ليه تعويم الجنيه محصلش؟ وسعر الدولار رايح على فين؟

يا ترى ليه لحد دلوقتي الحكومة والبنك المركزي ما خدوش قرار بخفض قيمة الجنيه؟ وامتى ممكن يحجصل تحريك فى سعر الصرف ؟ وايه توقعات سعر الدولار فى البنوك الفترة الجاية؟

اللى متابع اللى بيحصل فى سوق صرف العملات فى مصر هيعرف ان فيه كلام بيتردد بقاله حوالى سنة تقريبا عن تعويم مصر للجنية للمرة الرباعة فى اقل من سنتين وكل التقارير اللى بتصدر عن مؤسسات التمويل الدولية من مارس 2023 بتقول ان فيه تخفيض قادم لقيمة الجنيه والخلاف يمكن بس على نسبة التخفيض لكن مسألة ان فيه تعويم ولا لأ منتهية بالنسبة للى بتقولوا مراكز الأبحاث ووكالات التصنيف الائتمانى وبنوك الاستثمار

طب يا ترى ليه الحكومة مخدتش قرار التعويم لحد دلوقتي؟

لازم تكون عارف ان قرار تخفيض قيمة العملة قرار مش سهل ابدا والقرار ده بيسمع فى حتت تانية كتير وأهمها طبعا مستويات الدين الحكومي وتكلفة الاقراض بالاضافة طبعا الى اسعار السلع اليومية وعشان كده تقدر تقول ان تخفيض قيمة الجنيه شر لابد منه والدولة مش بتلجأ ليه غير لما بتكون خلاص استفذت كل الحلول ومفيش اى حل تانى للتعامل مع التضخم والفجوة بين سعر الدولار الرسمي وسعره فى السوق السودا

وده يفسرلك ليه الحكومة لحد دلوقتى ما خدتش قرار التعويم الرابع .. لأنها بتحاول على اد ما تقدر تتفادى القرار او تشوف بدايل تانية ليه لكن لو اضطرت تعوم الجنيه فلازم كام حاجة تتوفر الأول

طب ايه الحاجات اللى لازم تحصل قبل قرار التعويم ؟

قرار تخفيض قيمة العملة او تعويم الجنيه هيعتمد إلى حد كبير على المفاوضات الجارية مع صندوق النقد الدولي من جانب الحكومة المصرية واللى من خلالها بتحاول الحكومة تحصل على تمويل اضافي ورفع قيمة القرض القديم من 3 اغلى ما بين 10 و12 مليار دولار والهدف من ربط قرار الحكومة بمفاوضات الصندوق هو ان تحريك سعر الصرف محتاج توافر سيولة دولارية كبيرة يقدر يستخدمها صناع السياسة النقدية للسيطرة على السوق السودا للعملة ويكون البنك المركزي من خلالها هو المتحكم فى سعر الصرف لأن من غيسر السيولة دي سعر الدولار فى السوق السودا ممكن يوصل لمستويالت صعبة جدا لو حصل تعويم من غير توفير غطاء نقدي من العملة الأمريكية.

طب ايه اهداف خفض الجنيه المحتمل ؟

الحكومة حاطة 3 أهداف رئيسية لقرار التعويم أولها توحيد سعر الصرف والقضاء على السوق الموازية للعملة بالاضافة الى تقليل عمق أي تخفيض للعملة وأخيراً ضمان استقرار العملة على المدى المتوسط.

وعشان تحقق الأهداف دي لازم يتوفر شرطين الأول مرتبط بضرورة تساوي الطلب والعرض على العملات الأجنبية بغض النظر عن المستوى المطلوب للتخفيض والتاني ضمان وجود احتياطيات من العملات الأجنبية تكفي لتلبية الطلب من دون انقطاع عن النطاق المستهدف لسعر الصرف

طب لو حصل تعويم السعر المتوقع للدولار فى البنوك كام؟

التوقعات معظمها بيدور ما بين 40 الى 45 جنيه وده السعر العادل للدولار وفقا لكتير من الخبراء والمحللين