هنتحكم في طاقة أوروبا.. شوف مصر بتعمل ايه في مشروعات الربط الكهربائي
مصر رسمت خطاتها أنها تكون مركز اقليمي لتبادل الطاقة بين العالم، وبدأنا تنفذ الخطة، وهنتحكم في الطاقة بقارة أوروبا كلها.. ياتري ازاي مصر هتتحول لمركز اقليمي لتبادل الطاقة.. وازاي مصر هتتحكم في الطاقة في قارة أوروبا.
الحكومة في الوقت الحالي رسمت الخطة علشان تستغل الموقع الجغرافي لمصر واللي بيربط اكبر 3 قارات في العالم مع بعضهم وهما قارات أفريقيا وآسيا وأوروبا، واحدة من الحاجات اللي بدأ مصر تستغل فيها الموقع الجغرافي لمصر هو مشروع الربط الكهربائي بين دول العالم، وفعلا مصر بدأت تنفذ خطوط ربط كهربائي مع عدد كبير من الدول في الـ3 قارات.
خطة الحكومة لتحويل مصر لمركز اقليمي لتبادل الطاقة قايمة علي وجود مشروعات ربط كهربائي مع دول في الـ3 قارات، والخطة دي بدأت تتنفذ علي ارض الواقع، وحاليا مصر عندها مشروعات ربط كهربائي مع قارة أفريقيا عن طريق مشروع الربط الكهربائي مع السودان وليبيا، وبقي عندنا مشروع ربط كهربائي مع قارة آسيا عن طريق مشروع الربط الكهربائي المصري السعودي واللي بتوصل قدرته لـ3 الاف ميجاوات هتدخل المرحلة الأولي منه في شهر مايو اللي جاي بقدرة 1500 ميجاوات ، وهتكون المرحلة الثانية منه مع نهاية 2025 بقدرة 1500 ميجاوات برضوا، وبكده مصر لها خطوط ربط كهربائي قادرة علي نقل الكهرباء بين دول آسيا وأفريقيا.
نيجي بقي للحته المهمة، وهيا ازاي مصر هتتحكم في الطاقة في قارة أوروبا، وده حصل عن طريق العقود اللي وقعتها مصر مع قبرص واليونان لتشغيل مشروعات ربط كهربائي، وفي اكثر من اجتماع حصل بين الحكومات في مصر وقبرص واليونان لبدء خطوات تنفذ مشروعات الربط الكهربائي، والمشروعين دول بيحظوا باهمية ومتابعة كبيرة من القيادة السياسية، وبكده مصر بقت نقط الربط الكهربائي بين الـ3 قارات، وتقدر من خلال مشروعات الربط الكهربائي دي التحكم في الطاقة والتوصل لأي دولة في الـ3 قارات، والمشروعات دي هتكون باب دولاري جديد لمصر من تصدير الطاقة بين الـ3 قارات خصوصا أن اغلب الدول عندها مشاكل حاليا في تأمين وتوفير الطاقة اللازمة للأنارة وتشغيل المصانع والشركات.
