بعد رأس الحكمة.. صفقة بـ5 مليار دولار من ليبيا

صفقة رأس الحكمة زي ماقلنا قبل كده وش الخبر على الاقتصاد المصري وبعدها فتحت حنفية الاستثمارات العربية والأجنبية.. ايه اللي حصل في الساعات الأخيرة وايه حكاية الصفقة  الليبية لمصر.. تعالوا نشوف إيه الحكاية
 

نقدر نقول إن الدعم العربي لمصر بيعيش أفضل أوقاته وده لأن الظروف والمواقف أثبتت للعرب أن مصر هي الدرع القوي للأمة العربية وقوتها هي قوة للعرب كلهم وإن مصر عمرها ما كانت ولا هتكون عامل ضد استقرار الدول العربية وعشان كده جت صفقة رأس الحكمة بدعم الشيخ محمد بن زايد لمصر في ازمتها الاقتصادية وتخفيف الضغط الأمريكي والغربي على مصر بسبب مواقفها العربية الأصيلة وبعدها بدأ الكلام عن صفقات سعودية وقطرية في الطريق وهيتم الاعلان عن تفاصيلها الفترة الجاية والصفقات الجديدة هتكون بعشرات المليارات من الدولارات زي التسريبات ماقالت والتسريبات دي جت من مصادر رفيعة المستوى مصريه وعربيه.
الجديد بقى إن فيه صفقة ليبية مكنتش على البال وزي ما احنا عارفين مصر وقفت حائط صد ضد تقسيم ليبيا وكانت ليها مواقف حاسمة ضد التدخل في شؤون ليبيا الداخلية ووضعت خطوط حمرا وطردت كل الأطراف الخارجية اللي حاولت تستولي على الثروات الليبية وبعدها ليبيا ردت الجميل واستعانت بشركات مصرية لاعادة الأعمار  وفي الساعات الأخيرة تم الكشف عن استثمارات ليبية عاجلة في مصر ودا اللي أعلنته المؤسسة الليبية للاستثمار  وهي ممثل الحكومة الليبية المشاركة في فعاليات معرض القاهرة الدولي EECA EXPO 2024 المقام بمركز القاهرة الدولي للمؤتمرات بمدينة نصر، حالياً عن رصد محفظة استثمارية بقيمة تصل إلى 5 مليار دولار للاستثمار وتمويل ومشاركة الفرص الاستثمارية في مصر أو فروع المؤسسة الأستثمارية.
وعلى فكرة حجم أصول المحفظة الاستثمارية الليبية، حوالي 68.4 مليار دولار أمريكي موزعة على خمس شركات، وهي الشركة الليبية للاستثمارات الخارجية وصندوق الاستثمار الداخلي ومحظة لييا إفريقيا للاستثمار والمحفظة الاستثمارية طويلة المدي وشركة الاستثمارات النفطية، وفق بيان للمؤسسة الليبية للاستثمار ومبلغ ال5 مليار دولار دول البداية في السوق المصري وبتمثل توجه ليبي قوي لاستثمارات قوية وضخمة تانية جاية في الطريق لدعم الاقتصاد المصري ومش كده وبس دا كمان الشركات الكويتية والبالغة 10 شركات كويتية المشاركة في المعرض أعلنت استعدادها ضخ استثمارات جديدة في مصر بعد دراسة الفرص الاستثمارية المطروحة بعد التعرف عليها من خلال المشاركة في معرض القاهرة الدولي  تحت رعاية رئيس مجلس الوزراء الدكتور مصطفي مدبولي والمهندس أحمد سمير وزير الصناعة والتجارة الخارجية.
أهمية الصفقات الجديدة أنها بتقطع الطريق على عودة الأزمة في مصر أو ظهور أزمة نقص الدولار من تاني او عودة السوق السودا للدولار وده معناه مزيد من الاستقرار في مصر وانخفاض الأسعار وتدشين مرحلة جديدة في تعافي الاقتصاد المصري خاصة بعد تأثر السياحة وقناة السويس من الأحداث في المنطقة ودي أهمية التوقيت في الاعلان عن الصفقات العربية الجديدة