تأثير تعويم الجنيه على أسعار السيارات.. ايه كلمة السر

ايه اللي هيحصل في سوق السياارات بعد تعويم الجنيه النهاردة وياترى الاسعار هتزيد ولا تقل وليه والنصيحة لكل اللي بيفكر يشتري عربية
 

اللي كنا متوقعينه حصل والبنك المركزي حرر سعر الجنيه وصلح غلطة استمرت سنين بحماية الجنيه المصري قدام العملات التانية وكانت النتيجة ظهور السوق السودا للدولار في أول اختبار للاقتصاد بعد الحرب الروسيبة الاوكرانية والدولة دفعت تمن تحصين العملة بتحمل فاتورة عالية بعد ارتفاع اسعار السلع عالميا واضطرت تتحمل الفرق في الاسعار لغاية الأمور بدأت تاخد مسار اجباري رايح ناحية تحرير سعر الجنيه عشان العجلة تمشي والاستثمارات تدخل.
وأكيد اي قرار اقتصادي وخاصة لو كان قرار زي التعويم والرفع التارخي لسعر الفايدة يسببوا حالة من التوهان والاضطراب في البداية والطريق للاشاعات والتخويف وطبيعي بردوا اسعار الدولار والدهب ترفع في أول ساعات بعد القرار لان الاسواق بتكون لسه عايشة حالة الصدمة لكن في النهاية الأسواق هستقر في مسارها الطبيعي والدولار هيرجع ياخد سعره العادل وكله عرض وطلب ودي كلمة السر في التعويم إن الدولة قدرت تجمع حصيلة دولارية محترمة توازن بيها سوق الصرف وخدت اجراءات تانية كتير تخلي لجام السوق والدولار في ايد قوية بعيد عن العبث والمضاربة.
وقلنا هنا في بانكير إن الاستقرار هيرجع لأسواق الدهب وفي اسعار السلع لما الدولار يستقر بشكل طبيعي وياخد سعره العادل زي ماقلنا واللي هيحدده مدي الطلب على الدولار مقابل وفرة المعروض من العملة الأمريكية ودا كله المركزي طبعا عمل حسابه عليه قبل ماياخد القرار وعشان كده بعت رسايل كتير للاسواق ومحدش خد باله منها للمواطنين زي الاعلان عن ارتفاع الاحتياطي النقدي والاعلان عن صفقة القرن في راس الحكمة ومشروعات ضخمة من الصين والسعودية وايطاليا هيتم توقيعها قريب جدا وهي صفقات هتعدي صفقة راس الحكمة وبكده يبقي الدولار تحت السيطرة.

طيب ايه اللي هيحصل في سوق السيارات الفترة الجاية.. شوف يافندم سوق السيارات كده كده كان عايش وبيتصرف كأنه حصل تعويم وبالعكس كان بيتعامل مع دولار السوق السواد أبو 70 جنيه وعشان كده فرض التجار الاوفربرايس على الاسعار عشان يضمنوا مكسبهم وعشان كده العربية اللي تمنها زيرو كان 300 الف بقت بمليون جنيه وأكتر ودلوقتي وحسب مقياس المنطق الدولار هيتزل ويستقر عند 45 جنيه تقريبا بعد ما يرجع من فورة قرار المركز وزيادة الطلب عليه أسعار السيارات هتنزل أكتر وتاخد سعرها الطبيعي لأن عملية الاستيراد هترجع من تاني والمعروض هيزيد في الاسواق ومع تلبية الطلب على شراء السيارات السوق هياخد مساره الطبيعي.