الأسعار والقرض.. رسالة غامضة من الحكومة للمصريين
ازاي ممكن الاسعار تنزل في الوقت اللي مصر بتتفاوض عل. فلوس سلف وايه اللي قالته الحكومة والناس مخدتش بالها منه وياترى ممكن الحكومة تصدق المرة دي والاسعار تنزل وهل صحيح فيه اخبار حلوة من الصندوق.. هنتكلم مع حضراتكم ونشوف الحكاية إيه.
المصريين تعبوا من حاجتين من ارتفاع الأسعار الجنوني والسريع في كل حاجة ومن كلام الوزير مصيلحي والحكومة إن الأسعار هتنزل لانهم مش شايفين حاجة على الأرض وكل الموجود غلاء وارتفاع للأسعار في كل السلع وبنسب عالية جدا وصلت لارقام قياسية مقابل تصريحات وحملات محبتش نتيجة وبالعكس السكر لما كان موجود وسعره والوزير بدأ يتحرك اختفي خالص من السوق ولو بتدور على كيس سكر كأنك بتدور على ممنوعات ودي حقيقة مش هنقدر نخبي راسنا منها في الرمل.
المهم الوزير امبارح افتتح معارض أهلا رمضان والسكر فيها على الرف ب27جنيه وفي كل محافظة 3 معارض أهلا رمضان وده غير المنافذ والمعارض المتحركة وفي رأينا معارض أهلا رمضان دي هي الفرصة الأخيرة لوزير التموين لو استمرت فيها السلع بالشكل ده وبالاسعار دي هيبقى خفق كتير عن الناس ولو السكر وسلع تانية اختفت من المعارض بعد زيارة الوزير كده يبقي مصيلحي جاب آخره مع الشعب ولازم يستريح
بمناسبة كلام الحكومة الكتير كانت اخر حاجة قالها متحدث الحكومة وفي تصريحات على الهوا مباشرة المرة دي إن قال إن المشاورات مع صندوق النقد الدولي هتنتهي قريب جدا وهتكون نتائج إيجابية جدا وفيه تسريبات أن الصندوق تخلي عن شرط التعويم وهيسيبه للحكومة تتعامل معاه بطريقتها وكمان التسريبات بتقول إن القرض هيكون ضخم.
لكن متحدث الحكومة مقالش ازاي الأسعار هتنزل ولا ايه هي اجراءات الحكومة اللي هتنزل الأسعار بس هتكون غالبا توسيع المعارض ومبادرات السلع المخفضة وفي نفس الوقت هتضرب بيد من حديد على تجار السلع والعملة والدهب واللي حولوا حياة المصريين لكابوس كبير.
