مفاجآت 2024 .. هتقلب الأوضاع وهتعيد الثقة للجنيه المصري
يا ترى ايه اللى هيحصل فى مصر فى باقي ايام وشهور 2024 ؟ وايه الحاجات المهمة اللى حصلت فى اول شهرين من السنة؟ وايه القرارات المنتظرة من البنك المركزي في الأيام الجاية ؟ وهل ممكن الجنيه يستعيد وضعه ومكانته قدام العملات الأجنبية ؟
والبداية بأهم الحاجات اللى حصلت فى 2024 لحد دلوقتي وأهمها طبعا توقيع عقود رأس الحكمة اللى بيعتبر واحد من الأحداث الفارقة في تاريخ مصر خصوصاً أن الصفقة كانت بمثابة شهادة وفاة السوق السودا في مصر، وكان لها تاثير كمان علي اسعار الحديد والذهب والسلع اللي بيحتاجها المواطن بشكل يومي.
وبعد ساعات من توقيع عقود رأس الحكمة سعر للدولار للسوق السودا في التجار بالدولار في مصر، وسعر الدولار انحفض لأكثر من 35% بعد ما وصل لـ70 جنيها وحاليا قرب من الـ40 جنيه، والضربة دي لها تاثير علي كل السلع والخدمات الحاجات اللي بنتجاها في حياتنا اليومية.
طيب اية هيا السلع اللي اسعارها انخفضت بعد اعلان الحكومة لتوقيع عقود رأس الحكمة؟.
اول السلع اللي اسعارها انخفض بعد توقيع الحكومة لصفقة رأس الحكمة كان الذهب واللي اسعاره انخفضت من 3700 الي 3000 جنيها حاليا، ولسه اسعاره هتنزل تاني الفترة اللي جاية خصوصا ان الذهب كان متسعر في فترة من الفترات علي سعر بيع للدولار بـ 64 جنيه، وحاليا سعر الذهب عيار 21 وهو الاكثر انتشارا في الاسواق متسعر علي 54 جنيه، وده مش سعره العادل ومتوقع انه سعره ينزل لحد 2700 جنيه.
ثاني الحاجات اللي سعرها انخفض بشكل كبير كان حديد التسليح واللي سعره انخفض باكثر من 20 الف جنيه، في الاسواق بعد ما وصل سعره لاكثر من 64 الف جنيه، وحاليا سعره يقارب لـ 45 الف جنيه للمتسهلكين، وفي توقعات ان ينزل اكثر في الفترة اللي جاية مع وصول فلوس راس الحكمة لخزينة البنك المركزي، وده هيكون له انعكاس كبير علي اسعار العقارات واراضي المباني وغيرها.
طيب ايه هي الملفات اللي البنك المركزي لسه محسمهاش ومنتظر تخلص في الشهور الي باقية من 2024؟
طبعا في البداية واهم وأخطر ملف فيهم هو التعويم أو تحرير سعر الجنيه أو الوصول للسعر المرن وده ابو الملفات المؤجلة من فبراير اللي فات يعني ليه سنة كاملة وكان محل خلاف عنيف وحاد بين الحكومة المصرية وصندوق النقد الدولي وكلنا عارفين قصة القرض والخلاف على تعويم الجنيه بعد ما الظروف الدولية حكمت وبقي مستحيل يحصل تعويم والبلد فيها أزمة نقص دولار حادة وسوق سوداء بتبلع أي دولار في السوق ولو حصل تعويم وقتها كانت مصر تقريبا دلوقتي في فوضى مدمرة واسعار خيالية وفعلا السيسي رفض تماما فكرة التعويم وقتها وبعدها دخلت مصر في مفاوضات طويلة مع الصندوق عشان ملف التعويم ومتوقع في 2024 وخلال اسابيع حسم مصير تحرير الجنيه والي مبقاش بيشكل ضغط نفسي زي الاول على الدولة بعد صفقة رأس الحكمة وتوافر سيولة دولارية.
من التعويم نروح على طول على ملف القرض لأنهم مرتبطين ببعض زي ما شفنا ومن ساعات مديرة صندوق النقد الدولي قالت إن الاتفاق على القرض الجديد لمصر انتهي وهيتم الاعلان عنه خلال أسابيع قليلة يعني في حدود شهر او شهر ونص بالكتير وحسب التسريبات قيمة القرض بتوصل ل20 مليار دولار مشاركة بين الصندوق وطرف تاني بضمان الصندوق ومتوقع حسم ملفين التعويم والقرض قبل نهاية أبريل اللي جاي.
