إيه الحالات المسموح بيها للكشف عن حسابات العملاء وإزاي تستعلم عن تركة المتوفي

 
معروف إن السرية في حسابات البنوك والأمان هي أهم حاجة بتخلي الناس تفتح حساب في البنك وهي مطمنة وإلا كانت شالت فلوسها في أي مكان تاني امتي البنك يكشف اسرار حسابات العميل بتاعه ولو العميل اتوفي إزاي تستعلم عن حساباته في البنوك كلها .. خليكم معانا هنشرح التفاصيل في الحالتين..
 
اولا لازم تتفق إن سرية حسابات البنوك مقدسة ومحصنة بالقانون ومفيش حد يقدر يطلع اي سر من أسرار حسابات العملاء لأن ده جريمة بيعاقب عليه القانون والبنك المركزي كمان.. لكن بردو فيه حالات معينة وقليلة اووي القانون ييسمح لجهات معينة ولاشخاص بالاطلاع على حسابات العملا وزي ما قلنا في الحالات دي بتكون باذن القانون.. 
ونصت المادة 140 من من قانون البنك المركزي المصري رقم 194 لسنة 2020 إن سرية جميع بيانات العملاء وحساباتهم وودائعهم وأماناتهم وخزائنهم في البنوك، بما في ذلك المعاملات المتعلقة بها تكون سرية تماما، وكمان نص على الحالات التي يجوز فيها رفع السرية عن حسابات العميل.

إيه هي طيب الحالات اللي البنك ممكن يكشف فيها حسابات العميل أو الكشف عن بيانات بطريق مباشر أو غير مباشرة.. أول حالة وهي اشهر واكتر حاجة بيكشف فيها البنك عن حساب العميل هي بناء على حكم قضائي أو حكم تحكيم أو من جهات قانونية وقضائية معينة لو الفلوس اللي في الحساب ليها علاقة بقضايا أموال عامة مثلا أو قضايا تمويل اعمال ارهابية مثلا او غسل أموال أو حصيلة تجارة غير مشروعة.
الحالة التانية هي وجود  إذن كتابي من صاحب الحساب أو الوديعة أو الأمانة أو الخزينة وهنا بيتعامل بناء على التوكيل الرسمي اللي معاه على إنه صاحب الحساب .

طيب لو العميل اتوفي إزاي يتم الكشف عن رصيد المتوفي في البنوك المصرية وهل الورثة هيلفوا كعب داير على كل البنوك اللي في مصر.. لأ طبعاً البنك المركزي والقانون نظم الموضوع ده لان القانون بياخد في الاعتبار إن المتوفي ممكن يكون عمل حساب من ورا الورثة أو مقالش لكل الورثة إنه عنده حسابات بنكية ولأن دا شرع ربنا فالقانون ألزم البنوك أنها تكشف للورثة عن حساباته إن وجدت.
واكيد طبعا فيه خطوات وإجراءات للكشف عن حسابات العميل المتوفي أولها إن الشخص اللي هيستعلم يكون من  أقارب المتوفى ومن الدرجة الأولى ووريث أو وكيل عنه بتوكيل رسمي وبيقدم طلب إلى البنك المركزي لمعرفة رصيد المتوفى لدى جميع البنوك... يعني المركزي هو اللي هيخاطب البنوك مش الورثة وده لأن المركزي هو اللي بيشرف على كل البنوك في مصر وعنده آلية مباشرة وسريعة للكشف عن الحسابات كلها في البنوك.
وبيتم  تقديم طلب للاستعلام عن أي حسابات في البنوك ودفع رسوم، والحصول على رد رسمي من البنك بالرصيد.
وأخيرا البنك المركزي بيبعت طلب استعلام لجميع البنوك في مصر، فتقوم البنوك بالرد على هذا الطلب.
وفي الغالب بيتم  الرد على العميل في نفس وقت تقديم الطلب، بدلًا من الانتظار لأشهر.

وبخصوص المستندات المطلوبة لمعرفة الرصيد البنكي للمتوفي فهي:
 ـ تقديم صورة إعلام الوراثة، أو صورة من توكيل يتضمن الكشف عن حسابات المتوفى لدى البنوك.
ـ صورة بطاقة تحقيق الشخصية الخاصة بالمتوفى، أو صورة شهادة الوفاة “مميكنة”.
– صورة بطاقة الرقم القومي، أو جواز سفر ساري، خاص بمقدم الطلب.
وعلي فكرة البنك المركزي، سبق وأشار في بيان ليه أن خدمة الاستعلام عن أرصدة المتوفي في  في إطار جهوده للتيسير على المواطنين، وميكنة وتبسيط الإجراءات، لضمان تقديم الخدمات العامة في أسرع وقت وبأقل مجهود.
واخيرا بيتم التقديم في مقر البنك المركزي بشارع الجمهورية بالدور الارضي من خلف المبني بشرط شهادة الوفاة ومن يقدم يكون احد الورثة ومعه بطاقة الرقم القومي واعلام الوراثة
..