هو الدولار ممكن يرجع لـ8 جنيه.. هيحصل في حالة واحدة بس

 
هو معقولة الدولار ممكن ينزل لغاية ما يوصل 8 جنيه زي زمان وامتي ده ممكن يحصل ولو حصل ده معناه ايه الجنيه.. تعالوا نشوف ده بقي ممكن يحصل ولا لأ
 

زمان كان الدولار بعشرين قرش مصري ومع السنين الوضع اختلف ووصل لأقصى سعر ليه في الأيام اللي قبل قرارات التعويم الأخيرة وكان بيتباع ب73 جنيه في السوق السودا للدولار واللي راح زمانها خلاص ومع شطحات العملة الأمريكية قدام الجنيه على مدار السنين اللي فاتت بقي فيه اعتقاد أن الدولار سيد علي الجنيه وده مش حقيقي لأن الجنيه كان هو الملك على الدولار ولكل حالة أسبابها فزمان كان الاقتصاد المصري قوي جدا والايرادات أضخم من الواردات وكان فيه دهب كتير في دهب كتير في الدولة ووفرة في الموارد وقلة في عدد السكان وبعدها بدأت مصر تدخل في حروب كبيرة تهد أي بلد وعشنا سنين كل موارد الدولة رايحة على المجهود الحربي وفي نفس الوقت سادت عقلية المال العام والقطاع العام واللي قضت على الابتكار والتوسع والتحديث والتصدير ومع ده كله حصل انفجار سكاني بعد الحرب مع خلصت مع سياسة اقتصادية كلها كوارث واعتمدنا على الاستيراد ويقينا مستهلكين جدا وبالتالي الدولار بدأ قيمته تزيد بسبب الطلب عليه والجنيه بقى يتراجع.
نرجع لموضوعنا المهم وهو امتي الحنيه يرجع زي زمان والدولار يبقي ب8 جنيه او اقل.. شوف ياسيدي اكتر حاجة أذت الجنيه هي سياسة الحماية والتحكم في سعره واكيد كان فيه اسباب منطقية وقتها لكن ده خطأ اقتصادي كبير لانك مش هتعرف تقيس قوة العملة بتاعتك واللي العالم بقي يقيسها من السوق السوداء واللي كانت بتقدر الجنيه بأقل من قيمته بكتير قدام الدولار والنتيجة ظلمنا الجنيه.

طيب بعد ما حررنا سعر الجنيه ايه اللي هيحصل.. اللي هيحصل حضرتك كتير جدا أوله إن اللي هيحدد سعر الجنيه دلوقتي هي سياسة العرض والطلب والقاعدة ثابتة وبتقول إن طول ما فيه طلب على الدولار اكتر من المعروض سعره هيزيد والعكس صحيح لو مفيش طلب كتير وفي وفرة في السوق الدولار هيفضل نازل على طول وهيوصل 5 و8 جنيه وقيمة العملة المحلية هتزيد في المقابل ودلوقتي تقدر الحكومة تتحكم في سعر الدولار بطريقة غير مباشرة عن طريق ضمان تدفق كبير للدولار مقابل ترشيد انفاق الدولار وبناء قاعدة صناعية ضخمة وتصدير بمليارات الدولارات وتنمية موارد الدولار الطبيعية زي قناة السويس والسياحة والاستثمار وتحويلات المصريين بالخارج