الدهب رايح على فين قبل قرار المركزي وبعد وقف مبادرة الاستيراد المجاني

 
الدهب بقي لغز طالع نازل ومحدش عارف السوق رايح على فين.. احنا في بانكير هنقولك مصير الدهب في الأيام الجاية وايه تأثير قرار المركزي اللي جاي على الأسعار وكمان تأثير انتهاء مبادرة دهب المغتربين على المدى البعيد.. لو عاوز تستثمر في المعدن اللي ما بيخسرش شوف الفيديو ده للآخر .

 
كلنا متابعين أسعار الدهب اليومين دول مرة فوق ومرة تحت لكن من غير مفاجآت وقفزات كبيرة وتقريبا عيار 21 الأشهر في مصر مستقر في حدود 3180 جنيه لكن الدهب بالذات يصعب عليه البقاء مستقر فترة طويلة بمعني إنه بيتأثر بسرعة بأي عوامل سلبية سواء عالمية أو محلية ودايما بيكون للقرارات الاقتصادية والسياسية تأثير مباشر على الأسعار في الصاغة.. وزي ما احنا عارفين وقلنا قبل كده إن الدهب حساس قدام عوامل كتيرة منها سعر صرف الدولار محليا والعرض والطلب وقرارات المركزي.
ولأن الدولار مستقر وكمان بينزل من فترة فده سبب رئيسي في موجة الانخفاض الأخيرة في السعر وبالنسبة للعرض والطلب فالسوق تقريبا متوازن بمعني مفيش طلب كبير او معروض اكبر وده سبب تاني على الاستقرار الحالي لكن عالميا فيه حالة من عدم الاستقرار ومثلا الأسعار زادت امبارح في الأسواق العالمية بسبب توقعات تخفيض بنك الاحتياطي الفيدرالي الأمريكي لسعر الفائدة على الدولار واي هبوط في العملة الخضراء بيصاحبها ارتفاع مباشر في أسعار الدهب وكمان استمرار ووتيرة الصراعات السياسية والعسكرية الدولية بيكون ليها تأثير سلبي على الأسعار.
طيب نرجع لموضوعنا الدهب رايح على فين في الصاغة المصرية خاصة قبل قرار المركزي يوم 23 مايو الحالي واللي هيحسم مصير الفايدة.. عشان نبقي عارفين لو المركزي رفع سعر الفايدة يبقي ده هيكون ليه تأثير في انخفاض سعر الدهب لأن الناس هتحط فلوسها في البنوك عشان تستفيد من أسعار الفايدة العالية من ناحية ومن ناحية تانية هتريح دماغها من تقلبات الاستثمار في الدهب أو العقارات لأن نسب المخاطرة في حالة البنوك معدومة بجانب إن البنوك متوقع تطرح شهادات ادخار بأسعار فايدة اكبر من اللي موجوده عشان تجذب السيولة في الأسواق وتقللت التضخم أو ارتفاع الأسعار.
طيب لو حصل العكس والمركزي نزل سعر الفايدة.. يبقي في الحالة دي سعر الدهب هيزيد لأن الناس هتروح تشتري دهب وتستثمر فيه وبالتالي هيحصل زيادة في الطلب وده مع الارتفاع العالمي في الأسعار ولو المركزي ثبت الفايدة زي ماهي يبقي سوق الدهب هيستمر زي ماهو وهيبقي سعره مرهون بباقي العوامل اللي قلنا عليها.
كل ده معروف لكن إيه تأثير وقف مبادرة السماح بدخول الدهب بدون جمارك مع المغتربين.. عامة مفيش تأثير وقتي في السوق زي ما شفنا والمبادرة انتهت يوم الجمعة إللي فاتت واو فيه تأثير كبير كان ظهر لكن على المدى البعيد ممكن يكون ليها تأثير لأن نسبة المعروض هتقل والسوق فقط مورد غير مباشر لضخ المعدن الأصفر في الصاغة أو تخزينه في البيوت.
طيب امتي نشتري وامتي نبيع في الظروف دي.. شوف أنسب وقت للشراء هو دلوقتي لأن الأسعار في النازل وقبل قرار البنك الفدرالي الأمريكي بخفض أسعار الفايدة وقبل اي تقلبات كبيرة متوقعة واعلنتها مؤسسات عالمية واللي قالت إن الدهب هيشهد تقلبات كبيرة بسبب زيادة عمليات الشراء من البنوك المركزية المعدن الأصفر بشكل تاريخي للتحوط من خفض الفائدة وتقليل الاعتماد على الدولار في الاحتياطيات الدولية بالبنوك.