إيه اللي بيحصل في المطارات المصرية.. فكر جديد للإدارة

هو ايه اللي بيحصل في المطارات المدنية المصرية وصحيح الدولة هتبيع مطار القاهرة والإسكندرية وغيرها وهل ممكن الدولة تتخلي عن المطارات لصالح جهات اقتصادية.. تعالوا نشوف إيه الحكاية
 

في الساعات الأخيرة الكلام زاد اوووي والإخوان سابوا مشروع رأس الحكمة لما تعبوا من الإشاعات والكذب والتضليل وحاولوا يشوهوه بكل الطرق ومسكو في موضوع تاني مهم ليه علاقة بالأمن القومي المصري وقالوا الحقوا الحكومة هتبيع المطارات المصرية ومش هيبقالها سيادة عليه وكل الإشاعات والزيف اللي رددوه قبل كده رجعوا يكرروه تاني وطبعا معروف اي حاجة بيهاجمها الإخوان يبقي تعرف على طول ومن غير تفكير أنها مصلحة كبيرة للبلد وفيها خير كتير جدا لأنهم اكتر بيكرهوا الخير للبلد دي وكل همهم الهجوم والتحريض والتشويه 24 ساعة في اليوم.
طيب إيه الي بيحصل في قطاع الطيران المدني.. شوف حضرتك لازم نعرف ونتأكد إن مفيش شبر على أرض مصر مش بيخضع للدولة المصرية وان مسألة السيادة دي غير قابلة للنقاش فمحدش يصدق إن فيه جهة أو هيئة أجنبية اقتصادية ليها سلطة غير سلطة الدولة المصرية والحقيقة الكلام عن السيادة احنا ردينا عليه قبل كده بالتفصيل وقلنا مفيش مشروع في مصر إلا وبيخضع للقانون والسلطات المصرية وغير كده عبث.. وفيه حاجة تانية لازم نأكد عليها وهي إن المنافذ عامة زي الموانئ والمطارات والطرق الدولية دي بتخضع لمفهوم الأمن القومي ولازم تكون خاضعة بشكل كامل وكبير للأجهزة المصرية واي كلام يتقال غير كده يبقي تخاريف وناس بتهزر زي اخوانا البعدا بكده.

الحكاية إن قطاع الطيران المدني والمطارات جزء كبير منها قطاع اقتصادي يعني المفروض قطاع بيكسب وبيطور وبتخصع ليه عشرات الشركات التابعة في الخدمات الجوية والضيافة والصيانة والمتابعة والفنادق وعقد الصفقات ودراسات الجدوى للخطوط الجوية المصرية.. لكن في نفس الوقت دا قطاع محتاج استثمارات ضخمة عشان يحقق العائد منه وشفنا ازاي مصر للطيران خرجت من تصنيف أفضل شركات الطيران العالمية نتيجة لقلة ملاحقة التطور اللي بيحصل في العالم.. طيب ايه اللي بيحصل في مطارات العالم ومش بيحصل عندنا.. شوف حضرتك مفيش فرق غير إن الدول اللي بره أسندت عمليات إدارة المطارات والمقصود هنا المنظومة الاقتصادية في شركات وهيئات المطارات للقطاع الخاص والشركات المتخصصة وجابت ناس تصرف عشان تطور وتكسب في نفس الوقت ومن غير ما تمس سيادة الدولة على المطارات ولا الجمارك ولا الإجراءات الأمنية.

من ساعات وزير الطيران المدني المصري كشف عن خطة جديدة لإدارة وتشغيل المطارات المصرية هيتم الاعلان عنها قريب في مزايدات عالمية وإنه هيتم طرح المزايدات لإدارة وتشغيل المطارات المصرية، وإن جميع المطارات هتكون متاحة، بما فيها مطار القاهرة الدولي والهدف من الطرح هو توفير تجربة طيران أفضل للركاب وتحديث الخدمات وتطوير الأداء وفي إطار السعي لدمج القطاع الخاص تنفيذا لسياسات الدولة..
يعني باختصار كده خطة إسناد التشغيل وإدارة المطارات المصرية هدفها التطوير والتحديث والمنافسة وتحويلها لمطارات عالمية ومصدر للجذب والاستثمار الاقتصادي والسياحي والتجاري.