نبوءة جاريث بايلي عن الاقتصاد المصري.. شوف المفاجأة وشوف قال إيه
يا ترى إيه اللي قاله السفير البريطاني في القاهرة وليه متحمس جدا لمستقبل الاقتصاد المصري وايه المفاجأة اللي أعلن عنها السفير.. تعالوا نشوف اللي حصل
من غير تفكير نقدر نقول إن صفقة رأس الحكمة كانت وش الخير على الاقتصاد المصري وعلى البلد وبنقول وش الخير لأنها فتحت الطريق بعدها لخير كتير جدا وفتحت الشرايين المسدودة وقضت على الأزمات وكتبت نهاية الاستغلال والاحتكار والسوق السودا والمضاربة، ومصر هتفضل مدينة لأشقائها اللي مدولها يد المساعدة في وقت الشدة ومصر هتفضل سندهم الكبير في الأزمات الخطيرة.
اللي حصل الأيام اللي فاتت بيقول إن مصر على بداية عهد اقتصادي جديد هترجع فيه لمسارها اللي كان قبل جائحة كورنا واللي كانت وقتها بتجري بسرعة الصاروخ.. وحققت أعلى معدلات نمو في العالم، وبيقول كمان إن صفقة راس الحكمة مكنتش هتيجي لولا إن مصر صمدت في وش العواصف وأكدت إن عندها اقتصاد صلب ومتين وحكومة قوية ورئيس مش بيخاف ولا بيتردد واعصابه حديد.
ليه بنتكلم عن الصفقات والظروف اللي كانت فيها مصر.. عشان زي ما قلنا مصر بدأت تجني ثمار صبرها وتحملها في الأزمات وكان أخرها امبارح لما وكالة فيتش عدلت نظرتها للاقتصاد المصري لنظرة إيجابية وقبل كده اتفاق صندوق النقد والتدفقات الدولارية وده كله بيقول إن مصر خلاص عدت عنق الزجاجة.
وبخصوص موضوعنا واللي قاله جاريث بايلي وده اللي مايعرفوش هو السفير البريطاني بالقاهرة، واللي كشف عن تحركات بريطانية للشراكة مع مصر في قطاعات اقتصادية وإن بريطانيا هتنزل السوق المصري بقوة وقال إن قريب جدا هيتم الإعلان عن دخول شركة بريطانية جديدة للاستثمار في قطاع الهيدروجين الأخضر في مصر وزي ما احنا عارفين الاستثمار في النوع ده بالذات بيكون بمليارات الدولارات، والسفير قال كمان إن الشركات البريطانية مهتمة حاليا وجدا بالاستثمار في قطاعات الطاقة النظيفة الجديدة والمتجددة، والنقل، والبنية التحتية المستدامة، والمدن المستدامة، وكذلك قطاع التعليم في مصر ولمح إن الاستثمارات هتكون ضخمة.
ومن بين اللي قاله السفير البريطاني وخلي بالك ده شخصية أوروبية رفيعة المستوي ولما يقول حاجة عن الاقتصاد المصري كده يبقي هو بيعمل دعاية وبيوجه دعوة للمستثمرين في أوروبا عشان يستثمروا في مصر.. المهم الراجل قال إن الاقتصاد المصري خلاص بيتعافى بشكل جيد جدا وبيشهد تحسن ضخم في وفرة الدولار وده هيدي المستثمرين الثقة في الاقتصاد، وإن السياحة البريطانية لمصر ماتأثرتش بهجمات البحر الأحمر الأخيرة.
وكمان جاريث قال إن خلاص مبقاش فيه مشكلة في تحويل أرباح الشركات البريطانية في مصر وإن الحكومة بدأت تصرف جزء من أرباح الشركات البريطانية في كل القطاعات الاقتصادية المختلفة وده هيشجع الشركات إنها توسع نشاطها في الفترة الجاية.
