عودة الوحش المصري.. شوف الجنيه هيبقى بكام قدام الدولار

ياترى الصراع الشرس بين الدولار والجنيه هينتهي على إيه وازاي الجنيه المصري صامد وهيرجع أقوى قدام الوحش الأخضر .. وهل ممكن الجنيه يضرب الدولار بالقاضية.. تعالووا نشوف إيه الحكاية

سنين طويلة والدولار بيكسب جولاته قدام الجنيه وده نتيجة العرض والطلب لكن الحقيقة قوة الدولار مش هي السبب في توحش العملة الأمريكية لكن السبب الحقيقي هو ضعف الجنيه وده انعكاس لحالة الاقتصاد اللي مصر كانت عايشة عليها من عشرات السنين وهي الاقتصاد الاستهلاكي وفكر الاستيراد وعدم التوسع والتطور وتعظيم موارد الدولة لغاية ما بدأت مصر بعد 2013 ووصول السيسي إنها تبدأ في تصحيح الخلل التاريخي بين الدولار والجنيه وتخليه لأول مرة ينافس بقوة وبشكل حقيقي وقيمة حقيقية من غير حماية..
لأول مرة الجنيه ييقف قدام الدولار بطوله من غير حماية ضرته أكتر ما نفعته وبقي يعكس حال السوق والسعر الحقيقي ودي كانت بداية تصحيح الخلل والتشوه المالي والاقتصادي .. طيب النهاردة اللي بيحصل ... طبعا بعد قرار المركزي التاريخي بتعويم الجينيه بدأت لأول مرة ملامح الاقتصاد تظهر وتكشف الوضع الحقيقي لنقاط الضعف والقوة وبالتالي الجكومةعرفت تتعامل مع السوق وترسم السياسات على معطيات سليمة والنتيجة إن أزمة الدولار بدأت تتحل من جذورها لأنه لأول مرة يتعامل معاها بشكل صحيح ومعلومات شفافة.
تعويم الجنيه كان السبب إن الأسواق ما حصلش فيها فوضى تاني لأن بقي فيه حالة اطمئنان من عدم حبس الدولار تاني وظهور السوق السودا وحدوث قفزات في السعر لكن الموضوع بقي محكومة بالعرض والطلب ومش مطلوب من لاحكومة دلوقتي غير إنها تزود المعروض من الدولار وضمان استمرارية تدفق العملة الخضراء وبكده تضمن إن الدولار سعره هيكون تحت السيطرة وإن الجنيه هيتعافي بقوة ويرجع زي زمان. 
وشفنا الجنيه بعد التعويم نزل ازاي من 73 جنيه في السوق السودا إلى 50 و49 و48 و47 جنيه في مدة قصيرة نتيجة إن سوق الصرف بقت تحكمه قوانين شفافة وحقيقية من غير أي تدخل.. التوقعات بتقول بقي إن طول ما فيه دولار كتير وطلب متوازن أو قليل طول ما الدولار سعره هينزل في السوق وطول ما الجنيه هيرفع تاني ويسترد عافيته وقوته الشرائية من تاني وهو ده الاقتصاد والمنافسة في العالم كله.. ويحسب للبنك المركزي وحكومة مدبولي الخطوة التاريخية لتصحيح الخلل في سعر الصرف لأنه كان الحل الصعب لكن كان هوالعلاج النهائي والضروري لعودة قوة الجنيه واللي بتقول لغة الأرقام والسوق إن هيرفع قدام الدولار لغاية حاجزال40 جنيه وممكن أقل من كده كمان وطول ما الدولة بتنتج وتصنع وتصدر وتستثمر طول ما زمن الدولار ما بينتهي وفي نفس الوقت الجنيه هيرجع تاني زي زمان.