المولد انفض.. صعود عكسي للجنيه أمام الدولار في البنوك ومفيش تعويم

هو ايه اللي هيحصل بعد ما مولد الدولار فض وخراب السوق السودا وهل لسه فيه داعي للتعويم وإيه هو السيناريو العكسي لعودة الجنيه وهزيمة الدولار .. كل ده هنعرفه في الفيديو ده خليكم معانا
 

صندوق النقد وكل خبراء الاقتصاد في الكرة الأرضية وفي المريخ كانوا من حوالي 10 أيام إن تعويم الجنيه المصري شر لابد منه وإنه من غير تحرير سعر صرف العملة مفيش دولارات هتدخل البلد ولا استثمارات والوضع هيزيد سوء والاقتصاد هيجيله وقت ويوقف وهيفضل الخلل في أسعار الصرف موجود والدولار هيفضل ليه 5 اسعار مختلفة والحقيقة كان عندهم حق جدا من الناحية الاقتصادية والمنطق والحسابات وكل المعادلات الاقتصادية عشان مفيش حاجة اسمها أكتر من سعر للعملة في نفس البلد.
طيب ودلوقتي إيه الوضع.. شوف يافندم صفقة رأس الحكمة دي كانت علامة فارقة في تاريخ مصر كله وأكيد فرقت كمان في حسابات أهل الاقتصاد والخبراء واللي كل المشاكل اللي اتكلموا عنها اتحلت مرة واحدة ولغاية دلوقتي مش مصدقين إزاي مصر اللي كانت بتتفاوض مع صندوق النقد من حوالي سنة على باقي قرض الـ3 مليار قدرت تجيب 35 مليار دولار مرة واحدة وتحول 10 مليار فورا للبنك المركزي ولسه باقي 150 مليار دولار اجمالي الصفقة ومش كده وبس ده كمان فيه مشروعات تانية بمليارات في الطريق سواء من السعودية في راس جميلة أو من الصين اللي اتكلمت على مشروعات هتعدي قيمة صفقة راس الحكمة أو حتي على الشركات الايطالية اللي هتعمل مشروعات ب7 مليار دولار.
طبيعي ياجماعة مؤسسات التقييم الدولية والبنوك العالمية وصندوق النقد كلهم يعيدوا حساباتهم تاني بالنسبة للاقتصاد المصري واللي خلص من كل همومه في ليلة واحدة وهي ليلة الجمعة اللي قبل اللي فاتت، وبعدها بساعة انهارت السوق السودا للدولار ولغاية النهاردة واللي خلاص الدولار في الموازية سجل 34 و35 جنيه وبيفصله حوالي 2جنيه على سعر البنك وبكرة هيوصل وبكده هيتوحد سعر الصرف...
لكن مش دي الحكاية خالص دلوقتي لكن فيه تصور تاني عكسي وهو صعود الجنيه مادام الدولار بينزل وفق قانون العرض والطلب وخلاص الدنيا بتمطر دولارات من كل حتة والدولة حاصرت الأزمات وحزمتها ورمتها في البحر يبقي إيه المانع الجنيه هو اللي يصعد وكمان سعر الدولارر يقل عن 30 جنيه في السوق ولما نوصل المرحلة دي مش هيكون فيه كلام عن التعويم طبعا لأن التعويم هيكون حصل لوحده والجنيه غلب كل العملات في الدقيقة 90 وده السيناريو اللي المركزي والحكومة والرئيس السيسي خططوا ليه على نار هادية وبيتنفذ بحذافيره دلوقتي وجاي الوقت اللي نفكركم بالموقف اللي السيسي قال فيه بثقة وعلى الهواء مباشرة مفيش تعويم ومحدش ساعتها فهم قصده زي ما ناس كتير استغربت السيسي وهو بيضحك ضحكة غامضة وبيقول أزمة الدولار هتبقى ذكرى.. وياريت بقى نخلي بالنا من هنا ورايح من اي كلمة يقولها السيسي حتى لو كان بيهزر لأنه بيكون قاصدها والأهم بينفذها.