تطور هام فى السوق السودا للدولار.. وتوقعات ايجابية عن مستقبل الجنيه

يا ترى ايه التطورات اللى بتحصل فى السوق السودا للدولار ؟ وايه مصير الجنيه فى الفترة الجاية؟ وهل الاتفاق مع صندوق النقد هيحصل قبل رمضان ؟وايه تأثير ده على سوق صرف العملات الأجنبية؟

فيه تطور جديد بيحصل فى السوق السودا لصرف العملات الأجنبية فى اخر 48 ساعة وسعر الدولار بيتراجع بشكل ملحوظ سواء فى السوق الموازية او فى سوق الصاغة او حتى فى سوق السيارات والأجهزة الكهربائية وممكن خلال ايام قليلة لو الأمور مشيت زي ما هي ماشية كده سعر الدولار يحصل تعادل بين سعر الدولار فى البنوك المصرية وسعره بعيدا عن القطاع المصرفي ودي هتبقا اقوى ريمونتادا للجنيه المصري

طب ايه اللى حصل خلا السوق السودا تنهار بالشكل ده ؟

فيه اكتر من حاجة حصلت على مدار الاسبوعين اللى فاتوا كان ليها دور كبير فى تراجع سعر الدولار فى السوق الموازية وطبعا من أهم الحاجات دي الاعلان عن الصفقة الكبرى بين مصر والامارات وتوقيع عقد الشراكة الاستثمارية فى مشروع راس الحكمة واللى من خلاله مصر هتحصل بشكل عاجل على 35 مليار دولار بالاضافة الى 35% من أرباح المشروع وكمان 150 مليار دولار هيتم ضخها خلال مراحل تنفيذ المشروع يعنى الصفقة دي اجمالا هتدخل للبلد حوالى 185 مليار دولار وده رقم ضخم جدا وكان ليه تداعيات ايجابية كبيرة على السوق الموازية وعلى سعر العملة الأمريكية خصوصا بعد ما سعرها كان وصل لمستويات قياسية عند حدود ال 70 جنيه

الانفراجة الكبيرة اللى حصلت فى الموارد والسيولة الدولارية خلت الدكتور مصطفى مدبولي، رئيس مجلس الوزراء يأكد انه في ظل زيادة الموارد الدولارية في الأيام الأخيرة سواء من خلال صفقة رأس الحكمة أو غيرها صدرت توجيهات رئاسية للإفراج الفوري عن البضائع في جميع الموانئ.

وأكد رئيس الحكومة انه هيتم التنسيق مع البنك المركزي والوزارات المعنية لضمان الإفراج السريع خصوصا بالنسبة للسلع الغذائية والأدوية والأعلاف ومستلزمات الإنتاج وقال ان ده هيساهم بشكل كبير في تحقيق توازن الأسعار وتقليلها

وكل التطورات دي حصلت  بعد ما تسلمت مصر 5 مليار دولار كجزء من الدفعة الأولى لصفقة الشراكة الاستثمارية مع دولة الإمارات لتطوير مدينة "رأس الحكمة"، يوم الخميس اللى فات  وتسلمت 5 مليار دولار إضافية يوم الجمعة بإجمالي 10 مليار دولار في يومين.

وكان دولار السوق الموازية شهد تراجعات عنيفة خلال الأيام اللى فاتت بسبب أنباء صفقة رأس الحكمة، وسقط من مستويات أعلى الـ 60 جنيه إلى مستويات 40 جنيه

وتزامن تراجع دولار السوق الموازية مع هبوط العملة الأمريكية بالعقود الآجلة غير القابلة للتسليم وسط ترقب الأسواق لنتائج مفاوضات الحكومة المصرية مع صندوق النقد بشأن زيادة الحزمة التمويلية بجانب مقدار تخفيض قيمة الجنيه المتوقعة على نطاق واسع.