مليارات خليجية جديدة.. حكاية مدينة شوتجارت الصناعية المصرية

  

إزاي السيسي حول الرمل لدهب في العاصمة الإدارية الجديدة وإيه حكاية المدنية الصناعة الضخمة اللي بدأت الإنشاء فيها هناك وليه هتكون قلعة في التصنيع الحديث وإيه علاقتها بالمدينة الصناعية الإلمانية الشهرة شوتجارت.. تعالو نشوف التفاصيل

اللي يعرف تفاصيل مشروع العاصمة الادارية الجديدة هيكون عارف إن اللي بيتخطط هناك مش مشروع ضخم وخلاص لكن بيتم إنشاء بلد تانية تقريبا فيها كل الخدمات والتوسعات وقادرة على استيعاب ملايين المصريين وهي مش زي ماقال الإخوان واعلام الانهزاميين منتجع للأغنياء.. ايه اللي بيحصل في هناك.
شوف حضرتك كل اللي انت شايفة من مشروعات على الأرض في العاصمة الجديدة دي المرحلة الأولى واللي لسه مخلصتش ولو متعرفش لسه فيه مرحلتين تاني على مساحة 80 ألف فدان انت متخيل المساحة عاملة ازاي ودي طبعا مش هتكون كلها اسكان وفنادق ومكاتب ادارية لكن جزء كبير منها هيكون للتصنيع والانتاج.
طيب ليه شركة العاصمة قررت تعمل مشروعات صناعية .. عشان ببساطة موقعها الجغرافي العبقري ومدينة بتقوم في الصحراء وجمبها 3 مواني وقريبة من خطوط التجارة العالمية ومن قناة السويس لازم ومنطقي وطبيعي تكون عندها مدن صناعية كاملة لأنها عندها أهم ميزة وهي الأرض البكر والمواني القريبة يعني تكلفة التصدير والنقل هتكون قريبة جدا.
وعشان مانطولش على حضراتكم هنقولكم الجديد.. شركة العاصمة كانت اتكلمت في سنة 2015 على مشروع مناطق صناعية لمختلف الصناعات الحديثة والمتطورة واللي بتعتمد على الطاقة النظيفة كمان في التشغيل والإنشاء ودلوقتي بدأ المشروع يتنفذ على الارض والأهم بقي في حجم المشروع واللي بدايته على مساحة ألفين فدان مرة واحدة.
والمشروع الصناعي الضخم اتطرح على مستثمرين وفعلا فيه مستثمرين كتير وأغلبهم من الخليج قدموا للاشتراك في المشروع المصري الكبير وشركة العاصمة دلوقتي بتشوف أفضل العروض قبل الاعلان الرسمي لكن رئيس شركة العاصمة قال إن أغلب اللي قدموا لعمل مشروعات صناعية في المدينة مطورين صناعيين عرب وعالميين ومن الأسماء التقيلة ومدرجين في البورصات كمان.

ملامح المشروع بتقول إنه بيضم 6 مناطق خدمية أساسية ومناطق صناعية ولوجستية ومجمع خدمي وكمان ميناء بري بالاضافة الي مناطق سكنية وتجارية ومركز للابحاث والدعم وميزة المنطقة الصناعية دي إنها على طريق العين السخنة بالقرب من محطة القطار السريع لربطها مع مينا العين السخنة ومينا والإسكندرية الكبير ومينا بورسعيد.
طبعا مشروع زي ده هيضم صناعات ضخمة زي صناعة الألكترونيات والسيارات والأجهزة المنزلية وآلات المصانع ومتوقع رغم إن مفيش أرقام لكن متوقع تكون الاستثمارات بمليارات الدولارات لأن المشروع ضخم والبعض شبهها إنها هتكون زي مدينة شتوجارت الألمانية الصناعية الشهيرة.