لأول مرة.. بنك مصري يطلق فيزا ائتمانية بالدولار.. شوف ايه الحكاية (فيديو)
البنوك بتحاول بكل الطرق ترضي عملاءها بس المرة دي الخدمة جديدة أول مرة تحصل أن بنك يقدمها للعملاء.. ياترى ايه هيا الخدمة دي.. واية هدف البنك منها وليه طرحها في التوقيت ده.
خدمات كتيرة ملهاش أول من اخر بتقدمها البنوك لعملائها بهدف نيل رضائهم، وتوسيع دائرة تعاملاته مع اكبر عدد من العملاء، والخدمات دي بتكون عبارة عن تسهيلات كتيرة في السحب والإيداع والحصول علي القروض والضمانات المطلوبة من العملاء، وغيرها من الخدمات اللي قعدنا نعد فيها مش هنخلص.
طيب اية الخدمة الجديدة اللي البنوك قدمتها للعملاء وازاي العملاء يتسفادوا منها؟.
البنك الأهلي المصري اعلن عن إطلاق أول بطاقة فيزا ائتمانية بالدولار وده بالتعاون مع شركة فيزا، والهدف من الخدمة الجديدة هو تلبية احتياجات العملاء في معاملاتهم المالية داخل وخارج مصر بالعملة الأجنبية.
محمد الأتربي الرئيس التنفيذي للبنك الأهلي المصري قال أن بطاقة الفيزا الائتمانية الجديدة بالدولار هتساهم بشكل كبير في تلبية احتياجات العملاء المالية وقت الشراء بالعملة الأجنبية داخل مصر والمشتريات والسحب بالعملات الأجنبية خارج مصر.
طيب ازاي العملاء يقدروا يسخجروا البطاقات الأئتمانية الجديدة واية شروطها؟.
البنك الأهلي المصري حدد كمان شروط استخراج بطاقات الفيزا الائتمانية الجديدة واللي هتكون بالدولار، وقال أنها بتصدر وقت شراء الشهادات بالدولار، ده غير أن البنك بيتح إصدارها للعملاء أصحاب الشهادات بالدولار وبحد أدنى للبطاقة 2000 دولار وبحد أقصى 50 ألف دولار.
البنك الأهلي سمح كمان للعملاء إمكانية إجراء كل المعاملات المالية بالعملات الأجنبية خارج مصر من المشتريات والسحب النقدي الدولي والتسوق عبر الإنترنت، بالإضافة لرسوم إصدار وتجديد مميزة للبطاقة، والبنك كمان حدد فترة سماح للسداد بتوصل لـ 55 يوم بدون فوائد على المشتريات وبرنامج "Al Ahly Points" اللي بيتيح الحصول على 22 نقطة مع كل دولار العميل هيستخدمه، وكل هتدي ميزة جديدة لعملاء البنك الأهلي للشراء بالدولار وقت وجودهم خارج مصر، خصوصا أن الفترة اللي فاتت كانت الدولة حطت ضوابط للسحب النقدي من بطاقات الإئتمان خارج مصر وكان الهدف من القرار ده هو الحفاظ علي العملات الأجنبية في البلد.
