أزمة الدولار هتبقى تاريخ.. كيف أوفى السيسي بوعده في أقل من عام؟
يا ترى ازاي الرئيس السيسي أوفى بوعده بحل أزمة الدولار في اقل من سنة؟ وايه حكاية تصريحه اللي قلب الدنيا وغير من تفكير الحكومة؟ وايه اللي يخلي الإمارات تدفع ١٨٥ مليار في حتة صحرا؟ وايه المليارات اللى هتدخل مصر بعد صفقة رأس الحكمة؟
في شهر ابريل 2023 كان الرئيس السيسي بيزور سينا وخلال تفقده لأحد التمركزات الأمنية هناك وقف واتلكم مع الجنود بتلقائية عن الأزمات اللى بتمر بيها مصر وازاى مصر طول تاريخها مرت بأزمات كتير وبسبب تماسك ولادها وأهلها قدرت تعبر كل المشاكل والتحديات اللى واجهتها.. يومها الرئيس أتكلم عن أزمة الدولار اللى مصر بتعانى منها من بعد اندلاع الحرب الروسية الأوكرانية وقال ان الأزمة دي كمان هتبقا تاريخ قريب.. وقبل ما تفوت سنة على كلام الرئيس واضح ان أزمة الدولار فعلا في طريقها للحل بعد اعلان الصفقة الكبرى بين مصر والامارات اللى تضمنت اتفاقية شراكة في مشروع رأس الحكمة هتحصل مصر مقابلها على مبلغ 35 مليار دولار خلال شهرين بالإضافة الى 35 % من أرباح المشروع مع ضخ استثمارات في الانشاءات وغيرها بمبلغ هيوصل الى 150 نليار دولار
طب ازاي السيسي قدر ينفذ وعده ؟
أول ما الرئيس بدأ يشعر ان الدولار تحول الى سلعة وبقا عليه مضاربات وان ده انعكس على أسعار كل حاجة في مصر بقا شغله الشاغل ازاى يقضى على أزمة نقص العملة ويمنع المضاربات على الدولار وفى تصريحات ليه من حوالى شهر كده قال نصا انا لو حليت أزمة نقص الدولار مفيش حاجة تهمني وعشان كده التصريح ده وغيره عمل تغيير جذري في تفكير الحكومة والأجهزة المعنية وبقا فيه ضربات أمنية قوية بتوجه لتجار العملة وأى حد يثبت تورطه في تداول الدولار بعيدا عن القطاع المصرفي
كمان الرئيس بدأ يتحرك في اكتر من اتجاه أولهم كان جذب الاستثمار الأجنبي المباشر وعدم الاعتماد بأى شكل من الأشكال على الأموال الساخنة اللى خرجت من السوق مع أول هزة في الاقتصاد العالمي
وأول ثمار تحركات السيسي كان توقيع اتفاقية صفقة راس الحكمة اللى مش هتكون اخر صفقة وخلال الأيام الجاية هيتم الإعلان عن صفقات بمليارات الدولارات وممكن كمان تكون في مستوى الصفقة الكبرى دي أو اقل حاجات بسيطة
مش بس كده السيسي اتحرك كمان في اتجاه تانى وعمل اتصالات على العى مستوى للوصول الى اتفاقيات مبادلة عملات محلية خصوصا مع الدول العضاء في تجمع بريكس اللى مصر انضمت ليه بشكل رسمي في بداية 2024 وفعلا تم الإعلان عن اتفاقيات مع دول زي الامارات وقرب الاتفاق مع دول تانية زي السعودية وروسيا وتركيا والصين وغيرهم والاتفاقيات دي الهدف منها التخلي عن الدولار في المعاملات التجارية وتخفيف الضغط على الاحتياطي النقدي من العملات الأجنبية
