قبل قرار المركزي.. أنسب ظروف تستثمر فيها وانت مطمن في الدهب
خلاص باقي ساعات ويتحدد مصير سعر الدهب في الصاغة وهتعرف امتي تشتري وتبيع وأنسب الاوقات عشان تستثمر صح.. ايه اللي هيحصل بكرة وليه لازم تستني تشوف القرار.. هنعرف كل حاجة في التفاصيل اللي في الفيديو.
سوق الدهب في مصر من أكتر الاسواق حيوية ونشاط وكمان ثبت بالدليل إنه أفضل سوق للاستثمار المربح وإنه عمر الرهان عليه ما خاب أبدا وعشان كده بقي في اهتمام كبير من المصريين والمقيمين كمان على الاستثمار في المعدن الاصفر وتحري افضل أوقات البيع والشراء ومتابعة حال السوق المصري والعالمي وباقي الأسباب اللي بتغير في سعره.
والدهب زي ما احنا عارفين وقلنا قبل كده هنا في بانكير كتير هو سوق حساس لاي متغيرات اقتصادية سلبية أو ظروف دولية غير مواتية زي الصرعاات السياسية والأمنية وزي الكوارث الطبيعية والاوبئة العالمية وبردوا الدهب بيتفاعل بسرعة البرق مع أي تغير في سعر الفايدة وسعر الدولار والعملات والتوتارات في سوق المال وقبل قرارات مجلس الاحتياطي الفدرالي.
وفي مصر سعر الدهب بيتحكم فيه عامل مهم جدا وهو العرض والطلب وده بيحدد المصريين نفسهم يعني في الأعياد والمناسبات الزحمة بتزيد على الصاغة وفي الأزمات كمان الناس بتشتري دهب لأنه بالنسبة لهم أمان ليهم ولفلوسهم ولأن قيمته بتزيد مش بتقل.
طيب بردو مقلناش ايه اللي هيحصل بكرة عشان ده كله.. شوف ياسيدي بكرة لجنة السياسة النقدية بالبنك المركزي هتجتمع لتحديد أسعار الفايدة الرئيسية على الاقراض والايداع وده معناه تأثير مباشر على اسعار الدهب.. ليه بقي .. لأنه ببساطة لو المركزي خفض الفايدة وده توقع من التوقعات لكتير من خبراء الاقتصاد فدا معناه الناس مش هستثمر في البنوك بشكل كبير وهتشغل فلوسها في أنواع تانية من الاستثمار زي الدهب مثلا وهنا سعر المعدن النفيس بيزيد لأن حركة السوق ورأس المال بتتحرك من البنوك للصاغة عشان مكسبه بيكون أعلى من نسبة الفايدة اللي في البنوك والعكس صحيح لو المركزي رفع اسعار الفايدة على الجنيه يبقي الدهب سعره هينزل لأن الناس هتختار إنها تحط مدخراتها وفلوسها في البنوك عشان تاخد فايدة كبيرة من غير أي تعب ولا مجهود وفي نفس الوقت أمان لأن الفلوس في ضمان البنك.
وفيه كمان حاجة تانية لازم تخلي بالك منها وانت رايح تشتري أو تستثمر في الدهب وهي إنك تعرف خريطة التوقعات عالميا رايحة على فين وليه مثلا كل المؤسسات المالية العالمية بتقول إن الدهب هيوصل لمستويات قياسية على أخر السنة وده لأن الاسعار العالمية بتأثر بردوا في الصاغة المصرية بجانب سعر الدولار عشان تجار الدهب اللي بيستوردوا المعدن الأصفر.
