وداعاً السوق السوداء.. هجوم استثماري ضخم على مصر
متابعينا الكرام في كل مكان أهلا وسهلا بكم وتحليل جديد لأهم التقارير اللي قدمتها وحدة أبحاث بانكير على مدار اليوم الخميس 29 فبراير 2024
البداية مع تقرير مهم جدا عن ايجابيات صفقة رأس الحكمة مع الأمارات وحجم الاستثمارات الأجنبية اللي جذبتها الصفقة للسوق المصري
وقال التقرير إنه بمجرد الاعلان عن صفقة راس الحكمة واتقلب الحال في سوق الاستثمار بالمنطقة وبدأت طلبات ومفاوضات الاستثمار والمشروعات والصفقات من كل حتة في العالم على مصر وأخرها مشروع إيطالي عالمي عبارة عن أحدث مجمع للحديد والصلب للعالم في المنطقة الاقتصادية لقناة السويس، باستثمارات 4 مليار دولار مرة واحدة وده غير مشروع هيدروجين أخضر جمبه باستثمارات 3 مليار دولار يعني مشروعين بس ب7 مليار دولار.
كمان الدكتور مدبولي وقع اتفاقيات باستثمارات 40 مليار دولار دفعة واحدة على 10 سنين في مجالات متنوعة زي الطاقة النظيفية والهيدروجين الأخضر وغيرها...
وكشف التقرير النقاب عن أخر الصفقات اللي جت بعد مشروع رأس الحكمة الكبير وكانت من الصين واللي قررت الدخول بقوة للسوق المصري والمرة دي عن طريق إنشاء منطقة صناعية صينية على البحر المتوسط لتوفير احتياجات السوق المحلي والتصدير للأسواق الأوروبية والأمريكية، بجانب مقترح تسوية المعاملات التجارية بالعملات المحلية للبلدين، والتباحث بشأن مقترح إنشاء فرع لبنك صيني داخل مصر
التقرير التالي اللي قدمته وحدة أبحاث بانكير بخصوص الارقام المهمة اللي أعلنها الدكتور مصطفي مدبولي رئيس الحكومة النهادرة بخصوص استلام 5 مليار دولار من الدفعة الأولى للصفقة وبكرة الجمعة هيتورد5 مليار دولار تانيين للبنك المركزي باجمالي 10 مليار دولار
مدبولي قال كمان إنه هيتم استثمار 35 مليار دولار كاستثمار مباشر خلال شهرين بخلاف 35 بالمئة هتحصل عليها الدولة من صافي أرباح مشروع تطوير وتنمية رأس الحكمة
كمان الحكومة كشفت وصول 520 مليون دولار لخزينة وزارة قطاع الأعمال النهاردة الخميس من صفقة "الفنادق".
وحدة أبحاث بانكير قدمت النهاردة تقرير خاص ومهم بخصوص قرض صندوق النقد الدولي وموعد صرف القرض المصري وحجمه
وقال التقرير إن مصر بقالها شهور بتخوض مفاوضات شاقة مع المسئولين فى صندوق النقد الدولى لزيادة قيمة البرنامج التمويلي المقدم لمصر وكمان انهاء المراجعة الاولى التانية لقرض ال 3 مليار دولار اللى اتفقت عليه الحكومة مع الصندوق في شهر ديسمبر 2022 ..
وأضاف التقرير إنه بعد اعلان صفقة رأس الحكمة والأخبار الحلوة ما بتتوقفش ومؤخرا كمان جت اخبار حلوة من صندوق النقد الدولي اللى أعلن المسئولين فيه لأول مرة عن موعد الاعلان عن التمويل الاضافي اللى هيقدمه الصندوق لمصر.
وأعلنت مديرة صندوق النقد الدولي، كريستالينا جورجيفا إن الصندوق نجح في حل القضايا الأساسية مع الحكومة المصرية فيما يتعلق بمراجعته لبرنامج قرض مع مصر بقيمة 3 مليار دولار.. وقالت انه من المتوقع وضع اللمسات النهائية على حزمة تمويل إضافية إلى مصر في غضون أسابيع قليلة جدا
التقرير التالي اللي قدمته منصات بانكير حولين أوضاع السوق السود للدولار بعد تصريحات الدكتور مصطفي مدبولي النهاردة ووصول 10 مليار دولار للبنك المركزي وكمان تصريحات صندوق النقد الدولي عن اقتراب صرف القرض المصري بخلاف الصفقات الضخمة اللي جت بعد الإعلان عن مشروع رأس الحكمة
وقال التقرير إن السوق الموازية للدولار بتنهار حرفيا وبدليل الهبوط الحاد في الأسعار والتداولات الغير شرعية فيها ووصل الدولار مابين 38 و40 جنيه وخلاص داخل على سعر الدولار في البنوك.
توقعات انتهاء السوق الموازية للدولار تماما بحلول مارس اللي جاي زي ما توقع خبراء السوق المصرفي وطبعا ده معناه إن كل الأزمات اللي حصلت بسبب ارتفاع سعر الدولار وظهور السوق السودا من شهور طويلة هتنتهي وشفنا فعلا إزاي الاسعار بدأت تنزل ولسه هتنزل أكتر في الايام الجاية
التقرير الأخير معانا في تحليل النهاردة عن مفاجآت 2024 وعودة الثقة في الحنيه المصري
واتكلم التقرير عن الامور المتوقع حدوثها في خلال الشهور الباقية من السنة الحالية وأهمها طبعا ملف التعويم أو تحرير سعر الجنيه أو الوصول للسعر المرن وده ابو الملفات المؤجلة من فبراير اللي فات يعني ليه سنة كاملة وكان محل خلاف عنيف وحاد بين الحكومة المصرية وصندوق النقد الدولي..
وأضاف التقرير إن الملف التاني الأهم في 2024 هو ملف القرض لأنهم مرتبطين ببعض زي ما شفنا ومن ساعات مديرة صندوق النقد الدولي قالت إن الاتفاق على القرض الجديد لمصر انتهي وهيتم الاعلان عنه خلال أسابيع قليلة يعني في حدود شهر او شهر ونص.
وقال التقرير إنه من بين الملفات المتعلقة في 2024 ولسه ماتعملتش هو صدور مؤشر الجنيه وهو مشروع أعلن عنه البنك المركزي من فترة وهو عبارة عن مقياس حقيقي وعادل لقيمة الجنيه المصري قدام سلة من العملات الرئيسية من بيتها الدولار والمؤشر ده هيقطع الطريق قدام اي تلاعب أو مضاربات على سعر الجنيه ودا بعد تأكيد مؤسسات مالية دولية إن الجنيه مقوم بشكل غير عادل امام الدولار وإن سعره العادل والحقيقي 27 جنيه وده في عز أزمة الدولار وصدور مؤشر الجنيه هيحط قواعد شفافة لقيمته الحقيقية.