نيجي بقي للسؤال الأهم في الصفقة التاريخية وهي صفقة رأس الحكمة.. والسؤال هو إيه اللي يخلي الإمارات تدفع 185مليار في حتة صحرا.. وإزاي السيسي حول الرمال إلى دهب؟ والإجابة على السؤالين دول هي نفس الإجابة عن نفس الأسئلة اللي اتقالت لما تم الإعلان عن مشروع العاصمة الإدارية الجديدة.. فاكرين حضراتكم اتقال ايه .. تعالوا نفكركم.. اتقال ياسيدي إن السيسي ضيع فلوس المصريين ورماها في الصحرا وكلنا فاكرين الإعلام اياه لما قالك راحت فلوسكم يامصريين السيسي رماها في الصحرا ولما اتقال ليه السيسي بيعمل مدينة وعاصمة جديدة في الصحرا ومين هيروح يشتري ويسكن هناك.. وغيرها من الأسئلة والتحريض والتسخين والنتيجة العاصمة الإدارية دلوقتي الفرخة اللي بتبيض مليارات ومتر الشقة في الصحرا وصل 30 ألف جنيه والمضحك في قصة العاصمة الإدارية إن لما الاسكان باعت لشركة هشام طلعت اراضي في الصحرا جمب العاصمة باجمالى العائد النقدى الكاش28 مليار جنيه، ويصل الرقم (عيني ونقدي) إلى 77 مليار جنيه كحد أدنى طلع الإعلام إياه وقالك إن السيسي باع ارض العاصمة بتراب الفلوس وسبحان الله مش دي الأرض اللي قلتوا عليها صحرا وببلاش إلا ربع رجعت دلوقتي بقت بمليارات بعد السيسي ماخلى الرمال دهب.
وزي ما قال إعلام الإخوان وأهل الفتنة عن مشروع العاصمة الإدارية وقبلها مشروع قناة السويس الجديدة وغيرها وغيرها بيقولوه دلوقتي على مشروع رأس الحكمة وهيقلوا على اي مشروع هتعلن عنه الدولة وعشان بردو نرد علي إعلام الجهل ليه الإماراتيين دفعوا المبلغ ده كله في مشروع رأس الحكمة شوف يافندم مفيش مستثمر ساذج هيحط دولار واحد في مشروع مش هيكسب قصاده دولار واتنين وعشرة دولارات لأن مفيش عواطف وصداقات ومعلش في الاستثمار وراس المال جبان مش بيشتغل في أي سوق فيه قلق أو مشاكل ومعروف إن الإماراتيين اشطر ناس في الاستثمار والبيزنس على مستوى العالم وعاملين أضخم مشروعات في أوروبا وامريكا وآسيا وإلا مكانتش الامارات بقت بالتقدم ده وعشان كده لما يجوا يستثمروا في السوق المصري فدا معناه أنهم عارفين من دراسة السوق كويس أنه سوق جاذب للاستثمار ومربح اكتر من غيره من أسوأ المنطقة والا كانوا راحة عملوه في تركيا ولا الهند.
طيب ليه السوق المصري جذب اهتمام وملياارات الإماراتيين؟
ده بقي السؤال الأهم حضرتك.. ودا بيرجعنا لكلام الرئيس السيسي من سنين لما قال للاسف احنا شبه دولة ومعندناش حاجة كاملة في أي قطاع لكن ده كله هيتغير وفعلا اتغير لأن مصر مكانتش عندها بنية أساسية تستوعب اي استثمارات أو مشروعات ضخمة وفين المستثمر اللي هيجيلك والكهرباء بقطع طول اليوم وليه المستثمر هيجيلك ومعندكش طرق ولا محاور ولامواني توصله لمشروعه ولا تخليه يعرف يصدر ويبيع ويسافر ويجي.. وعشان كده السيسي بدأ ولايته الأولى في إعادة بناء احدث واقوى شبكة بنية تحتية في تاريخ مصر من كهربا وطرق وموانئ ومطارات وبنية رقمية حديثة وإصلاح تشريعات الاستثمار واختراع الرخصة الذهبية وتسهيلات ومزايا وحوافز للاستثمار .
لو جينا للطرق هتلاقي السيسي أعاد احياء الساحل الشمالي المصري كله واكتشاف ثرواته وكنوزه بشبكة طرق ومحاور حديثة زي طريق سيوة مرسي مطروح وطريق ومحور الضبعة واللي ربط مطروح والساحل الشمالي بمحافظات مصر واختص المسافات بالساعات وده غير تطوير مشروع الطريق الدولي الساحلي ومشروعات السكة الحديد والقطارات السريعة اللي بتخلص دلوقتي عشان تربط الساحل الشمالي كله بشبكة سكة حديد مصر .. كمان الدولة عملت موانئ عملاقة لخدمة الساحل زي تطوير ميناء الإسكندرية وميناء مطروح ..
