بعد تثبيت الفايدة.. أفضل أنواع الاستثمار اللي هتشغل فلوسك
ياترى إيه هو الاستثمار الأمثل دلوقتي بعد ما البنك المركزي ثبت الفايدة.. وإزاي اختار نوع الاستثمار اللي أشغل فيه فلوسي ومدخراتي.. وإيه أنسب الأوقات اللي تشغل فيها الفلوس.. تعالوا نشوف التفاصيل في التقرير ده.
زي ما اتوقعنا هنا في بانكير إن البنك المركزي هيثبت الفايدة في اجتماعه الخميس اللي فات وفعلا ده حصل ومع قرار التثبيت ناس كتير فكرت إيه هو الاستثمار المثالي خاصة إن البنوك ماطرحتش شهادات استثمار أكبر من اللي موجودة وحتي الموجودة البنوك بتفكر تقلل نسبة الفايدة فيها حسب ما أعلن مسئولين في بنك مصر والاهلي..
خبراء الاقتصاد شايفين إن ده الوقت المناسب لأي حد معاه فلوس زيادة وعاوز يستثمرها إنه يحطها في حاجتين الأول الدهب وبعديها المشروعات الخاصة وهنقولكم ليه.. أول حاجة سوق الدهب دلوقتي مثالي للاستثمار لأن الاسعار بتنزل عالميا ومحليا في الفترة دي وإن التوقعات بتقول الدهب على نهاية 2024 هيضاعف سعره ودا لأسباب عالمية وظروف الاقتصاد الدولي والأزمات الدولية والعرض والطلب والتوترات اللي لسه مستمرة في مناطق كيتر في العالم غير تصاعد الصراع التجاري بين الصين وروسيا من ناحية وبين الولاايات المتحدة والغرب من الناحية التانية.
نيجي بقى للاستثمار التاني وهو عمل مشروع خاص.. ودي أفضل أنواع الاستثمار دلوقتي لان المناخ العام للاستمثار الخاص في مصر بقي مثالي دلوقتي والدولة بتشجع كل اصحاب المشروعات الخاصة دلوقتي وبتوفرلهم كل الدعم والمساندة ده غير تعدد الأنشطة اللي ممكن يتعمل فيها أي مشروع بخلاف استقرار الأسواق كلها واسعار مواد الخام اللي بدأت تنزل بعد تعويم الجنيه وصفقة راس الحكمة واختفاء السوق السود والمضاربة على الدولار.
وميزة المشروع الخاص إنك بتستثمر فلوسك بنفسك وبتشرف عليها وبتقدر عوامل الخطرو بيكون عندك رؤية عشان تكبر مشروعك وفي نفس الوقت بتحصل على أرباح يومية أو شهرية زي ما انت عاوز ومن مميزات الاستثمار في المشروعات الخاصة إنك بتوفر ليك ولغيرك فرصة عمل وفي نفس الوقت انت بتكسب خبرات كتيرة هتشاعدك بعدين في توسيع النشاط واللي هيتحول من مشروع صغير لكيان كبير وفجأة ممكن تلاقي نفسك رجل أعمال كبير والورشة الصغيرة هتبقي مصنع والمصنع يبقي مجموعة وكيان اقتصادي كبير ودي أهم ميزة في العمل الحر والمشروعات الخاصة في استثمار الفلوس وتشغيلها بأفضل وجه ممكن ده غير إنه مش هيكون عليك ضغط وأعصاب لو استثمرتها في الدهب مثلا وانت بتابع السوق شوية فوق وشوية تحت ومتعرفش هتبيع امتي ولا تشتري امتي.
