ملامح التعويم الجاي.. وليلة رأس الحكمة الفنكوش

متابعينا الكرام في كل مكان أهلا وسهلا بكم وتحليل جديد لأهم التقارير اللي قدمتها وحدة أبحاث بانكير على منصاتها الإلكترونية على مدار اليوم السبت 3 فبراير 2024
 

تعويم الجنيه

البداية كانت مع تقرير مهم تناول ألية تحرير سعر الجنيه المصري في الفترة القادمة واللي هتعتمد على التدرج والتعويم خلال مراحل.

وقال التقرير إن فيه شبه أجماع بين الخبراء الاقتصاديين في مصر على إن أنسب حل هو التعويم الممرحل يعني تحرير سعر الجنيه يكون على مراحل ولغاية ما نوصل لآخر السنة لسعر متوازن يعني ممكن بكرة الاحد مع انتهاء إجازة البنوك نلاقي الدولار بقي ب32 جنيه مثلا وبعدها بأيام أو في الشهر اللي بعده يرفع ل35 جنيه وهكذا لغاية ما يوصل لسعر منطقي ينهي التداول في السوق الموازية للدولار.

وأضاف التقرير أنه مع كل زيادة في الدولار الرسمي السوق هيبدأ يستقر وفي المقابل سعره بينزل في الأسواق الموازية وهتبان ملامح سوق الصرف وفي نفس الوقت عجلة الاقتصاد المصري هتتحرك صح وصندوق النقد الدولي هيبدأ صرف القرض المعدل واللي وصل لمرحلة الاتفاق النهائي وبعدها هيبدأ تصنيف مصر الائتماني يخرج من خانة السلبية وبعدها الاستثمارات الأجنبية والمباشرة تقدر تدخل السوق المصري بقوة بعد حل أزمة تعدد سعر الدولار وده لازم يتم بالتزامن مع حملات قوية على الأسواق الغير شرعية عشان تضغط وتسرع عملية القضاء على السوق السوداء للدولار والمضاربات عليه وده هيخلق حالة من اليأس بين تجار العملة.
 

السوق السوداء

التقرير التالي اللي عرضته منصات بانكير كان بخصوص الل بيحصل في السوق السودا بعد قرار البنك المركزي برفع الفائدة والحملات ضد تجار العملة

وقال التقرير إنه في الساعات الأخيرة واصل دولار السوق السوداء  تراجعه بشكل ملحوظ وقوي و شهدت السوق الموازية لتبادل العملات الأجنبية ارتباك شديد أدى إلى هبوط سعر العملة الأمريكية.. والارتباك والتخبط اللى بيحصل جه بالتزامن مع صدور قرار البنك المركزي المصري المفاجئ بشأن رفع أسعار الفائدة.

ووضح التقرير إنه من المعروف أن حركة التداول في السوق الموازية لتبادل العملات الأجنبية بتكون هادية أيام الجمعة والسبت لأنها أيام عطلات رسمية ورغم كده شهد دولار السوق السودا تراجع ملحوظ وحاليا بيتحرك حوالين مستوى من 63 الى 66 جنيه بعد ما كان وصل الى فوق الـ 70 فى الايام اللى فاتت  بالتزامن مع اجتماع المركزي بشأن الفائدة وكانت الأسواق بتستعد لتخفيض جديد لقيمة العملة المصرية بالتزامن مع قرار السياسة النقدية.

وعرض تقرير بانكير أراء كتير من الخبراء حول رفع سعر الفايدة من جديد واعتبروه مؤشر على أن مصر بتعمل على تهيئة الظروف لتحقيق انفراجة في المحادثات الجارية حاليا مع صندوق النقد الدولي بشأن زيادة قرضها الحالي البالغ 3 مليار دولار  كجزء من حزمة أوسع ممكن تتجاوز 10 مليار دولار.

