ليه أسعار الدهب هتزيد.. صدمة في الصاغة وتحذير من الأيام الجاية
ايه اللي بيحصل في سوق الدهب وهل فعلا الاسعار هتزيد الأيام الجاية وليه وإيه انسب الأوقات للشراء.. خليكم معانا وهنشوف التفاصيل
سوق الدهب في مصر ليه فترة مش مستقر وأسعار أول التداولات بتختلف تماما عن منتصف التعاملات وده معناه إن فيه حاجة غريبة في السوق وعدم استقرار.. لكن عامة الدهب زي أي سلعة في مصر بيحكمه العرض والطلب لكن فيه عوامل تانية مهمة بتأثر على سعر الدهب زي أسعار الدولار واسعار المعدن عالميا ودول ليهم علاقة بأسعار الفايدة مثلا في البنوك المحلية وفي البنك الفدرالي الأميريكي وعشان كده أسعار الدهب بتكوت معقدة وصعب تعرف رايح على فين.
لكن للأسف خبراء الدهب في مصر شايفين إن الأسواق رايحة ناحية ارتفاع الأسعار وعدم الاستقرار في الفترة اللي جاية وده لأسباب كتيرة منها ارتفاع الطلب والاستعدادات لموسم الزواج، إضافة لارتفاع سهر الدهب بالبورصات العالمية بدعم من مشتريات البنوك المركزية، والتوترات في منطقة الشرق الأوسط.
خبراء الدهب شايفين إن الوقت الحالي مناسب جدا للشراء إلى حد كبير مقارنة باللي هيشوفه السوق المحلي خلال الفترة الجاية؛ خاصة الأسبوع الأخير من شهر رمضان المبارك، وقبل عيد الفطر 2024، لأنه متوقع زيادة كبيرة في سعر الدهب في أسواق الصاغة، بسبب كثرة المناسبات الشخصية والأفراح، وإن لإقبال هيأثر بالسلب على سوق الدهب من حيث ارتفاع الأسعار داخل السوق المحلية.
كمان خبراء الصاغة شايفين إن أسعار الدهب بتشهد حالة من التقلبات وعدم الاستقرار، بسبب التغييرات في سعر صرف الدولار بالبنوك، وأسعار الدهب بالبورصة العالمية، وسط ارتفاع نسبي في الطلب على المعدن، خلال الفترة الجاية.
وحسب توقعات تحليل جولد بيليون، يفترض تأثير تخفيض أسعار الفايدة الأمريكية في السنة الحالية هيكون ليه دور كبير في تحديد اسعار المعدن الأصفر عالمية لأن تخفيض الفايدة وبيصب في صالح أسعار الدهب في وقت لاحق، لأن كتير من المؤسسات المالية العالمية بتستهدف سعر للذهب لنهاية العام عند 2300 دولار للأوقية الواحدة وأي خلل في الأسواق العالمية أو عدم خفض الفدرالي للفائدة هيشعل سوق الدهب العالمي وبالتالي سوق الدهب في مصر.
كمان المصريين بيحبوا يشتروا دهب كتير في أوقات الازمات أو في حالة توافر سيولة مالية وعشان كده خبرا الصاغة بينصحوا الناس اللي عاوزة تشتري أو تستثمر في الدهب إنها تشتري دلوقتي مش بكرة عشان توقعات بزيادة الأسعار.