من بين الملفات المتعلقة في 2024 ولسه ماتعملتش هو صدور مؤشر الجنيه واحنا عارفين إن البنك المركزي المصري كشف عن مشروع مؤشر الجنيه من بدري اووي وكان المفروض هيتفذ لكن لسه ما صدرت بشكل رسمي ومؤشر الجنيه ده عشان نفكر حضراتكم هو عبارة عن مقياس حقيقي وعادل لقيمة الجنيه المصري قدام سلة من العملات الرئيسية من بيتها الدولار والمؤشر ده هيقطع الطريق قدام اي تلاعب أو مضاربات على سعر الجنيه وكفاية إن العملة الصمري. اتظلمت جدا في صراعها مع الدولار ودا بعد تأكيد مؤسسات مالية دولية إن الجنيه مقوم بشكل غير عادل امام الدولار وإن سعره العادل والحقيقي 27 جنيه وده في عز أزمة الدولار وصدور مؤشر الجنيه هيحط قواعد شفافة لقيمته الحقيقية.
كمان من الملفات المنتظرة في 2024 هو استفادة مصر من تجمع بريكس وكلنا عارفين قصة انضمام مصر للتكتل الدولي العالمي واللي بيضم قوى عظمي اقتصاديا زي الصين وروسيا والهند والمكسيك ومفترض مصر هتستفاد سواء من تمويلات مباشرة من بنك التنمية التابع البريكس
كمان مصر في انتظار صدور الجنيه الرقمي واللي المفروض هيصدر في 2030 لكن فيه مطالب عاجلة بتسريع إصداره لانه بقي ضرورة ملحة في عصر الرقمنة والدفع الالكتروني والجنيه الرقمي زي الورقي بالظبط في القيمة والمعاملات بس كل الحكاية إن الدفع بيه بيتم الكتروني ومش بيتحط في المحفظة ولا بيتقطع لكن كل حاجة بتم الكتروني اونلاين كمان وطبعا الحنيه الورقي هيوفر كتير على الدولة وهيقصي على عصابات التزوير والنصب وهيواكب التطور الهائل في التكنولوجية المالية.
طب ايه القرارات اللى هياخدها البنك المركزي فى باقي 2024 ؟
فيه قرارات كتيرة البنك المركزي هياخدها الفترة الجاية وبتنقسم القرارات دي الى مجموعتين مجموعة قرارات عاجل هتصدر خلال أيام لضبط فوضى السوق السودا والقضاء بشكل نهائي على المضاربة على الدولار واستعادة الثقة فى القطاع المصرفي بالنسبة لبعض القطاعات ومجموعة قرارات تانية على المدى البعيد هيكون ليه تاثير كبير جدا على سوق الصرف وعلى سعر الدولار فى السوق الموازية
كمان البنك المركزي شغال فى مفاوضات متقدمة مع عدد من الدول تحديدا الدول الاعضاء فى تجمع بريكس لتوقيع عدد من الاتفاقيات الخاصة بتبادل العملات المحلية ودي اتفاقيات بتخليك تبيع وتشترى اى حاجة مع الدول دي بعملتك وعملتهم وتتخلى عن الدولار فى التعاملات التجارية وده بيخفف الضغط بشكل كبير عن الاحتياطيس النقدي وبيوفر اسواق جديدة وسلع ارخص لأنك لما تدفع بالدولار غير لما تدفع بالروبل او الين
طب والاسعار والجنان اللى حاصل فى الاسواق ؟
ده واحد من الملفات اللى الدولة بمختلف اجهزتها شغال عليه وشفنا بشاير انخفاضات فى قطاعات مهمة زي الحديد والدهب وبعض السلع الغذائية ووفقا لتوقعات حكومية فالمفروض خلال شهر بالكتير التراجع الكبير اللى حصل فى سعر دولار السوق السودا يسمع فى اسعار السلع مع الافراج عن البضايع الموجودة فى الموانى وتوافر المواد الخام
يعنى كده الجنيه ممكن يسترد جزء من عافيته فى 2024 ؟
لغاية دلوقتى المؤشرات كلها بتقول ان الجنية السنة دي هيحصل على دعم كبير وان وضعه هيكون افضل بكتير من اخر سنتين لكن الموضوع هياخد شوية وقت لغاية ما الامور تتظبط وده موضوع محتاج شغل كتير من الحكومة والبنك المركزي لتعظيم عوائد الدولار التقليدية زي عوائد السياحة وقناة السويس وكمان الصادرات واعادة تحويلات المصريين فى الخارج الى مستوياتها الطبيعية كمان مواجهة السوق السودا بكل قوة والقضاء عليها نهائيا.
