الدولار بيوقع في السوق السوداء.. الأسعار هتنزل امتي

 

ياترى الدولار هينزل تاني..وطيب وامتي الأسعار تنزل في السوق والناس ترتاح والبنك المركزي ناوي على إيه الأيام الجاية.. خليكم معانا لأخر الفيديو
 

 
زي ما احنا شفنا امبارح ازاي السوق السوداء للدولار بدأت توقع واسعار التداولات للعملة الأمريكية انهارت بشكل كبير وخسر الدولار في السوق الموازية  18 جنيه خلال تعاملات امبارح بس مقارنة بمستواه يومي الثلاثاء والأربعاء الماضيين، ووصل ما بين 54 و55 جنيه لغاية دلوقتى وكل المؤشرات بتقول إنه لسه هينزل تاني لغاية ما يوصل لنقطة الاستقرار اللي البنك المركزي المصري ناوي عليها..

طبعاً لأن الدولار زي ما قلنا قبل كده كتير هو سبب أزمات مصر والمصريين والأسواق والاسعار والغلاء نتيجة المضاربة عليه في الدهب والحديد والعقود الآجلة والاستيراد والتداولات وفي القروض وعشان كده اي نزول في سعره ده بيعتبر حدث سعيد جدا جدا لكل المصريين ولأن كل الزيادات بتحصل من ارتفاع العملة الأمريكية اللي بتتعامل بيها في الاستيراد وغيره... طيب ده معناه السلع هتنزل فورا .. لأ حضرتك طبعا بس دا معناه أولا الأسواق هتستقر بشكل كبير وعلى الأقل مش هتزيد زي كل مرة ولا تلاقي تاجر يقولك معلش الدولار زاد في السوق السودا يعني معدش فيه شماعة الناس ترمي عليها طمعها وجشعها وبعدها بقي تيجي مرحلة انخفاض الاسعار اللي كلنا منتظرينها ودي مش هتتحقق بشكل كامل غير لما الحكومة والبنك المركزي يخلصوا خالص ملف تحرير سعر الجنيه في البنوك ويبقي عندنا سعر واحد للصرف ومفيش سوق سودا وبكده السلع تاخد وضعها الطبيعي في الأسعار.

حد ممكن يسأل طيب امتى الحكومة تحرر سعر الجنيه.. دا سؤال مهم جدا وخلينا نقول إن كل اللي بيحصل ده مقدمات عشان خطوة تحرير سعر الجنيه أو التعويم وعشان لما يحصل تحرير يكون بأقل الأضرار الممكنة ومن بين الإجراءات دي رفع سعر الفايدة والتفكير في طرح شهادات ادخار جديدة بفايدة تاريخية قريب في السوق لجذب مزيد من الأموال اللي خارج نطاق البنوك وتحجيم التضخم، وبعدها هيحصل تعويم مدار يعني بالتدريج زي ما كان الاتفاق قبل كده بين الحكومة وصندوق النقد الدولي.