وبخصوص القرض قال التقرير إنه ووفق التسريبات فالمفاوضات بين الحكومة وصندوق النقد الدولي أوشكت على الانتهاء وحصل توافق بين الطرفين وبنسبة كبيرة هيتم رفع قيمة القرض من 3 الى ما بين 7 أو 10 مليار دولار
 

رأس الحكمة

وحدة أبحاث بانكير عرضت كمان تقرير مهم شغل الرأي العام في مصر وبقي ترند وهو بخصوص صفقة رأس الحكمة 
وقال التقرير إنه في آخر كام يوم مفيش كلام ولا سيرة الا عن مدينة راس الحكمة اللى بتقع على الساحل الشمالي لمصر .. واللى يقولك الحق الدولة بتبيع البلد .. واللى يقولك يا عم دي الامارات مش هتخلى حاجة فى مصر الا لما تشتريها وكلام كتير ماشي فى البلد كلها .. فيا ترى ايه حقيقة الموضوع وايه اللى بيحصل أصلا فى راس الحكمة وليه فجأة بقت محل اهتمام الناس وفين الحكومة من الاخبار المنتشرة دي

ووضح التقرير بداية القصة بنشر احدى الصحف الخاصة خبر وقالت إن تحالف شركات إماراتية يتبع إمارة أبوظبي اتفق مع الحكومة المصرية على شراء أرض في مدينة رأس الحكمة في الساحل الشمالي الغربي لإقامة مشروع باستثمارات تتجاوز الـ  22 مليار دولار وقالت ان توقيع الصفقة الكبرى هيتم نهاية الاسبوع ده على أقصى تقدير بعدما تم الاتفاق بين الجانبين على أن يتم ضخ الاستثمارات بصورة فورية.

وقال التقرير إنه فيه ناس كتير طبعا بتحب تصطاد فى الميه العكرة وتبوظ أى خطط أو مشروعات أو افكار جديدة لحل أزمة الدولار الخانقة بكلام كبير يخلى الناس اللى مش عارفة ولا فاهمة استثمار تتصور ان الحكومة هتبيع البلد رغم ان اى حد لو ركز هيلاقي ان منطقة راس الحكمة كل المشروعات اللى هتتعمل فيها مشروعات حق انتفاع

وعرض التقرير الرد الرسمي من الحكومة واللي قالت إنه لغاية دلوقتى مفيش أصلا أى اتفاقات تمت على مشروعات راس الحكمة لا مع الاماراتيين ولا مع غيرهم وكل اللى بيتقال لحد دلوقتي كلام مرسل ومالوش اى اساس على ارض الواقع لأن منطقة رأس الحكمة كلها  ما زالت قيد التخطيط ولا مفيش أي اتفاقات أو تعاقدات عليها في الوقت الحالي.

ووفقا للمعلومات المتاحة فالمخطط الجديد لمدينة رأس الحكمة بيتضمن أن المنطقة تبقا مقصد سياحي عالمي و إنشاء مدينة سياحية بيئية مستدامة على البحر المتوسط  عالمية
 

الدولار

التقرير الأخير معانا في تحليل النهاردة كان بخصوص سؤال طرحته وحدة أبحاث بانكير عن اللي هيحصل في الدولار الايام الجاية بعد رفع سعر الفايدة.

وقال التقرير إن بنك "دويتشه بنك " الألماني توقع خفض قيمة الجنيه المصري أمام العملات الأجنبية على المدى القريب خلال ٢٠٢٤. لمسويات هتوصل إلى 20% مقارنة بالسعر الرسمي الحالي البالغ حوالي  31 جنيه للدولار، وقالت المذكرة عشان التصور ده يحصل عدلوا توقعاتهم لسعر صرف العملة إلى 40 جنيه للدولار بحلول منتصف السنة، و45 جنيهًا للدولار بحلول نهاية 2024.

مذكرة البنك الألمان قالت إن السلطات المصرية ممكن تتحرك بحذر في ظل الظروف غير المؤكدة والمتقلبة على الساحة الدولية وأكدت أن أزمة سعر الصرف الحالية جت نتيجة وليست سبب للتحديات الصعبة اللي بتواجه مصر مؤخرًا.

المذكرة ادت كمان  أن الاستمرار في تعديلات سعر الصرف ممكن يكون غير فعّال، خثوصا عندما لا يعكس السعر القيمة الحقيقية للعملة في ظل استمرار أزمة إعادة التمويل في مصر دون حل فعّال.