خلي بالك من المضروب.. لعبة التجار الخبيثة وازاي تعدي رمضان من غير ماتصرف

 
ايه حكايه الياميش والبضايع نص عمر اللي التجار ناويين يعرفوا بيها السوق قبل رمضان وازاي التجار استغلوا الأزمة في التخلص من البضاعة القديمة والمرونة.. وازاي تدبر أمورك في رمضان علشان الميزانية ما توهش منك.. خلي بالك وانت بتشتري تعالوا نشوف الحكاية
 

زي ما فيه تجار عندهم ضمير فيه تجار تانية استغلوا الأزمة الاقتصادية أسوأ استغلال وخزنوا كميات كبيرة من البضايع زي السكر والزيت وغيرها من البضايع ولأن مفيش استيراد لحاجات كتير الدولة شافت أنها كمالية زي ياميش رمضان التجار إياهم عندهم نية لعرض بضايع قديمة ومنتهية الصلاحية أو قربت تنتهي وعشان كده وزارة التموين حذرت الناس من شراء اي بضاعة قبل التأكد من صلاحيتها وجودتها لأن فيه تجار هيعرضوا ياميش رمضان بتاع السنين اللي فاتت على أنه جديد والاغراء هيكون تخفيض الأسعار ودا غير سلع تانية كانت مركونة عندهم زي الارز والفول والعدس واللي الناس بتشتريهم بشكل كبير في الشهر الكريم.

طبعا التجار عشان عندهم سلع كتير جديدة متخزنة فأكيد هيطرحوا السلع القديمة عشان يستفادوا باي فلوس بدل ما تترمي وبيعتمدوا في ده على معدة المصريين اللي بتبلع الزلط عشان كده لازم تتأكد من كل حاجة بتشتريها ولو لقيتها بايظة رجعها فورا وبلغ عن التاجر في مباحث التموين واوعى يصعب عليك لانه هو نفس التاجر اللي رفع عليك الأسعار وهتلاقي عنده مخازن كتير مخبي فيها السلع عشان حضرتك تشتري بالغالي .

ونيجي لمصاريف رمضان ورغم إنه شهر عبادة لكن للاسف المصاريف فيه بتكون كبيرة واضربها في 3 أو 4 أضعاف والمصريين بيصرفوا حوالي 100 مليار جنيه على الاكل بس في رمضان ودا رقم ضخم في شهر الصوم عشان كده هنقولك نصايح تعدي بيها الشهر الكريم على خير أولها انك تعتبره شهر عادي جدا ومش لازم 50 صنف على السفرة وست الكل تطبخ على قد الوجبة بدل الاكل الكتير اللي بيترمي وتيجي تطبخ غيره اليوم التاني مهو الراجل مهدود حيله وصايم والولاد صايمين وصدقينا حيله مش هينهد لو وفرتي في المصاريف واشتريتي على القد وبدل الزبادي الغالية مثلاً هاتي لبن واعمليها في البيت وهتلاقيها أرخص واضمن كمان بلاش عزومات كتير قي رمضان وكل واحد فيه اللي مكفيه والعزومة دلوقتي بتكلف فلوس كتير كمان بلاش الفطار والسحور بره البيت كتير لان كل خروجة هتكلف جوزك مبلغ محترم.