قبل ما تروح تفتح حساب في البنك.. خد بالك من الحاجات دي

بسبب حاجات كتيره فيه اهتمام كبير وزياده ملحوظه فى فتح الحسابات البنكيه فى آخر كام سنه ، ووجود حساب ليك فى البنك بيسهل حاجات كتير فى حياتك أهمها ايداع وسحب الفلوس فى اى وقت وكمان فلوسك مضمونه غير لما تروح تحطها مع حد وياخدها ويهرب زي ما بيحصل فى حكايات المستريحين اللى بقينا نسمع عنها كل شويه. 
وفيه ناس كتير بتسأل عن أفضل بنك ممكن يفتحوا فيه حساب وكمان ايه فوايد الحساب ده ليهم.. وفى الفيديو ده هنقولك حاجات لازم تعرفها قبل ما تروح تفتح حساب فى البنك

الحسابات البنكيه مكان مناسب لحفظ فوسك وده عشان البنك المركزي المصري هو الضامن لمدخراتك فى اى بنك .. والبنوك المصريه  فيها خيارات كتير لإيداع فلوسك زي مثلا شهادات الادخار والودايع والحسابات الجاريه.. لكن الحسابات الجاريه تعتبر الأكثر شيوعاً وده عشان بتسهل عمليات السحب والايداع من غير ما يكون في حدود معينه لده.
ولكن قبل ده كلو لازم تشوف وتعرف كام حاجة قبل ما تختار البنك اللي هتفتح فيه الحساب
وأول حاجة لازم تحدد  الغرض من الحساب لأن بناء على انت عاوز ايه من الحساب هتقدر تختار نوع الحساب اللى يناسبك وبعدها البنك الأفضل..كمان الرسوم من الحاجات اللي لازم تسأل عنها عشان فيه بنوك بتحط رسوم شهريه وسنويه على الحسابات وبيختلف مبلغ الرسوم من بنك للتاني.
من الحاجات المهمة اللى لازم تعرفها قبل ما تختار البنك اللى هتفتح فيه الحساب شبكة فروع وماكينات الصرف الآلي الخاصة بالبنك وتشوف إيه البنك اللي عنده شبكه كبيره من ماكينات ATM .. وده عشان متضطرش تروح تسحب من ماكينات ATM غير البنك بتاعت وتفرض عليك رسوم عند السحب.. وكمان ضروري جدا تفكر فى موقع البنك وفروعه، وفيه  بنوك في مصر بيبقا من الصعب انك تلاقي ليها فروع فى أى مكان .
كمان الحد الأدنى للرصيد من الحاجات المهمة  وبيختلف الحد الادنى للرصيد من بنك للتاني عشان كده لازم تسأل وتدور على البنوك اللي بفتح فيها حساب بنكي بأقل حد أدني للرصيد.. وده عشان مليتفرضش عليك رسوم إداريه كبيره..
وبالنسبة للفوايد اوعا تصدق ان الحسابات الجارية مش عليها فواد .. في بنوك كتير بتعمل حسابات جاريه بفوايد.. عشان كده لازم تدور على أحسن بنك بيقدم فوائد على الحسابات الجاريه.
دي اهم الحاجات اللى لازم تحطها فى حساباتك وانت بتختار البنك اللى هتفتح فيها حسابك .. وكل سنة وانتوا طيبيبن