قرار مصيري من صندوق النقد لمصر.. وكمان فيه مفاجأة

من شوية صندوق النقد الدولي خد قرار مهم الحكومة كانت مستنياه من حوالي سنة وكمان فيه مفاجأة تانية.. ايه اللي حصل ياترى.

النهاردة كان يوم مهم جدا في مصر بعد موافقة صندوق النقد الدولي على المراجعة الأولى والتانية للقرض المصري واللي كانوا متعطلين بسبب تجميد الاتفاق القديم لقرض بـ 3 مليار دولار وقبل ما تتم استئناف المفاوضات ويزيد القرض ل8 مليار دولار.
وبكده يبقي مجلس إدارة الصندوق وافق النهاردة رسميا على زيادة البرنامج الأصلي لمصر بحوالي 5 مليار دولار بما تعادل (3.76 مليار وحدة حقوق سحب خاصة)، ليصبح 8 مليارات دولار بدلا من 3 مليارات دولار،واللي تم الاتفاق عليه في نهاية 2022.
وبكده بردو وهي المفاجأة يبقي الحكومة المصرية هتصرف الشريحتين اللي متأخرين بما يعادل 820 مليون دولار أمريكي أو (618.1 مليون وحدة حقوق سحب خاصة).
الصندوق قال في بيانه إن صفقة الاستثمار الكبيرة الأخيرة في رأس الحكمة خففت من ضغوط التمويل على المدى القريب، لكن بردوا يفضل تنفيذ السياسات الاقتصادية في إطار برنامج التمويل والاصلاح الاقتصادي أمر  بالغ الأهمية لمواجهة تحديات الاقتصاد الكلي في مصر بجانب تنفيذ إصلاحات هيكلية قوية لتحقيق فوائد تحسين بيئة التمويل.
مفيش شك إن الاعلان الرسمي عن القرض المصري وبداية صرف الشرايح هيكون ليه انعكاس مهم وأيجابي على سوق الدولار في مصر وعلى الأسواق بشكل عام وكمان هتكون خطوة لفتح باب الاستثمار المباشر وجذب تمويلات جديدة والأهم من دا كل جذب شهادة ثقة في الاقتصاد المصري.