مفاجأة في برنامج بيع الشركات الحكومية.. شوف اللي بيحصل
![الدكتور مصطفى مدبولي]( /UploadCache/libfiles/5/4/600x338o/665.jpg)
ايه المفاجأة اللي كشفتها مؤسسات التمويل الدولية بخصوص برنامج الطروحات الحكومية وبيع الشركات الحكومية وازاي البرنامج ملهوش علاقة بتوفير الدولار أومال الحكومة بتبيع ليه.. خليكم معانا للآخر وهتعرفوا التفاصيل
زي ما احنا عارفين مصر قررت تصحيح مسار الاقتصاد بشكل كامل ووضعه على الطريق الصحيح في المنافسة وتحريره من كل قيوده والحماية السلبية وقررت مثلاً تعويم الجنيه وتحرير سعر صرف الدولار والعملات عشان تقضي على التشوهات والوضع الغلط في سوق الصرف والسعر يعبر عن القيمة الحقيقية للعملة المصرية عشان تعرف تدعمها زي ما بيحصل دلوقتي والدولار بدل ما كان ب70 جنيه نزل ل47 جنيه ولسه هينزل لأن الجنيه بيصعد وكل ما توفر دولار كل ما عملتك مابقي ليها قيمة أكبر.
ومن أهم خطوات الإصلاح الاقتصادي والمالي هو منح القطاع الخاص الفرصة الحقيقية والكاملة عشان ينطلق زي اي قطاع خاص في العالم هو اللي بيقود الاقتصاد وهو اللي بيتطور باستمرار وهو اللي بيتوسع في الإنتاج والتكنولوجيا الحديثة لأن قائم على فكرة النجاح والمكاسب الدائم ورجل الأعمال اللي معاه مصنع عاوز يحوله لمجموعة مصانع ويستعين بأحدث التكنولوجيا العالمية وبيوظف عدد أكبر من العاملين وكمان بيتوسع في التصدير لأن عنده عقيدة المكسب وتوسيع النشاط باستمرار وده اللي خلق الشركات العالمية المتخصصة والعملاقة في أوروبا وامريكا وبقت ميزانية شركة واحدة قد ميزانية قارة أفريقيا كلها زي شركة أبل الأمريكية على سبيل المثال واللي بتتعدى قيمتها السوقية 3 تريليون دولار لأنها شركة بتهدف للربح والانطلاق وفتح أسواق جديدة وابتكار التكنولوجيا وتخيل شركة زي ابل دي فيها كام موظف وغيرها من الشركات العالمية في كل المجالات على عكس الشركات الحكوميه مش في مصر بس. لكن في كل الدول اللي طبقت نظام القطاع العام والحكومي اغلب شركاتها بتخسر ولو مخسرتش مش بتتوسع وتزود نشاطها لأن معندهاش عقيدة التطور ومعندهاش ميزانيات تضخها في التطوير.
ليه بنتكلم عن القطاع الخاص دلوقتي.. عشان حضرتك المفهوم الغلط عن برنامج الطروحات الحكومية واللي الناس فاكرة أن الدولة بتبيع جزء من الشركات للقطاع الخاص عشان توفر دولار بس لكن ده مش حقيقي والحقيقة أن الدولة قررت تصحح الغلط وادي القطاع الخاص فرصته الطبيعية في قيادة الاقتصاد والانطلاق بيه وده اللي قالته مؤسسة التمويل الدولية لقارة أفريقيا، واللي أكدت أن فريق المؤسسة الدولية يؤمن بأن مصر لا تنفذ برنامج الطروحات الآن بسبب حاجتها للعملة الصعبة، لكن بتعمل كده في إطار رؤية مصرية قصيرة وطويلة الأجل لإصلاح الاقتصاد وزيادة مشاركة القطاع الخاص فيه وتأكيد الدكتور مصطفى مدبولى، رئيس مجلس الوزراء، إن مصر لديها رغبة حقيقية أن تمضى بأسرع ما يمكن لتوسيع مشاركة القطاع الخاص فى الاقتصاد.
وعلى فكرة مؤسسة التمويل الدولية دي كمان هي المستشار الاستراتيجى للحكومة المصرية وبتقدم المشورة الفنية حول برنامج الطروحات اللى بتتبناه الدول بهدف زيادة مساهمة القطاع الخاص فى النشاط الاقتصادى مش عشان توفر الدولار بس ولأن دي ضمن الالتزام بتنفيذ وثيقة سياسة ملكية الدولة، وزيادة مساهمة القطاع الخاص إلى 65% من إجمالى استثمارات الدولة خاصة في قطاعات الاقتصاد الحديث زي تكنولوجيا المعلومات والاتصالات والبيانات.