الدولار بدأ رحلة السقوط.. ايه اللي حصل ونبوءة بانكير ليه اتحققت

ليه الدولار سعره نزل النهاردة ..وإيه علاقته باللي حصل امبارح.. وإيه مصير اسعار العملة الأمريكية قدام الجنيه في الفترة الجاية.. خليكم معانا وهنعرف ليه

مفيش ساعات على تقرير قدمه بانكير وقلنا فيه إن الدولار هيبدأ ينزل من بداية من تداولات الاثنين، ودا اللي حصل والحقيقة الموضوع ملهوش علاقة بالغيب ولا بنضرب الودع لكن ليه علاقة بتوقعات وأرقام وبيانات دقيقة وواحد زائد واحد بيساوي اتنين وامتي ممكن يساوي 11، وفعلا حصل وبدأ الدولار ينزل بشكل كبير النهاردة بين 25 و30 قرش .. طيب ده معناه إيه في سوق الصرف.. ببساطة كده ده معناه حاجتين مهمة جدا إن الدولار مقدرش يرفع تاني قدام الجنيه ومعناه في نفس الوقت إن الدولار فضل ثابت قدام الجنيه وأخيرا الدولار نزل قدام الجنيه وكل حالة ليها تفسير وبتدي مؤشر مختلف لكن العامل المشترك بين ثبات وهبوط الدولار هي إن الجنيه المصري بدأ يسترد عافيته وخلاص مسك التراك وعرف طريقه وخد مناعة من الصدمات.

طيب ليه الدولار نزل نهاردة.. عشان الكلام اللي قلناه امبارح في بانكير وهو بسبب مجموعة أخبار كويسة عن التدفقات الدولارية الفترة الجاية ومنها 30 مليار دولار من برنامج الطروحات الحكومية وضيف عليهم النهاردة 400 مليون دولار من بريطانيا لمصر.
كمان مصر استلمت من ساعات 820 مليون دولار قيمة الشريحة التانية من قرض صندوق النقد الدولي، ومن الأخبار الحلوة افتتاح الدكتور مدبولي لمشروعات صناعية هتكون إضافة مهمة للاقتصاد المصري وكمان ظهور بيانات دولية بتأكد على قوة الاقتصاد المصري زي ترتيبها في القارة الأفريقية واحتلالها المركز الثالث إفريقيا في اجمالي الناتج المحلي وكمان احتلال مصر المركز التاني في نمو احتياطي الدهب في المنطقة، وده غير أخبار كتير تانية ليها علاقة بالاستثمار المباشر زي اعلان مجموعة سعودية عالمية على ضخ مليار ونص دولار استثمارات في أحد مراحل مشروع راس جميلة في شرم الشيخ .

وقلنا إن تأثير اللي حصل امبارح على أسعار الدولار.. ان سعر الدولار هينزل بداية من تعاملات الاثنين لأنه جزء من الطلب عليه بيكون ليه علاقة خاصة بالتدفقات الدولارية واستدامتها واللي حصل بيقول إن مصر لسه هتستقبل مليارات تانية من الدولارات وعلى مدار الوقت ودي فرصة من دهب لصعود الجنيه.
الجديد بقي النهاردة أن فيه أخبار كويسة تانية بتحدد الثقة في الاقتصاد المصري وتحديدا في ملفات الاستثمارات الأجنبية المباشرة والقوية في الفترة الجاية ومنها الاعلان النهاردة عن طرح مشروعات لمناطق صناعية ضخمة في منطقة العلمين الجديدة وفيه اهتمام صيني كبير بالاستثمار في المنطقة دي تحديدا واللي هتضم صناعات متطورة منها صناعة السيارات الكهربائية والصناعات المتطورة في اكتر من تخصص كمان من الاخبار الكويسة هي زيادة الصادرات وخطط الوصول إلي 145 مليار دولار من الصادرات في سنين قليلة وده مقابل ترشيد الاستيراد لأقصى درجة مع التوسع في التصدير وتخلي الناس عن ثقافة الاستيراد الاعمي لسلع ملهاش لازمة وده كله بيخلي الدولار هيفضل ينزل قدام الجنيه في بداية رحلة سقوط طويلة.