واهم واذكي خطة نفذها السيسي لإحياء الساحل الشمالي وتحويل الرمال لصحرا هي مشروع العلمين الجديدة واللي قلب شكل الاستثمار في المنطقة كلها واللي بقت درة المدن في الساحل الشمالي وفي حوض البحر المتوسط لدرجة إن كل الوحدات الللي لسه بتتعمل اتباعت وده غير أنها جذبت أكبر شركات العالم في السفر والفنادق لإقامة مشروعات فيها لانها هتبقي من أهم المدن على خريطة السياحة العالمية ومش هنبالغ لو قلنا إن العلمين الجديدة ايه اللي جابت راس الحكمة واللي هتجيب باقي المشروعات العملاقة في الساحل الشمالي.
طب ايه المليارات اللي هتدخل مصر الفترة الجاية؟
الخطة الاستراتيجية للاقتصاد الوطني 2024 – 2030 قايمة علي الوصول لتحقيق 300 مليار دولار بنهاية 2030، وفعلا الحكومة بدأت تحط قواعد انتهاء ازمة نقص العملات الاجنبية في مصر، وبدأت تنوع مصادر الدخل الدولاري لمصر من كذا حتة وحاليا السوق السودا شبه انتهت تماما خصوصا بعد ما الحكومة ضربت ضربتها القاضية باعلان توقيع صفقة رأس الحكمة باستمثارات هتوصل لـ 35 مليار دولار، هتدخل منها 15 دولار للبنك المركزي بعد اسبوع، و 20 مليار بعد شهرين.
و اية هيا خطة بناء الاقتصاد المصري من جديد في الولاية الرئاسية الجديدة؟
اعادة بناء الاقتصاد الوطني هدف اساسي ورئيسي للحكومة الجديدة خصوصا بعد المطبات الشديدة اللي حصلت خلال الفترة اللي فاتت، وبدأت الحكومة ترتب اوراق اعادة بناء الاقتصاد الوطني بالتوصل لأتفاق مع صندوق النقد الدولي للحصول علي باقي قرض 3 مليار، والمفاوضات بين الحكومة المصرية ومسئولي صندوق النقد نجحت في رفع قيمة القرض لما يقرب من 10 مليار دولار.
الحكومة كمان بدأت تدور علي مصادر تانية لحل أزمة الدولار في مصر، وكان الخبر السعيد الثاني باعلان الاتحاد الأوروبي تخصيص 10 مليار دولار لمصر ضمن خطط الاتحاد لتعميق علاقاته مع القاهرة والتعاون مع الحكومة المصرية فى ملفات مهمة منها الطاقة والهجرة غيثر الشرعية وكمان المشروعات البيئة.
ولأن الأخبار الحلوة لما تيجي بتيجي مع بعضها، الحكومة المصرية توصلت لاتفاق مع دولة الامارات لإقامة مشروع سياحي استثماري كبير في منطقة راس الحكمة وتاسيس شركة باسم رأس الحكمة هتكون شركة مساهمة مصرية لتطوير المشروع خصوصا ان الحكومة بتهدف انها تحول الساحل الشمالي كمطقة امتداد سكاني لمصر مش منطقة مصايف بس، وان الشركة الاماراتية هتضخ١٥٠ مليار دولار كاستثمارات في المشروعات، وان المشروع مقسوم لجزئين اولهم جزء مالي هتقدمه الشركة الإماراتية كمقدم والجزء الثاني هو الأرباح واللي هتوصل لـ ٣٥ مليار دولار، ومصر هستقبل الدفعة الاولي من التعاقد خلال أسبوع بقيمة ١٥ مليار دولار منهم 10 مليار دولار جايين من الخارج والـ 5 مليار الثانيين هتنازل عنهم الإمارات من الودائع بتاعتهم في المركزي المصري، وبعد شهرين هنستلم ٢٠ مليار دولا ثانيين منهم ١٤ مليار دولار سيولة مباشرة و ٦ مليار دولار هتنازل عنهم الإمارات من ودايع البنك المركزي .
