مطلب عاجل وتحذير خطير.. صدمة صندوق النقد لمصر

فيه تطورات سريعة ومتلاحقة بتحصل فى المفاوضات بين مصر وصندوق النقد الدولى.. وكل شوية بيتم الكشف عن كواليس اللى بيحصل فى الغرف المغلقة بين المسئولين المصريين ومسئولى الصندوق.. ولحد دلوقتي المفاوضات شغالة للوصول الى اتفاقات نهائية لكن فيه مفاجآت وصدمات بتقول ان المفاوضات مش سهلة خالص وان الحكومة لحد دلوقتى مش قابلة بكل شروط الصندوق.. فيا ترى ايه الخلافات الحالية بين مصر والصندوق ؟ وايه الشروط اللى الصندوق عاوز يفرضها على الحكومة؟

من ساعات كان فيه تصريحات مهمة وخطيرة لمديرة صندوق النقد الدولى مرت كده ومحدش خد باله منها بس اللى هيركز فى الكلام اللى اتقال هيعرف ان بين السطور فيه رسايل وفيه ضغوط بيمارسها الصندوق فى مفاوضاته مع مصر

مديرة صندوق النقد الدولي كريستالينا جورجييفا تطرقت للحديث عن التفاوض اللى بيحصل مع الحكومة وقالت  إن الزيادة المرتقبة في الدعم اللي هيقدم إلى مصر هتكون كبيرة وأعلنت أن فريق الصندوق بلغ المراحل النهائية لإنجاز المراجعتين الأولى والتانية لبرنامج مصر وقالت ان ده هيحصل خلال اسابيع.

طب الكلام ده معناه ايه ؟

الكلام ده بيقول ان لسه فيه خلافات بين الحكومة والصندوق حوالين مرونة سعر الصرف وده الشرط اللى الصندوق كان مصمم عليه لأنه شايف ان الجنيه مقيم بأعلى من سعره والدليل وفقا لوجهة النظر مسئوليه ان فيه فجوة كبيرة بين السعر الرسمي فى البنك وسعر الدولار فى السوق السودا فى الوقت اللى الحكومة شايفة ان الجنيه مقيم بأقل من سعره وان السبب هو ازمة نقص العملة ومع توافر سيولة دولارية الجنيه هيسترد عافيته واللى اكد الكلام ده انه مع خبر واحد عن توقيع الحكومة اتفاقية مع مستثمرين امالراتيين لضخ 22 مليار دولار السوق السودا للعملة انهارت وسعر الدولار انخفض بحوالى 20% على الأقل.

مديرة صندوق النقد قالت كمان  أنه مطلوب من مصر الالتزام ببعض الأمور منها جدولة المشاريع الكبرى قيد الإنجاز وبرنامج الطروحات الحكومية وقالت ان الصندوق مش عاوز الحكومة  تتسرع الحكومة في بيع حصص بشركات مملوكة للدولة في ظل الظروف الصعبة الحالية وأكدت ان الأوضاع في غزة ضغطت على مصر.
وعشان تعرف الكلام ده معناه ايه .. لازم تكون عارف ان صندوق النقد كان طول الوقت بيدعوا الى تخارج الدولة من النشاط الاقتصادي لكن دلوقتى مش عاوزة الحكومة تبيع الا لما تخفض سعر الجنيه الول وده معناه ان الحكومة هتخسر فى الصفقات اللى هتتنفذ مبالغ كبيرة

طب بعد الكلام ده كله فى قرض جديد لمصر ولا لأ ؟

بص لمسبة كبيرة الاتفاق بين الحكومة والصندوق بيخلص بس طبعا الصندوق بيستغل الوضع الصعب لمصر وأزمة شح العملات الأجنبية وبيحاول يفرض شروط صعبة زي ما حصل فى اتفاق قرض ال 3 مليار دولار لكن تقدر تقول ان القرض الجديد تم الاتفاق عليه وهيتم رفع قرض ال 3 مليار من 10 الى 12 مليار دولار