عجز موازنة الدولة بيحصل إمتى؟ والحكومة بتعمل إيه عشان تسد الفجوة بين المصروفات والايرادات؟
فيه مصطلحات كتير بدأت الناس تسمعها بقوة فى الفترة الأخيرة ومنها طبعا مصطلح عجز الموازنة العامة للدولة ووجود فجوة تمويلية .. الحكومة تحاول كبح جماح عجز الموازنة.. الحكومة تخفض عجز الموازنة وتحقق فائض.. وكلها عبارات بنسمعها فى بيانات الحكومة وكلام المتخصصين فى حالة حدوث عجز فى الموازنة العامة للدولة…بس أكيد ناس كتير بتسأل عن مفهوم المصطلح دا.. يعني اية عجز فى الموازنة العامة للدولة؟ والحكومة بتسد العجز ده إزاي ومنين؟
بص يا سيدي.. العجز فى الموازنة العامة ببساطة كدا يعني مصروفات الدولة تبقا أكبر من إيرادتها بنسبة محددة، ووقت لما تكون دي المعادلة فالتوازن مابيبقاش موجود بين المصروفات والإيرادات وهنا بيكون فى عجز فى الموازنة العامة للدولة.
بمعنى تانى لو الدُخول اللى جاية من السياحة وتحويلات الخارج وعوائد التصدير والضرائب وغيرها من الموارد ماتقدرش تكفي المصروفات اللى بتغطي احتياجات الدولة فى القطاعات المختلفة سواء تعليم أو صحة أو بنية تحتية أو غيرها من الخدمات بيبقى هنا فى عجز فى الموازنة.. يعني اللي جاي مش على قد اللي رايح.
والحكومات فى الدولة المختلفة بتحاول بقدر الإمكان أنها تعمل توازن دايمًا بين اللى بتحققه الدولة من إيرادات واللى بتنفقه من مصروفات، ودا بيكون من خلال تعظيم حجم الإيرادات وتقليل المصروفات.. والعجز فى الموازنة مش بس ممكن نطلقه على الدول .. دا كمان ممكن نذكره فى حالات الشركات والمؤسسات واللى أحيانًا المصرفات فيها بتزيد فى حين الإيرادات قليلة.. عرفت بقى يعني اية عجز فى الموازنة العامة للدولة.
مولو صروفات الدولة أكبر من إيراداتها بنسبة ما، هيبقا صعب وقتها إحداث التوازن المطلوب بين النفقات والإيرادات، وده هيخلق فجوة تمويلية تستوجب إيجاد مصادر تانية للتمويل
طب ايه المصادر اللى بتسد بيها الحكومة عجز الموازنة؟
فيه مصادر كتير الحكومة بتلجأ ليه لتوفير تمويل اضافى لسد عجز الموازنة لكن كلها بتكون عن طريق الاستدانة سواء من خلال طرح ادوات دين حكومية أذون خزانة وسندات وده بيطلق عليه الدين الداخلى او من خلال الحصول على قروض من مؤسسات التمويل الدولية وده الدين الخارجي
