لو هتبيع دهب شوف الفيديو ده قبل من تروح الصاغة.. صدفة فضحت جريمة التجار

 

اكيد فكرت في يوم تبيع دهب زي اي حد وروحت فعلا الصاغة وبعد ما لفيت على اكتر من تاجر بعت باعلى سعر ورجعت مبسوط.. لكن بعدين اكتشفت أنه اضحك عليك وانك اتعرضت لاكبر خدعة من التاجر .. ايه اللي حصل مع الراجل ده وليه اتضحك عليه وعشان ما يحصلكش اللي حصله تعمل ايه.. تعالي نشوف أصل الحكاية ..

 
الحكاية النهاردة مختلفة لأنها حصلت بالفعل وبانكير كانت شاهدة عليها في سوق الصاغة واللي كشفت العالم الخفي لتجار كتير لكن مش كل التجار في التحايل والنصب والغش والتدليس اللي بيحصل مع الزباين أو المواطنين اللي مش بياخدوا بالهم من اللي بيحصل..
القصة بدأت إن فيه فتاة كان معاها خاتم دهب وحبت تبيعه عشان تغير وتجيب حاجة تانية وراحت لاول تاجر بتسأل تشتري دا بكام ياعم قالها ده مستعمل قالته أه أنا تقريبا ملبستهوش ولسه جديد وباين على شكله والبنت كانت بتتكلم جدا هو الخاتم جديد لكن بيعتبر في عرف السوق مستعمل.. ماعلينا.. هتاخده ياعم.. مسك التاجر الخاتم وقعد يقلب فيه ويفحصه بنضارة الدهب ويبعد ويقرب كأنه بيشوف ماسة أفريقية نادرة خلي البنت تقلق وافتكرت إن الخاتم فيه حاجة ولا شبه خاتم ضاع منه.. المهم تمام يابنتي سليم.. بس فيه مشكلة صغيرة.. خير ياعم الحاج .. الخاتم زي ما انت شايفة فيه فصوص.. تمام ايه المشكلة.. المشكلة اني عشان هتشتريه هشيل الفصوص دي وأخصمها من الوزن بتاع الخاتم.. لكن التاجر معرفش إن الفتاة فاهمة كويس قالته مش من حقك تشيل الفصوص وتخصمها من تمن الخاتم والوزن لأن القانون بيقول طالما أنا مشترية الخاتم من شركة معتمدة ولسه شغالة في السوق يبقي انت مجبر تشتريه زي ما هو.. الراجل الجواهرجي اتضايق لأنه عارف إن صاحبة الخاتم بتتكلم صح ودا قانون السوق والصاغة والدولة لكن هو في العادة بيستغل جهل أغلب الزباين بالحكاية دي ويشيل الفصوص عشان يزود مكسبه في الحاجة اللي هيشتريها .
في النهاية التاجر الأولاني اعتذرلها وهي رفضت كمان تبيعله.. راحت للتاجر التاني واللي عمل نفس التاجر الأولاني وفحص الخاتم لكن المرة دي مجابش سيرة الفصوص وقالها هاخده بسعر كذا قلت له ليه ياعم هو كام جرام لما عرف إنها هتدور وراه مسك الألة الحاسبة القديمة بتاعته وقعد يضرب في الأرقام كأنه شغال في جولدن ساكس وفي الاخر قالها ده تمن الخاتم وهنخصم منه ضريبة المبيعات.. هب هنا البنت اترفزت عليه وقالته هو أنا هدفع ضريبة المبيعات مرتين ما أنا دفعتها في المصنعية لما اشتريته وبعد جدال قالها طيب أنا هخفض النسية وأخليها 2% ولما رفضت قلها خلاص يامدموزيل يبقي 1% البنت خدت الخاتم ومشيت.

صاحبة الخاتم راحت لتاجر تالت والقصة بنفكركم إنها حقيقية وحصلت فعلا والتاجر المرة كان مختلف تماما وخد الخاتم وبص فيه ووزنه وقالها يابنتي سعره كذا وكان سعره الحقيقي من غير ما يشيل الفصوص أو يقولها فيه شوايب كتير ولا يضيف عليها ضريبة مبيعات ولما استغربت راحت حكن للتاجر على اللي حصل معاها وقصتها من التجار اللي قبله قالها يابنتي دي ناس معندهاش ضمير واحد عاوز يشيل الفصوص عشان يكسب ويخسرك ودا مش من حقه طالما معاكي فاتورة من الشركة اللي اشتريتي منها دهب والتاني حرام عليه يحملك فاتورة بالظلم لأنه فعلا انت بتدفعيها مع المصنعية لما تروحي تشتري في الأول..
خلصت الحكاية لكن وصاحبة الخاتم راجعة بيتها لقت بنات تانية في محلات التاجرين اللي كانو هينصبوا عليها وعرفت إنهم هيقعوا ضحايا لحيل وألاعيب تجار الدهب.. ده الحكاية على السريع وعشان كده قررنا نحكيها زي ما حصلت عشان الناس تعرف اللي ليها واللي عليها لما تروح تبيع أو تشتري دهب ولازم تكون فاهمة كويس أووي التاجر ممكن يضيف عليها إيه أو يستغلها إزاي وخاصة لو كان اللي بيشتري ده بيشتري كمية مش خاتم بس..