السوق معاك.. هنقولك أنسب وقت تشتري فيه دهب بكميات كبيرة

معاك فلوس زيادة أو مدخرات وعاوز تشتري دهب للزمن .. هنقولك إيه هو الوقت المناسب تروح فيه الصاغة وليه.. خليك معانا.

 
اللي حصل في سوق الدهب في مصر هيخلي ناس كتير تفكر قبل ما تشتري او تبيع لانه صعد للقمة والجرام 21 وصل 4 آلاف جنيه وفجأة خد مسار هبوط لغاية ما وصل النهاردة لحوالي 2730 جنيه ولسه هينزل يعني الناس اللي اشترت بالغالي خسرت تقريبا نص فلوسها.. بس متخافش الدهب اصلا مش بيخسر بس انت اصبر عليه وهيرجع يزيد تاني لأن الدهب ليه دورة صعود ونزول في السوق لكن الدهب كمان محتاج بقعد معاك مش اقل من 3 سنين في الظروف الحالية.
ارتفاع سعر الدهب لغاية نص فبراير كان بسبب ارتباطه بأزمة الدولار عامة وخاصة دولار السوق السودا وده اللي كان مخلي سعره في السما وكلنا شفنا الأسعار كانت عاملة ازاي لدرجة أن منصات الصاغة وقفت التسعير بسبب الفوضى في الأسعار وقتها واللي كانت بتتغير وتزيد كل نص ساعة والسوق خرج عن السيطرة والفترة دي كانت قمة الصعود الدهب.
بعد إعلان الحكومة عن مشروع رأس الحكمة سوق الدهب حاله اتقلب بعد انهيار الدولار في السوق الموازية وقرب على سعر البنوك ونزل لحاجز 35 و 36 حنيه ولسه هتنزل والدهب رجع سيرته الأولى لأسعار قبل الأزمة في الدولار.
ولأن لسه الدولار بينزل يبقي الدهب لسه سعره بينزل بردوا وعشان كده هتستني شوية مش كتير عشان تشتري دهب لما يوصل الدولار لمرحلة التوازن وهيكون الدهب وصل لاقل سعر في السوق لما الدولار في السوق السودا يسجل أقل مستوى قياسي ليه وده هيكون خلال اليومين الجايين وهنا تشتري الكمية اللي انت عايزها وتشيلها للزمن ولأن بعدها طبيعي سوق الدهب في مصر هياخد اتجاه صعودي على حسب بقي العرض والطلب والسعر العالمي وبعيد عن الدولار ولأن الناس هتروح تشتري عشان الاسعار رخيصة هيحصل زحام وطلب على الصاغة وبكده السعر هيبدأ يزيد تاني بس في المعقول.