتت أكثر من مرة انها في صف المواطن البسيط علشان تسانده في وقت الأزمة والمساعدة دي بتكون عبارة عن زيادة في المرتبات والمعاشات والمنح اللي بتقدمها الحكومة للناس زي منح تكافل وكرامة ومنح العمالة غير المنتظمة وغيرها من المنح اللي بتقدمها الحكومة للفئات المحدودة والمتوسطة الدخل .
التكليفات اللي اصدرها الرئيس عبدالفتاح السيسي الحكومة بدأت تترجمها علي الورق علشان تحدد الزيادات الجديدة في المرتبات هتوصل لكام، وفعلا رئيس مجلس الوزراء وجه الوزارات المعنية من وزارات التخطيط والمالية بوضع تصور للحزمة الأجتماعية الجديدة، وتحديد نسب الزيادة علي المرتبات.
طيب الزيادات الجديدة في المرتبات هتوصل لكام، وامتي هتبدأ تنزل للموظفين؟.
التفاصيل دي كلها وزير المالية أحمد كجوك أعلنها، واللي قالت أن مرتباتت العاملين بالجهاز الأداري للدولة والمعاشات هتشهد زيادات جديدة بداية من شهر يوليو اللي جاي، علشان تكون مع بداية العام المالي الجديد واللي بيبدا في يوليو من كل سنة .
الخطة اللي اقرتها الحكومة لزيادة الأجور واللي بتهدف لتخفيف الأعباء عن المواطنين بتمشل علي زيادة العلاوة الدورية بنسبة ١٠٪ للمخاطبين بقانون الخدمة المدنية و١٥٪ لغير المخاطبين بحد أدنى ١٥٠ جنيهًا شهريًا، زيادة علاوة غلاء المعيشة من ٦٠٠ جنيه إلى ألف جنيه، وزيادة الحافز الإضافي ٣٠٠ جنيه لكل الدرجات الوظيفية من الدرجة السادسة لحد الدرجة الممتازة .
ومع بداية تطبيق الخطة الحكومية الجديدة هيتم رفع الحد الأدنى للأجور لـ٧ آلاف جنيه شهريا بدلا من 6 الاف جنية، واللي هيا الحد الأدني للأجور في الوقت اللي فات وأقل درجة وظيفية هتزيد من العلاوات الجديدة لـ ١١٠٠ جنيه في إجمالي الأجر شهريا .
مش كده بس لا ده كمان مشروع موازنة العام المالى الجديد ٢٠٢٥/ ٢٠٢٦، بيتضمن زيادة مخصصات الأجور بنسبة ١٨,١٪ علشان توصل لـ ٦٧٩,١ مليار جنيه لاستيعاب الزيادات الجديدة واللي هيبدأ تطبيقها مع بداية شهر يوليو اللي جاي، والحكومة أكدت أنها هتوفر المخصصات المالية الكافية لضمان القدرة على تعيين أكثر من ٧٥ ألف معلم و٣٠ ألف طبيب و١٠ آلاف بباقي أجهزة الدولة ضمن الوظايف اللي اعلنت عنها الوزارات والجهات العاملة في الدولة، واللي اعلن عنها بواسطة الجهاز المركزي للتنظيم والإدارة خصوصا في قطاعات التربية والتعليم لسد العجز اللي موجود في اغلب المدارس بمختلف انواعها علي مستوي الجمهورية، وده بالتزامن مع الزيادات الكبيرة اللي قامت بيها الدولة لبناء والتوسع في بناء المدارس، لاستيعاب الزيادات الكبيرة في اعداد الطلاب، وكمان لتشغيل المدارس الجديدة اللي اضافتها الدولة للعملية التعليمية في مصر.
