لغز السكر وسر الصبر على المصيلحى.. أزمة خلقتها الفوضى

ايه العبث اللي بيحصل في سوق السكر ده وليه الرئيس صابر على وزير التموين والسؤال الأهم هو السكر بيروح فين.. أسئلة كثيرة المواطن من حقه يعرف الإجابة عليها..
 

الحقيقة أزمة السكر في السوق بقت لا تطاق ونقدر نقول أصلا مفيش سكر في السوق حرفيا في وقت وزير التموين الدكتور علي مصيلحي بيطلع يقول مفيش أزمة وكأنه منفصل عن الواقع بعيدا عن بدالين التموين حرفياً مفيش كيس سكر في أي سوبر ماركت في وقت الإنتاج موجود والتوزيع موجود وحلقة السوق شغالة بس حلقة مقفولة على التجار وأصحاب المصانع ومحلات الحلويات الكبيرة لكن المواطن بيدوخ على كيس سكر ودي أزمة الإعلام اتكلم فيها ولسه بيتكلم لكن يظهر أن وزير التموين عايش في كوكب تاني وده بيطرح سؤال مهم ليه الرئيس السيسي والدكتور مدبولي صابرين على الوزير ولا لازم كل أزمة الرئيس يتولاها بنفسه عشان تتحل.
طالما فيه سكر في السوق ومش بيوصل للمواطن يبقي فيه خلل وفساد وانعدام رقابة.. احنا بقي هنقول ياوزير التموين السكر بيروح فين.. في العادة بيطلع من المصانع بيروح لحيتان التوزيع ومصانع التعبئة والمفروض يروح بعدها على المحلات لكن ده مش بيحصل واللي بيتم إنه بيتم توزيع بين التجار الكبار واللي بيخزنوه عشان يعطشوا السوق وبعدين يبيعوا بالسعر اللي يحددوه ومش بعيد كيلو السكر يوصل 100 جنيه لأن سعره دلوقتي لو حد قدر يشتري كيلو بالواسطة ب80 جنيه ودا كله الوزير بيقول السكر متوفر.
كلها ايام ويدخل شهر رمضان الكريم وساعتها السكر هيظهر بأسعار فلكية وفي وقت مفيش حملات كبيرة على أصحاب مخازن السكر تخليهم يخافوا والحقيقة اللي حصل قبل كده والقبض على مسؤولين وتجار وأصحاب مصانع وشركات بيقول إن لسه الفساد موجود وهو السبب في أزمة اختفاء السكر