لو بتجهيزي نفسك.. اصبري شوية مفاجأة أسعار الأجهزة المنزلية

 
على وش جواز وبتجهزي شقتك من الاجهزة المنزلية والكهربائية.. شوفي الفيديو ده عشان تعرفي الأسعار رايحة على فين الأيام الجاية وامتي تشتري

كل التوقعات بتقول إن فيه مفاجآت سارة في الايام القليلة الجاية في أسواق كتير وتحديدا سوق الأجهزة الكهربائية والمنزلية وهي إن الاسعار هتنزل بشكل كبير ودا اللي قاله تجار وخبراء صناعة الأجهزة الكهربائية والمنزلية في مصر.
طيب ليه الأسعار هتنزل؟
السؤال دا جاوبت عليه رسميا شعبة الأجهزة المنزلية باتحاد الصناعات المصرية، واللي قالت إن الفترة الحالية بتشهد زيادة ملحوظة في المعروض من الأجهزة المنزلية في الأسواق نتيجة الإفراج عن البضائع اللي تكدست خلال الشهور الأخيرة في الجمارك، بخلاف بدء استلام بضايع ضمن أول دورة استيرادية بعد تحرير سعر الصرف مارس اللي فات والدورة الاستيرادية دي عشان نحطك في الصورة عبارة عن الوقت اللي بياخده المصدر من أول مايوفر الدولا ويتعاقد وتبدأ عملية الشحن والوصول للمواني المصرية ودي بتاخد حوالي 3 شهور وزي ما احنا عارفين كل عمليات الاستيراد بدأت بعد تعويم الجنيه وتوفير الدولار في مارس ولأن لسه الدورة الاستيرادية مخلصتش فده معناه ان البضايع هتبدأ هتهل على المواني على اخر الشهر ده وساعتها الأسعار هتنزل بشكل كبير.
طيب نسبة التخفيض هتكون قد إيه على الأجهزة المنزلية والكهربائية؟
التوقعات اللي قالتها الشعبة بتقول إنها هتنزل خلال أيام مابين 5 و10% وعلى أخر الشهر بعد اكتمال الدورة الاستيرادية هتنزل مرة تانية بشكل أكبر من كده وفيه كلام إن اجمالي التخفيضات هيترواح مابين 25 و30% وبعدها هيستمر الانخفاض لغاية الوصول لحالة الاتزان الطبيعي في الاسعار.

الغريبة إن الشعبة كشفت عن مفاجأة كبيرة حصلت في سوق الأجهزة الكهربائية والمنزلية ومحدش خد باله منها وهي إن المصانع مرفعتش الاسعار لكن التجار الكبار والوسطاء هما اللي رفعوها وكمان اخترعو الأوفر برايس على عدد كبير من الأجهزة وده سبب الارتفاع الكبير في الأسعار الفترة اللي فاتت لكن حاليا اختفي الأوفربرايس أو الزيادت الكبيرة اللي فرضها التجار على الأجهزة بعد الانفراجة في الدولار وتوافر المعروض وانتظار شحنات الاستيراد الجيددة.

كمان التوقعات بتقول إن الفترة الجاية هيكون فيه انتعاشة كبيرة في حركة السوق والمبيعات خفض الأسعار بالتزامن مع استجابة المصانع لمبادرة خفض الأسعار وزيادة المعروض من السلع بعد حالة الركود الكبيرة اللي حصلت في الشهور اللي فاتت واللي الكل فيها طلع الخسران بداية من المواطن واصحاب المصانع  والتجار اللي رفعوا الاسعار بشكل جنوني.